A Zam Lai Maw Ai Ap Te Lai Dah?

A zam lai maw ai ap lai dah? Thim dingmi pahnih ahhin pakhat poh ai thim a hau te lai. A duh zong duh lo zong ah ai thim can a ra cuahmah cang. Khoika lam dah a zulh te lai.

Min Aung Hlaing nih uknak a lak kum khat a tling deng cang. Thla thum chung hrawng cu dai tein lamzawh mi sandah piak mi kha an duh mi hna poh meithal in an rak kah hna i an rak thah hna. An tlaih hna i an hrem hna. Thi lak in an hrem hna i an chungril an rak chuah hna.

Thla thum a hun luan khan cun mipi lei hna nih lamzawh cun asi kho ti lo i meithal kan tlaih i kan doh a hau ve ko cang an ti caah Kawlram mino tampi le tlangcung miphun mino tampi hna cu ramri ah kal in ralkap tintan an kai hna. Min Aung Hlaing ralhrang doh ding in timhtuahnak an ngei hna.

A rau lo, kawlram hmunkip ah bomb a puak colh. Tlangcung miphun ramkip ah kahnak a chuak colh. KIA le KNU an tho colh. Ralhrang a tomtom in an thi i ralhrang sakhan tampi an lak thluahmah hna. Min Aung Hliang le a hawi le pawl an lau cang. Min Aung Hlaing nih China media sin ah mipi an cawlcangh ming a fak ngaingai. Ka ruah ning nak leng in a fak ko tiah a chim phaknak kha a si.

Bauinak a hung fak chin lengmang. Ralhrang pawk tamtuk an thi cang. Nikhat ah a za leng an thi lengmang. Sakhan hme deuh cu an chuahtak thluahmah cang hna. Min Aung Hlaing nih khuapi tu kha biatak tein veng uh tiah a ralkap pawl bia a cah hna. Khuapi lawng a veng kho ding dirhmun an phan cang.

Tukum in cun khuapi zong ah PDF le miphun hriamtlai an lut cang lai. Kayah ramkulh Loikaw khuapi zong thla khat chung deng kahnak a fak cang. Khuapi chung ah kahnak a fak lai i khuapi lak khawh ahcun Min Aung Hliang caah a thar in khuaruah a hau cang lai. A zam lai maw ai ap lai dah? Mahhi lam pahnih ahhin pakhat poh ai thim a hau te lai.

Russia ah maw China ah maw a zam ahcun sau deuh a nung men lai. Phaisa tam taktak ai zampi te lai. Ai ap ahcun mipi nih fak piin taza kan cuai lai i thihdan pek a si lai. Thim ding kam pahnih ahhin zeidah ai thim deuh te hnga.

Be the first to comment

Leave a Reply

Your email address will not be published.


*