A Phuan Cang~ Kawl Ralhrang Hi Cheu 5 Cheuhnih An Thi Cang

Kawl ralhrang hi cheu nga cheukhat cu an thi cang. Ralhrang nih uknak an lak hnu ahhin Kawl ralhrang a thi an tam taktak tinak si.

Kawl uico ralhrang pawl nih uknak an lak hnu ah ramchung ah hriamtlai phu an karh. A rak um ciami tlangcung miphun hriamtlai phu an thazang a karh. A rak bal lomi hriamtlai phu tampi an dirh.

Nihin ahcun Kawlram chung peng kip ah hriamtlai phu an um dih cang. A bik in Tlangcung miphun ram ah hriamtlai phu an karh i kahnak zong hi tlangcung miphun hriamtlai phu lak ah a tam.

Nikum Febraury 1,2022 in ralhrang nih uknak an lak hnu bak ahhin Kawl ralhrang hi a tlawm bik 15,000 hrawng an thi cang lai ti a si. Cu pinah a tlawmbik 10,000 hi cu raltu kho ti lo ding in hliamtuar mi an si lai tiah zumh a si. Cu si ahcun Kawl ralhrang hi raltu tawn tu 25,000 hrawng a tlawm lei in an i zuk cang, an zor cang tinak a si.

Kawl ralkap thazang hi an mah nih an i chimnak ahcun ralkap 400,000 leng kan si an ti. Sinain ralkap bawi pawl CDM a lutmi nih an chimnak ahcun Kawl ralkap hi minung 70,000 hrawng lawng an si tiah an chim. Ralkap bawi CDM a lutmi nih an chimmi hi a dik mi a si ko lai.

Cu ti a si ahcun Kawl ralhrang hi kum khat chung ah minung 25,000 hrawng an i zuk an zor cang caah a tu a tangmu hi 45,000 hrawng lawng an si cang lai tinak a si.
Kawl ralkap a hlan an rak um ning, an cawlcangh ning le a tu tiang an dirhmun hi an chel hlat tikah an zor ngaingai ko cang.

Ralkap nih uknak an lak hlan ahhin Yangon khuapi ah khan ralkap 10,000 hrawng an rak um tawn ti a si. A sinain a tulio an dirhmun ahcun ralkap 1000 hrawng lawng an um cang ti a si.

Kawl ralkap pawl hi 1500 leng an zam. Palik hi 4000 leng an zam fawn. Kawl ralkap pawl an thazang a zor ngaingai cang. A zor lei peng an panh rih lai. Tukum 2022 chung ah tamtuk an zor rih lai. A karh lei an si kho ti lo. Cu ruang ah Min Aung Hlaing nih rammi pohpoh ralkap luh ding in nawl kan chuah lai a tinak zong kha a si.

Be the first to comment

Leave a Reply

Your email address will not be published.


*