A Tulio Ah Min Aung Hlaing Nih A Tihbik Mi Cu Chin Miphun Kan si

Min Aung Hlaing nih Chin miphun cu a tih bikmi miphun kan si cang. Min Aung Hlaing nih CNF tham cu ralkap zong an ngei lo a rak ti.

Pu Aung Min hruainak in tlangcung miphun hna he NCA minthut ding in CNF an rak sawm lio hna ah khan Min Aung Hlaing nih CNF cu ralkap zong an ngei lo, zeihmanh an si lo i sawm lo ding an si ko ka ti nain Pu Aung Min nih a duh lo caah kan sawm sawh mi hna a si tiah video in a rak chim.

Cu lio ahcun CNF kan pa le hna cu tlangcung miphun dang hna hmai an hmai a rak hngal lo ngai. Chin miphun vialte kan ning a rak zak.

Sinain a tu cu Chin miphun cu Min Aung Hlaing nih ai buaipi bik mi le a tih bik miphun kan si cang. Ralkap nih uknak an lak hnu ah Chin ralkap CNA le CDF thazang a karh taktak. Tlangcung hriamtlai ah a karh bik kan si men lai.

Chin ramkulh ahhin tuak ulaw ralkap tintan a kai ciomi hi khua khat ah minung 20 tluk cio cu kan um dih hna. Khua khat ah minung 50 hmanh kan um hna. Thantlang tlang CDF lawng hmanh hi 2000 reng lo tluk an si. Chin ramkulh dihlak van tuak hmanh uh. CNA le CDF, CNDF le hriamtlai min dang fonh in Chin ralkap hi a tlawn bik 30,000 leng kan si lai.

Chin ramkulh ah ralhrang nih khuapi lawng ah hmunhma an ngeu cang. Khuate ah hmun an ngei ti lo. Khoika khua khaute hmanh ah an kal ngam ti lo. Ralhrang nih a uk khawh lomi ramkulh kau bik kan si cang.

Min Aung Hlaing nih ai buapi mi Kalay peng, Magwe ramthen nitlak lei vialte khi CNA nih tintan pekmi ralkap pawl an si hna. Khi vialte khi CNA kutneh bak a si.

NUG nih Chin ramkulh, Sagaing ramthen nitlak lei le Magwe ramthen nitlak lei cu CNA nih tuanvo lak ding a ti bantuk tein a tu ahcun Min Aung Hlaing nih ai buaipi bikmi a si.

Min Aung Hlaing nih zei ah a rel lomi CNA cu a tu ahcun Chin ramkulh a luat hmasa bikmi a si te lai ti hi an zumh ciomi a si cang. Chin miphun cu raltuk thiammi le mi raltha miphun kan si kan i hngalhnak Min Aung Hlaing zong nih a hngalh ve cang.

Be the first to comment

Leave a Reply

Your email address will not be published.


*