Breaking News; Min Aung Hlaing caah thawngpang chia kho taktak i thanh hna usih!!



PDF Le Tlangcung Hriamtlai Hna Bawmhnak Peknak Phung NDAA Cu American Hluttaw Pahnih Nih An Cohlan Cang
===================
Myanmar ram kongah sermi upadi National Defense Authorization Act cu American Senate nih an cohlan cang tiah theih a si! “Burma upadi ah aa telmi National Defense Authorization Act(NDAA) cu American Senate nih an cohlan cang i,

President Biden nih minsen thut ding in an kuat cang,” tiah Washington hrambunh Welson Center in ramkhel ngiathlaitu Ye Myo Hein nih amah pumpak social media ah a ṭial.

NDAA cu a tang Hluttaw(House of Representatives) nih an rak fehter cang i ni 8 a rauh hnuah a cung Hluttaw(Senate) nih an fehter ṭhan. American Hluttaw pahnih nih an fehter cang caah President Biden min thut lawng a taang cang, tiah theih a si.

NDAA chungah PDF, tlangcung hriamtlai vialte le Myanmar ram democracy a dirpitu bu hna cu hriamnam si loin hriamnam serthiamnak fimnak pek ding le a dang dang bawmhnak pek ding zong aa tel, tiah Ye Myo Hein sinin theih a si.

Cu pinah NDAA chungah SAC nih nawlngeihnak an lakmi a cohlang lotu SAC ralbawi hlun hna an khuakhanmi le an tuahsermi vialte bawmhchanh ding kong zong aa tel, tiah theih a si.

Kalay-Rih motor lampi cu India-Myanmar ramri pehtlaihnak ah a bik in hmanmi motor lampi pakhat a si. Nizan December 15 chun ah Chin ramkulh Tidim khuapi i SAC khah-lah-yah(269) chungtel ralhrang -40 rual cu Sezang khua ah kee lam in an lut i fimcawnnak siang inn ah um hmunkhuar in an riak.

Nihin December 16 zing Sml11:50 am hrawng ah PDF Zoland le CDM Siyin ai bawmmi nih kalhnawh in Sml 2:00 chung kahdoh an si i ralhrang lei thihliam zeimaw zat an um canvo chia ngai in Sezang khua cu an tlolh tak .Mipi rungveng tu phu lei pakhat hliamfak tuk lo a tuar tiah ZFU/PDF Zoland nih an thanh nak theih a si.

Yuangan PDF ralkap a si mi Nu(2) le Pa (9) andih lak ah minung (11) cu SAC nih Dec- 13 ni ah khan Aungpan myo-ne ah luhhnawh in an tlaih hna tiah theih a si.

Cu pin ah Yuangan peng chung Nuabankyi khua tlaklei ramtang hna zong ah dalan nih an phuan hna ruang ah ralhrang thazaang (50) hrawng nih luhhnawh in an kawl hna i dolet tu phu nih thawng an theih manh caah an thilri hna cu ngoltak in an zam manh tiah theih a si. SAC nih an tlaih mi hna mipi ralkap hna hi ralhrang nih zeiban tuk dirhmun ah dah an dirter hna ti bel theih a si rih lo.

Sagaing ramthen Kawlin peng PDF (ပ.အ.ဖ)nih bingrang chatpiat bawm in bawm (110) an tlaih mi cu mei in khangh i hrawh a si nak nihin ah an thanh. Dec-13 chun Sml 12 ah khuachung hruaitu hna mithmuh ah an khangh cu a si.

Hi bingrang (rithai sii) hi Dec-4 ni ah Byuhaa lampi hmunkhat ka ah Madalay in a rak ra mi Pajero motor No 1D/7215 ai khenh mi check nak an ngeih mi i pah-ah-phah nih an tlaih mi a si.

Bingrang sin ah Lung mansung ah zumh mi lung (23) / tat cia mi lung (9) / Hand Phone -2 / tablet-1 / laptop -1 / Keyboard -2 / Gram thlai nak -1 / lung zoh nak datmei -1 / nam -1 / MMK-168250 kyat / paisa bawm -3 / Dollar 10 / ATM card -1 tlaih chih a si nak an thanh chih.

Thilri hna he tlaihchih a tong mi minung (thilri ngei tu) pahnih hna cu phungning in an cung ah tuah a si lai nak kawlin peng mipi uk-chuk-ye phu nih theih ter nak an tuah.

Hriamngan ruang ah Yinbaungdai khua hngakchia 2 an nunnak a liam, SAC nih vanlei in kahdohnak a tuah ruang ah Sagaing ramṭhen, Yinmapin peng, Yinbaungdai khua December 16 zinglei ah a puak rih lo mi hriamngan an tongh ruang ah hngakchia 2 an nunnak a liam tiah khuami hna nih RFA ah an chim.

A nunnak a liam mi hna hi kum 5 hngakchia Mg Htet Bone Naing le thla 7 lawng a si rih mi Mg Hein Thura Kyaw hna an si tiah a chim.
Vanlei in kahdohnak an tuah lio ah a taang i a puak rih lo mi hriamngan an tongh i a puah caah an nunnak a liam hi a si tiah khuami 1 nih RFA ah a chim.

Yinbaungdai khua cu SAC ralkap nih August 11-14 tiang vanlei le vawlei lei in fonh in fak pi in kahdohnak a tuah i cu lio ah kum 10-85 kar mipi 19 an nunnak a liam.

RFA nih a khawmhsuat mi cazin ning ah October 1 in November 30 tiang thla 2 chung ah SAC i vanlei, vawlei lei, hriamngan kah ruang le Bomrap buah ruang ah mipi 105 an nunnak a liam cang i 263 an i hliam. A nunnak chung ah hngakchia 15 an i tel i hliam a tuar mi hngakchia 47 an i tel.

Demoso kahdohnak ah SAC ralkap 30 hrawng an i hliam tiah KNDF nih a thanh, Karenni ram, Demoso peng kahdohnak ah SAC ralkap aa hliam mi 30 hrawng an um tiah KNDF nih December 16 ah a thanh.

SAC ralkap pawl cu December 13 thok in Demoso peng Bathaling khua lei ah an luh caah KNDF he kahdohnak voi 3 a chuak. Cu kahdohnak chung ah SAC ralkap 30 hrawng an i hliam i Bathaling khua le Watlahtua khua hna an khangh tiah a langhter. Cun SAC ralkap nih hriamngan an kah thlorh caah Dawse khua chung ah hriamngan lung 3 a puah ruang ah mipi 1 a nunnak a liam tiah an langhter.

TNLA he kahdohnak ah SAC lei in a tlawm bik 15 an thi, 2 an tlaih hna, A luancia December 7-12 tiang SAC le PSLF/TNLA hna karlak kahdohnak chung ah SAC ralkap a thi mi an tam i a nung in an tlaih mi hna zong an um tiah theih a si.

Kahdohnak chung ah SAC ralkap a tlawm bik 15 an thi i 2 a nung in an tlaih hna tiah theih a si. Hmunhma theihfian deuh ruang ah TNLA nih an tei deuh hna i vanlei bawmhnak i tel hlah sehlaw SAC ralkap an zapi tein kan tlaih khawh hna lai tiah TNLA ralkap pakhat nih Mizzima ah a chim.

Konetha khua pawng ah kahdohnak a fak khun i SAC nih Jet vanlawng 20 nak tlawm lo in a rak kah hna tiah theih a si.
Jet vanlawng nih a kah ruang ah TNLA lei in a thi mi an um ve tiah theih a si.

Taungoo khua luhnak gate bom an puah hnawh, palek bawi telh in 4 an i hliam, Yangon le Mandalay lamcung ah a um mi Taungoo khua luhnak gate cu December 14 zing sml 9:10am hrawng ah bom a puak tiah theih a si.

SAC ralkap le palek pawl nih khualtlawng mipi an nek hna, mawṭaw le cycle sin in tangka tampi an lak hna caah kan puah mi a si tiah Tiger One phu upa Saw Mu Kha nih a chim. “Cuka hmunhma mipi hna thawng an kan pek ning ah PK le palek bawi telh in 4 an i hliam tiah a chim.

Bomrap hi lung 2 kan hmanh. Mipi an um ve caah lungkhat lawng kan puah” tiah a chim. Bom puah tlawmpal ah mizaw phor mawṭaw a rak phan tiah a chim.

Hpruso khua Lawbuda sang ah SAC ralkap an kah hna i a thi mi an um, Karenni ram, Hpruso peng, Lawbuda ah hmunhma khuar ding in a rak lut mi SAC ralkap pawl cu KNDF B06 le KA phufonh nih December 13 ah an kah hna tiah theih a si.

Cu kahdohnak hi chun sml 1:00pm hrawng in aa thok i SAC ralkap 1 a thi, 1 aa hliam tiah KNDF B06 nih a thanh. SAC ralkap lei hi thazang 50 hrawng lawng an um i kahdohnak chung ah an sungh caah hriamngan an kah thlorh tiah theih a si.

Ayadaw peng, Wayaung khuami 5 SAC ralkap nih an thah hna, Sagaing ramṭhen, Ayadaw thlanglei in meng 6 hrawng aa hlatnak ah a um mi Wayaung khua mipi 5 cu December 11 ah SAC ralkap nih an rak tlaih hna i an thah beh hna tiah khuami pakhat nih Mizzima ah a chim.

“SAC ralkap 50 hrawng nih khuami 7 an tlaih hna i 2 cu khuataw ramlak ah an thah hna. Pahnih hi an tukvelh hna hnu ah phungki sianginn ah an rak thlah ṭhan hna. A tang mi 3 hi cu an tlaih hna i zaanlei hrawng ah khua in an chuak ṭhan” tiah min langhter a duh lo mi nih a chim.

Cu chung ah Ko Zaw Myo (kum 24) le Ko Aung Min Ta (kum 39) hna cu Local PDF an si i ramlak ah an thah hna, kum 40 leng le kum 60 leng 2 cu phungki sianginn ah hma he an chiahtak hna i mipi 3 an tlaih hna hnu ah an chuak tiah theih a si. An tlaih mi hna 2 cu Kyaukpyauk khua pawng ah an hnawng an hleh hna i an thah hna tiah theih a si.

Kawlram hmun tam ngai ah nizan December 15 zan sml 7:00 hrawngah hmuh khawh a simi ceu pakhat cu India ram nih Agni V Nuclear a phor khotu, khan tampi tiang a zuang khomi missile hneksaknak kan tuahmi a si i hlawhtlinnak kan hmu, tiah India ram runvennak zung nih thanhmi cherhchan in India media tampi nih an ṭial, tiah theih a si.

Kilometer 5,400 leng ah hmuitinh a kheng kho i Angni V Nuclear a phor khotu hriamngan missile cu, nizan December 15 zanlei sml 5:30 in Odisha um AP J Abdul Kalam tikulh ah India nih tlamtling tein hneksaknak an tuah i an hlawhtling tiah theih a si.

Atu bantukin hneksaknak kan tuahmi hi a hlannak in missile lei thiamnak thar le seh thilri thar hman thiamnak caah kan hneksaknak a si, tiah an langhter.

India nih 2021 October ah Angni V Nuclear phor khotu missile hneksaknak an rak tuah i, a hmuitinhmi zong dik tein a khen khawh. Missile cu a san meter 17 a si i 1.5 ton a ritmi a phor khotu a si, tiah theih a si.

India le Tuluk cu ramri kongah a buaibai ngaingaimi an si i ralhriam lei zong in aa zuam ngaingaimi an si. India nih missile hneksaknak an tuahmi hi India le Tuluk karah i hmuh thiam lonak fak piin a chuak kho tiah tuaktantu hna nih an chim.



Source link

Add a Comment

Your email address will not be published. Required fields are marked *