Breaking News; Tutan kan thawngpang theih mi cu e!!



Demoso peng, Puhpa khua kahdohnak ah KNDF hriamtlai 3 an nunnak a liam +Thawngpang chia
===================
Demoso peng, Puhpa khua kahdohnak ah KNDF hriamtlai 3 an nunnak a liam tiah KNDF B06 nih December 11 ah a thanh. A nunnak a liam mi hriamtlai Steven, Da Wei Maung Nge le J Nay Oo hna cu December 7 ah a chuak mi Puhpa khua kahdohnak ah an nunnak a liam hi a si tiah a langhter.

Hriamtlai Steven, Da Wei Maung le J Nay Oo hna an nunnak a liam cu KNDF caah sunghnak nganpi a si leng ah KNDF B06 nih paralṭha hna tiah upatnak sang bik kan pek hna i an min cazin kan khumh cang hna tiah an thanh. Atutiang Puhpa, Thesulay le Konetha khua pawng ah SAC ralkap le Karenni phufonh hna karlah kahdohnak a fak rih tiah thawng theih a si.

Kalay peng chaklei ah mipi hriamtlai le SAC ralkap karlak ah kahdohnak fak a chuak tiah thawng theih a si. PDF-Kalay telh in PDF phufonh le SAC ralkap hna cu Kalay peng chaklei, Kalay-Tamu lam pawnghrawng ah an i kah hi a si tiah PDF pakhat nih People’s Spring ah a chim.

“Tu zing sml 7:00am hrawng in kahdohnak a chuak. Mipi hna nih Kalay thlanglei ah umkal i ralring hna u sih” tiah PDF-Kalay hriamtlai pakhat nih a chim. Kalay-Tamu Asia lam ah November thla chung thok in kahdohnak a chuak cang i SAC ralkap a thi mi an tam.

Sagaing ramthen,Kawlin khuapi chung ah SAC nih nizan december 11 ni ah mipi inn (200) reng lo mei in an khangh leng ah tualchung mi (5) an kahthah hna nak Kawlin pah-kah-phah nih nihin december12 ah an thanh.

Kantbalu peng Kodaungboh in a ra mi SAC khah-mah-yah (363) le Chiattin in a ra mi SAC khah-mah-yah(369) hna nih Kawlin peng chung Kukkukung khua mipi inn (80) /Pepinchawng khua inn (39) / Nguangkung khua inn (29)/ Ziphyukung khua inn(45) Shawphyukung khua inn(24) hna cu an khangh tiah theih a si. Facang le Fangfak hna leng ah zuatkhalh satil hna cu tam ngai an thah in an hrawhhral. Cu lawng si lo in tualchung mi (5) an kahthah hna tiah theih chih a si.

Dipeyin peng nichuah lei ah December -2 ni thawkkhan Dec- 11 ni tiang ni (10) chung ah khua khua-18 i mipi inn (1600) reng lo SAC nih meikhangh piak an tong i mipi (20000) Inn lo in an um tiah Dipeyin peng ralzam a bawmchan tu phu nih nihin ah an thanh. December 2 ni in nihin tiang theihkhawh tawk ah Dipeyin peng chung ralzam mi mipi (35000)reng lo an phan tiah theih a si.

November thla chung ah khan SAC nih vanlawng in ral a ser nak Letyetkung khuate inn (186) zong meikhangh piak an rak tong. SAC hna nih hin Dec-2 ni in 11 ni tiang Dipeyin peng nichuah lei um khua khua-18 i mipi inn hna cu mei in an khangh piak hna leng ah mipi eidin lei har nak tong hna seh tiah serh lei in rawlruk le satil hna leng ah leithuannak hmanrua hna tiang an khangh dih tiah theih a si.

Tu dirhmun ah Dipeyin peng chung Pyawbuai khua / Ngaungkyikung / MeOo / Letyetkung /Mukhadwin /Ngaunghlah /Kankung / Tapyeta khua /Waikyi / Yungta / Nahmyia / Yinkye / Muyuukung / Banbuai / Inpin / Kungtee / Kungkyi /le Pauhyin khua an dihlak ah khua -18 cu mei khangh piak an tong.

Ni hin ralser mi SAC ralthluan hna nih YeOo le Dipeyin ramri um Aungta khuate le Mohsi khuate hna cu mei in an khangh chap hna i cu ka pawng ah umhmun an khuar tiah theih a si. SAC nih tu bantuk in khuakip ah ralser nak le inn meikhangh nak pehzulh in an tuah caah ralzam an i chap len ko zumh a si.

Nihin Dec. 12.2022 ah SAC ralhrang nih Kalay peng Nanchaung khua ah mei ankhangh mi ah biakinn pakhat le mipi inn (19) a kang tiah theih a si. (1) Ling No Nu, (2) RemTsung Nung (3) Van ling (4) Kawl UK Lian (5) Rang Za Mang (6) Sui Lian (7) Nem Ting (8) Khai Bu

(9) No Thang (10) Maang Za Pum (11) Mung Vel (12) Niar suum (13) Khai No (14) It nei Mawi (15) Kam bawk (16) Thian Za thang (17) Khrih Lian Tsung (18) Van Bawi Muang (19) Solomon (20) Foursquare Biakinn hna an si tiah theih a si. Kanbiak zingnu nih tuarkhawhnak thazaang in pe hramhna seh.

TNLA chungtel (4 ) cu hriamthil hna he tlaih an si tiah ralhrang lei nih thawngzam nak an tuah mi cu thawng dik lo a si tiah TNLA lei chimphuannak nawl ngei nih ralbawi Ta Aih Kyaw nih a fian ter.

Hi thawng hi SAC lei tang Han Nging Oo nih Telegram in phozar nak a thawk i Facebook ah a darh dih tu a si,kan hnu december -7 chun hnu Sml 2 pm thawkkhan TNLA sakhan pawng cu SAC nih vanlawng le tanglei vawlei lei he kemh in ralser nak a awt caah nihin tiang ni -5 chung kahdohnak a fah ling a si tiah a chimchap.

SAC ralkap nih hramhram uknak lak hnu 2021 February 1 in 2022 November 30 tiang thla 22 chung ah mipi inn 38,383 a khangh cang tiah ISP-Myanmar nih a thanh.

SAC ralkap pawl nih mipi inn an khangh mi cazin kha Data for Myanmar nih a khawmhsuat mi a si i internet le phone line a ngah lo nak hmunhma pawl i thil sinning pawl ngah khawh lo mi a tampi caah atu cazin nak in a taktak ah a tam deuh kho mi a si tiah an langhter.

SAC nih inn tam bik a khangh nak hmunhma hi Sagaing ramṭhen a si i mipi inn 27,496 a khangh. Magway ramṭhen ah mipi inn 7,818 a khangh i Chin ramkulh ah 1,479 a khangh caah a pahnihnak le a pathumnak tambik a kaang mi hmunhma an si.

Hramhram uknak a doh ruang ah an tlaih mi hna chung in nu 2,636 an i tel tiah Women’s League of Burma nih a thanh. December 5 -9 tiang an tuah mi a voi 11 nak Conference dih hnu December 10 ah atu bantuk in an thanh hi a si.

Nu pawl cung ah Sexual Violence kha hriam bantuk in an hman, nuhrin covo an buarnak pawl, hramhram uknak a dohtu nuhrin covo le nu covo a dirhkamhtu pawl cung ah harnak an pek hna, an tlaih, an hrem hna i an nunnak tiang an ṭihphaih hna tiah an thanh.

Nu pawl caah harnak nganpi pah ding a si ko nain hramhram uknak dohnak ah kan i tel ko lai tiah Women’s League of Burma nih a thanh.
Hramhram uknak donghter, hramhram thiltuahnak, namneh le thleidannak hna a tlauternak, nu/pa tlukruannak, daihnak, tlukruannak le Federal Democracy rampi a chuah khawh nak hna hi Women’s League of Burma nih aa tinh mi a si tiah an langhter.

Hramhram in uknak a latu SAC nih an tlaihmi hna PDF-Kalay sii lei hriamtlai nu 4 cu an hma an tuar ko nain SAC nih sii thlopnak nawl a pe hna lo tiah Kalay khuami pakhat nih The Irrawaddy ah a chim.

Sii thlopnak nawl a ngah lo mi nu 4 cu Lalmuankimi, Lalthanhluii le Lalpianfeli le Niang Don Ciin hna an si. Anmah hna hi SAC nih an tlaih hna lio ah bomrap ci nih a peh hna i an i hliam ko nain an hma a dam tiang SAC nih a thlop ter hna lo tiah a chim. Lalpianfeli hi hngakchia thonginn ah facang tun hna a cawi, ṭuang hna a ṭaih caah tai fah zawtnak a tuar tiah an chim.

Niang Don Ciin zong biahalnak lio ah an hrem tuk caah a mit le a hna theihnak a rawk ngai cang tiah theih a si. Anmah 4 hna i Chin miphun nu 5 he 2021 November thla ah SAC ralkap nih PDF-Kalay B03 sakhaan an rak luh hnawh hna lio ah tlaih an rak tong.

Cu Chin miphun nu hna cu SAC ralkap nih hngakchia thonginn ah sual phawtnak 505 A, 50 (J) le 52 (D) hna in 2022 November thla ah thong kum 12 dan an tat hna.

Rakhine Ramkulh Ah Pa Minung Pa 2 Ruak An Hmuh!! Rakhine ramkulh, Sittwe khualipi pengkulh ah a um mi Basa khuate nitlak lei tiva ah pa pa 2 ruak an hmuh, tiah theih a si. Nihin Dipa ni 12, Zinglei suimilam 10:00 hrawngah Sittwe penglulh, Basa nitlak lei ah a um mi Tiva chung kiangkap thetse cungah pa pa 2 an ruak cu hmuh an si, tiah theih a si.

Cu hna pa pa 2 ruak cu UngTawChay (အုန်းတေချော) Muslim Zohkhenh nak sakhan in U Hami Tusain ( ဦးဟာမိတူဆင်း) kum 28 le Botuba (ဘောတူဗ) Muslim zohkhenh nak sakhan in U Swan ( ဦးစွန်) kum 30 hna an si, tiah kan theih. Tiva pawng, Thetse cungah hmuh mi pa pa 2 ruak tel in minung pa 5 hna cu Dipa ni 11 ni, nga tlaih an i khawh nak ah vokkuanglawng let nak in a nunnak a liam mi an si, lai tiah chungkhar hna nih an ruah.

A nunnak a liam mi Muslim minung pa 2 an ruak cu Mipi siizung, Chung lei zohfel khuainak ah an kuat hna ii a tang mi minung pa 3 ruak cu hmuh an si rih lo, tiah theih a si.

Latin holh “decem” in a luang mi biafang hman a si i “pahra” ti sullam a keng. Cucaah Romulus Calendar c. 750 BC ah nithla rel pahranak ah chiah a rak si. Nihin vawleipi nih hman mi nithla rel thla ah kum donghnak ah chiah a si. Phundang in kan chim ahcun, kumpi kum khat chung thlarel thla vialte khaartu a si.

Chuankhan ngei in kawhauh mi thla a si lo, nain Khamhtu Khrih Jesuh chuah thla ah rel in a chuah lawmhnak Christmas camtuak thla a si caah, thlarel thla dang vialte nakin a sunglawi khun, a nuam hlei khun, phak lai ngaih hlei khun mi thla a si.

Kan pipu hna nih an thlawhtuan retheihnak le khingrihnak vialte i damh caan chuankhuan in “Dipa” tiah an ti. A sullam cu “kum khat chung kan tuan mi thlai laak, kum voi ca ah lo thingtuk, rian vialte an dih. Kan thlawh kan tuan vialte an i lim dih cang ti duhnak,” tinak a si.

Laitlang si ning cun a si fawn. Kan thlawhtuan mi lo rian vialte ai lim, ruuk le haan rawn mi tirawl hmanh an phortlunh dih ti khawh si. Hmathlak ciing pawl hmanh Dipa ah cun pawl an bongh dih cang. Rian a um lo caan, laihlumh caan a si. Ram chuakvat pa pawl cu Christmas caan mehsa zalh an i thawk pah cang. Thlaileo chiah le mangkhawng do tibantuk, zu-dawn riah le cerap chiah in nihlawh an teem. Acheu cu kum vui thlawhsial ding lo vah ah an i nam.

A thlum mi thla a si bantukin nuamhnak le lawmhnak in khah caan thla a si. Khuate in khuapi tiang hna in theih khawh mi thawng ah “Christmas hla” lawng a si. Khuapi zatlaang lam i chawh ah minung a sawh bak in i sawh caan a si. Khua, peng le tlang, Khrihfabu, hawi le kom, sianginn ti, cing le la tibantukin hmunkhat ah hnianghrawm caan, tirawl purh caan a si.

Tiva kuang cu nuamhnak le lawmhnak au-aan nih a kheh. Thinlung a zaan caan a si caah a mizei paoh lawmhnak in khah lio caan a si. Christmas thla a si bantukin annih chung cuka ram um nih siloah kan Khrihfabu nih Christmas an/kan tuah lai tibantuk bia chokvak a len lio a si.

Ngakchia rual zong Christmas nih a chuahpi mi luatnak an ngeih caan a si tikah, zalen taktak in Christmas nih a chuahpi mi lawmhnak an hman caan a si. Lawmhnak le nuamhnak in caan hman caan a si caah a liam lai kan tih bik mi le ngaihlah bik mi nithla zong a si.

Miphun rorelnak le mahte uknak Council a kan petu le meimit lo in kum 50 tiang lawm kho dingin lamhruaitu Bawipa cu sunparnak pe usih. Laifa nih mahte khuakhan lairelnak District Council kan ngeih khawhnakhnga raltha te’n riantuantu hna le hruaitu tleicia hna upat an um hringhran.

Britain uknak in India nih zalennak hmuh ding a timtuah lio ah miphun kip ah mahte rorelnak ah Laimi zong kan i tel i , nihin ahcun kum 50 tiang Pathian nih a kan kilven. India cozah, Mizoram cozah cung zongah lawmh a um tuk. Golden Jubilee kan hman khawh hi thil palh a si lo, duh tik caan paoh zongah hman khawhmi a si lo. Caan hi a her in a her mi a si. Golden Jubilee hi pumpak ca a si lo, ram le miphun rorelnak kum caamtuak a si.

Ram le miphun humhak hi a biapi tukmi a si. India ramchung ah miphun tampi le milu tampi an um lio ah Laifa hna nih zeiruangah rorelnak kan ngeih timi hi kan lungthin ah um seh. Kan ram le miphun kilven hi a biapi, Laimi sinak zahpi lo in vulei pi theih in Lai kan sinak langhter usih. Nupi, pasal ngeih kong zong hi tha te’n ruah a hau, ca nan cawng mifim thiam kan in ngeih hna, miphun dang pasal nan ngeih hi miphun tlaunak hramthawknak a si.

Kan ram le miphun karhlannak ahhin mithmuh in a thangcho tiah hmuh khawh ngai a si, kan inn kan lo kan motor te hna, eidin tiang zong hlannak in a thangcho deuh. Asinain kan khuasak tintuknak ahhin than dawn kan si sual maw, rian ngei lo kan tamtuk, mino hna zong chawlehnak ah zumhawktlak kan si a herh, kan ram karhlannak dingah hin mino hna rithaisi nih a kan teituk sual maw, cithlahtu mino tha kan herh rithaisi nih kan nunnak a hrawhtuk ahcun kan ram cu miphun dang kut a phan ko lai. Ho dah kan ram a humhak lai, ram humhaktu kan herh.

Ramkhel lei zongah zei bantuk Party i kan um zongah ram caah cun i doh lo in, ram caah tuan usih, khua khat le khuakhat i rem lo tionak ti a si kha. Ram le miphun damnak ah Khrihfa thawngtha chim zong a biapi, LADC chung riantuan vialte hna zong Khrihfabu pakhat chung ah um usilaw zei tluk in a that hnga a sinain, hramhran in um u i ti phung cu a si lo.

I soisel lo in Khrihfabu nih thawngtha karh ter usih. Rithaisii nih lemmi hna mino hi YLA nih hma an lak ahcun an taksa an lungthin a hliam khawh hna, asinain Khrihfabu lei nih hma a lak ahcun taksa lungthin a dam lai. Fanu le fapa zeizat dah kan sungh Jerusalem ah tan la hmasa usih, khuatlang nun ah thilthalo sualnak rawhralnak cu do usih.

LADC i thithruainak zong aa thleng tawn ko cucu Democracy phung zong a si, zei Party paoh nih cozah tlai ko hna hmanhseh, kan Lairam damnak ah riantuan ko usih.

Theihnak le fimnak lei zong hi a biapi tuk, kan ram ah Chimtuipui kan ngeih, kan ram ah thing le mau zong humhak lo ahcun a loh tuan ahcun ram karhlannak ah a hnubik kan si ko lai, cawnnak lei ah a thiamsang kan in ngeihmi hna zong nih, kan ram le miphun cawisang u, nan cawnnak sang deuh miphun nan kaltak deuhdeuh YLA hna ah nan i tel duh lo,

Britain cozah nih uk lio ah Laimi cu Bangladesh – India – Myanmar ti’n an kan then, kan lungput zong aa khat lo, kan thisen sining aa hmunkhat kho lo, nihin ah kan unau hna cu an ram buai ruangah harnak tampi an ton, harnak nih thiltha a chuahpi lai, cun kan nih Lai cu kan zaam lai lo, Bangladesh kan unau hna zong Parva ah an rak zaam, hnangam lo le thinphang in um hlah u,

Lai miraltha hna tuanbia kan theih, zei bantuk ral lak hmanh ah an zaam bal lo, nihin Lai pasaltha Youtube i an zaamter mi kha cu hrokhrawl a si, kan lungthinput thlen a hau, diklo ning in miaknak hmuh kan duh, riantuan kan huam lo, hlawh lawng kan duh, cuai deuh kan hmang fawn, kan ram kum 51 nak ahcun lungthinthar Jerusalem thar dirh in, Laifa kan nunning hi Khrihfa he aa kalh lo, khual kan dawt ning hna, Laifa kan nunzia hi aa dawhtuk ram 3 ah um hmanh usilaw kan harnak le kan buainak hi funtomtu a si lai.

Lairam harsatnak hi beidongh ding a si lo, Lairam le miphun ah beidong lo in, thazaang thar he, Cozah, YLA, Khrihfabu, pumpak kan zaang thawng chin ko seh. Kan miphun caah zumhtlak si usi, chungkhar ah nuncawng usih. Samaria mitha bang thawngthachim in, Jerusalem lawng ruat lo in kan kiang ah a ummi hna caah riantuan caan a si.

Kan ram le miphun a dam lo hi, Lairam hi Laifa ta a si, Japan technology thiamnak le American thiamnak nih kan Lairam an ser lai lo, ram ngeitu Laifa nih sersiam in kum 51 nak ahcun kan Lairam hi ruahnak thar ngei in miphun dawtnak ah kan tharchuah lai beidongh ding a si lo ruahnak thar tu ngei ko usih.Crd-The Lairam Times



Source link

Add a Comment

Your email address will not be published. Required fields are marked *