Biden Nih Putin He Ralthawh A Duh Lo Nak Kong A Phuan

Zei ruang ah dah US President Biden nih Russia he i kah hi a duh lo. Russia he i kah ding hi a hrial peng hnga timi ruah awk a um bak mi a si. Russia he ralthawh ding cu Biden nih a hrial peng mi a si. Russia lei nih a kah hnasa bel hna ahcun US nih leh colh ding tu kha timh cia cu an si.

Tulio Ukraine President Zalensky nih Ukraine ram ah Russia raltuknak Vanlong zuang kho lo ding in No-Fly zone kan tuah piak uh tiah US le NATO ram cu bawmh a hal hna. A sinain US le NATO nih an duh lo. A ruang cu Ukraine ram ah No-fly zone kan tuah ahcun Russia raltuknak Vanlong kha kan kah a hau. Kan kah ahcun Russia he ral kan tho colh lai ti kha an phang.

NATO le US nihcun Russia he ral thawh kha hrial khawh chung an i zuam peng mi a si. A sinain Russia he cun an i ral peng fawn. An i ngiar peng fawn. Kah taktak le an tih fawn tung.

Sihmanhsehlaw US le NATO ram pawl nihcun Ukraine ram cu a mah tein ai ven khawhnak ding ah hriamnam tampi bawmhnak an pek lengmang. Russia Helicopter le Jet fighter mah zatzat an kah thlak khawh mi hna khi US le NATO nih an bawmh mi hna Vanlong kahnak in a si. Russia Tank zong tamtuk an rawk an kang cang. Cu zong cu US le NATO pawl bawmhnak hriamnam deuh hmammi a si.

US le NATO nihcun tutan Ukraine le Russia kahnak kong ahhin Ukraine nih tei seh ti an duh. Sinain Ukraine lawng nihcun zeiti hmanh in a tei kho ding si lo. Cu ti si ahcun Russia ral hin cansau deuh ai ven khawhnak caah hriamnam tal bawm usih an ti i hriamnam tampi an bawmh. Cu pinah US le NATO nihcun Russia nih Ukraine hi a lak khawh hmanh ah NATO ram chung tiang cu Russia cawlcanghnak um bak hlah seh ti kha an duh mi a si fawn.

Russia nih Ukraine hi a lak khawh hmanh ah NATO ram chung ahcun pe khat hmanh kar hlei van lam hlah seh ti an duh caah Ukraine le NATO ramri ah chunzan hlan in NATO ralkap pawl nih an ven peng ti a si. Cung he tang he an ven peng ti a si.

Russia le US an i kah ahcun Nuclear bomb a ngeimi ram an si caah duh zong duh lo zong ah Nuclear bomb hman a hau lai. Nuclear war ahcun minung tamtuk kan thi lai. Ralkap lawng an thi lai lo. Mipi zong tamtuk kan thi lai ti kha Biden nih a ruah caah Russia he raltuk a hrialnak hi a si ko.

Be the first to comment

Leave a Reply

Your email address will not be published.


*