Breaking News; Kan Halkha khualipi thawngpang vun theih cu e!!!



Hakha Thawngpang !!
==============
Chinland khualipi Hakha khuahlun ah Chin ralkap le SAC ralkap an i kap. Chin ralkap hna an himnak hnga thlacam cio ding in kan in sawm hna.Chin ramkulh, Hakha khua ah zaan sml 7:00pm hrawng in bom thawng a than hnu ah khuahlun sang lei mipi inn a kaang tiah thawng kan theih.

A tulio boruak kong he pehtlai in thawng a langhter tawntu upa pakhat zong nih Hakha khua, khuahlun sang lei inn kanghnak kong a facebook cahmai ah a langhter ve.

Dawrhlun sangmi pakhat nih “SAC hriamngan kuan pawl ceuduk in an zuan kha kan hmuh. Cun khuahlun biakinn thlanglei ah mipi inn a kang mi zong kan hei hmuh khawh” tiah The Chinland Post ah a chim.

Sihmanhsehlaw hi mipi inn kanghnak kong he pehtlai in The Chinland Post nih adang tein kan fianter khawh mi a um lo i zeiruang dah a kangh le mi zei nih an khangh ti mi zong a fiang in kan langhter kho rih lo.

A luancia zarh chung zong ah Hakha khua No. 3 B.E.H.S ah a um mi SAC ralkap pawl nih zaan ah mipi pakhat meithal in an kah i a hmun ah a ril, hliamhma fak ngai in a tuar nain a nunnak cu a him rih tiah thawng theih a si. The Chinland Post nih a rauh hlan ah thawng dik fianh khawh ṭhan kan i zuam te lai.

Thawngpang Țha, Thantlang peng, Vanzangtlang, Lungding khua ramleng um mi hna nih CNF/CNA/CDF caah dollars $70,000.00 (Thongsawmsarih) an pekchanh.

SAC nih thah ruang ah a nunnak a liam mi sualnak ngei lo mipi 2,566 an phan, Myanmar ram ah hramhram in uknak lak a si hnu kum 1 le cheu leng caan chungah SAC ralkap nih sualnak ngei lo mipi 2,566 a thah cang hna i a tlaih/hren mi minung 16,543 tiang an um cang tiah Assistance Association for Political Prisoners (AAPP) nih a thanh.

Atu cazin hi 2021 February 1 in 2022 December 10 tiang AAPP nih a khawmhsuatmi a si i khawmhsuat khawhmi lengah a thimi an tampi rih lai tiah a langhter.

Innlo a zaamtak mi 1.5 million an phan, UN nih 2022 November 28 ah a thanh mi cazin ning ah ralkap nih hramhram in uknak a lak hnu ah a chuak mi ramchung kahdohnak le himnak um lo ruang ah innlo a zaamtak mi hi 1,160,100 tiang an phan tiah a thanh.

October thla dongh lei cazin he kan tahchun a si ahcun hmunhma kip ah SAC ralkap an phanh ruang, mi an thah ruang, mipi sawhawh an i tinh hna ruang le vanlei in kahdohnak a tuah ruang ah a zaam mi 50,800 an karh.

UN cazin hi Karen, Karenni hmunhma i ralzaam hna caah rian a ṭuan mi phu pawl cazin he tahchun a si ahcun a tlawm lei a si. Cucaah innlo a zaamtak mi hi atu cazin nak in an tam chin lai.

Ralkap nih hramhram in uknak a lak hlan kahdohnak le buainak ruang ah a zaam mi hi 330,400 an si tiah UN nih a thanh. Cucaah ralkap nih uknak an lak hlan le an lak hnu ah innlo a zaamtak mi an zapi te hi 1.5 million hrawng (1,490,500) an si cang.

Pau Dothlennak chung tuni tiang ah minung 13,070 an tlaih cang hna i cu chungah minung 1,701 cu thawngthlak ding in biakhiah an si.
Dothlennak he pehtlai in an tlaih/hren hna i thah ding tiah bia an khiah mi 97 an um i hriawh in thah ding tiah biak an khiah mi 42 telh in minung 121 cu hriawh in thah ding tiah biakhiah an si caah thah ding tiah biakhiah a simi an zapi te 139 an si cang.

Atutiang ah biakamnak he thlah ṭhan a simi 23 an um i an thlah ṭhan cang mi hna 3,449 an si tiah a langhter. AAPP nih a lak khawhmi cazin ning ah hramhram in uknak lak a si hnu thok in 2022 November thla dongh tiang SAC nih hrenhkhanh mi inn 900 nak tlawm lo a um cang tiah theih a si.

Hramhram in uknak lak caan thla 22 chung Chin ramkulh ah a thi mi 355 tiang an um, Ralkap nih hramhram in uknak a lak hnu 2021 February 1 in 2022 November 30 tiang thla 22 chung Chin ramkulh ah SAC nih mipi le hriamtlai 355 a thah cang hna i Chin ramkulh chung ah mipi inn 1,505 a khangh tiah a luancia November 30 ah Institute of Chin Affair nih a thanh.

A thi mi chung ah mipi sawhsawh 167 le SAC a doh lio mi hriamtlai 186 an i tel leng ah kum 18 tang hngakchia 14, thla 6 hngakchia le thla 7 hngakchia 2 an i tel tiah a tial. Cu chung ah dai tein duh lo nak a langhter ruang ah meithal in kah a tong mi 10 an i tel i an ruak an khangh mi hna 9 an i tel tiah a langhter.

Cu lawng si lo in Chin ramkulh ah Pastor 4 SAcCralkap nih an thah hna i biakinn 8 zong an khangh tiah thawng theih a si. Myanmar ram mipi hna caah European Union nih WFP sin ah Euro 6 million a bawmh, Eidin lei harnak a tong cuahmah mi minung 15 millions an umnak Myanmar ram caah bawmhnak pek khawh ding in WFP sin ah Euro 6 million leng European Union nih a bawmh.

Eidin man le datsi man a kai tuk ruang ah Myanmar ram mipi hna cu facang, chiti hna cawknak a har chin thluahmah bantuk in ramchung hmunkip ah a cang cuahmah mi buainak le inn lo zaamtaknak ruang ah bawmhnak lam zong a rawh caah minung tampi nifatin eidin an i za ti lo.

WFP nih EU pek mi bawmhnak cu cozah a si lo mi phu pawl, mipi hrambunh a si mi phu pawl he rian kan ṭuanṭi lai i harnak a tuar khun mi chungkhar sin ah eidin le tangka kan bawmh lai tiah a chim.

Bawmhnak cu Yangon khua misifak chungkhar hna, ramri hmunhma le Myanmar ni chuahlei le chaklei i minung sing 8 leng sin ah samh a si lai. 2022 thok in WFP nih Myanmar ram minung sing 3 leng cu eidin, ngandamnak le paw cawmnak lei bawmhnak a pek cang tiah a chim.



Source link

Add a Comment

Your email address will not be published. Required fields are marked *