AA Nih SAC Ralhrang Phomh A Timh Tak Cang, Nihin Ah Ralrinnak Cathanh An Chuah

Rakhin ram ah AA nih SAC ralhrang pawl nizan ah faktuk in an phomh hna i an nung buin minung 14 le an hriamnam vialte an chuh dih hna. AA nih SAC ralhrang ka aphomh taktak cang hna lai caah ralring tein um ding tiah cathanh an chuah.

Rakhin ramkulh ah kum 2020 thimnak tuah lai te thawk in Rakhine hriamtlai AA le SAC ralhrang pawl karlak i kahdohnak kum 2 tluk an daih ter hnu ah nihin July ni 19 ah SAC ralhrang he i kahnak a fak than kho tiah cathanh an chuah. Hi cathanh an chuah cu nizan ralhrang pawl ceilak an nun buin an thlaih hna hnu ah a tubantuk in an chuah hi a si.

Kan hnu naite ah khan SAC ralhrang nih hramhram in KNU hmun ram chung ah a um mi AA sakhan pakhat cu Jet Fighter in bomb a thlak caah mah cucu lehrulh nak ah nizan SAC ralhrang kan kah mi hna hi a si tiah AA chimphuannak nawlngeitu Khaing Tuhkhah nih western news ah a chim.

KNU tat-maha 5 hmunhma chung ah a ummi AA sakhan pakhat cu tuthla July 4 ah khan SAC ralhrang nih bomb a thlak hna caah AA hriamtlai paruk an nunnak a liam. Hi ruangah nizan kan kah mi hna cu kan lehrulh mi hna an si tiah Khaing Tuhkhah nihcun a chim.

Nizan i kahnak ah hin AA hriamtlai cheukhat zong aa khawng mi an um len tiah theih a si. SAC ralhrang lei in minung 14 nih kan sungh cang ko kan kap hin sawh ti hlah uh tiah an hriamnam an chiah tiah theih a si. Nizan kahnak ah cun RPG 7 Pistorl pahnih, sehmeithal pakhat, G3 le G4 telh in hriamnam tampi an tlaih piak hna.

Nizan AA he an i kah hnu ah SAC ralhrang nih an sakhan umnak hmun tampi lei ah in hriamnam ngan hehchet tiah zanlei suimilam 6 tiang an kah tiah theih a si. Rakhine ramkulh chungah SAC ralhrang pawl nitin rallam ser phun in a cawlcangh lengmang cang caah pehzulh in i kahnak a zual hma kho. Cucaah mipi pawl ralrin timhcia tein um cio ding tiah nihin ah cathanh an chuah. Ref-Western News

Be the first to comment

Leave a Reply

Your email address will not be published.


*