CDF hi fapa chuaksual ban tuk in an um i, CNA hmanh hi an kuttang ah chiah an timh hna

Febbruary 1, 2021 in Min Aung Hlain le a mithi langla pawl nih uknak hramhram an lak hnu in Myanmar rampi huam in Mino hna hriamtlai hram an i thawk cio hna. Myanmar rampi huam in hriamtlai buu kong van ttial ah cun a rel nan huam lai lo. A caan zong nan ngei lai lo. Cu caah Chin Ram huam lo in ka van ttial lai.

Nizan kha CNA/CNF nih a voi (34) Chin Revolutionary Day an tuah. Lawmh a um taktak. Nain CNA/CNF ruahsualmi an rak ngei caah le an dingfel lo caah mipi nih an rak upat hna lo. Zei ah an rak rel hna lo. An tuah sernak zong a rak ttha lo ngai fawn. Sihmanhsehlaw CNA cu Chin ralkap puitling an si ve hrimhrim. An tuah sualnak vialte hi an van thiangh ngaingai cang. Chin miphun zong a lamkip in hme kan thancho ve cang cu. A hlan lio ban tuk in um hna sehlaw, dirkamh cu chim lo an mah hmanh kan kah khawh ve cang hna lai si. An ralchia/tha ti duhnak a si lo. Vawlei thancho ning le Chin mi zong kan thanchonak kong ka chim duhnak.

CNA/CNF cu kum 30 reng lo ramkhel kong ah hmuhtonnak a ngeimi hriamtlai buu putling an si. Cu caah tluk awk cu an rak ttha deuh lo. An hnar tu puar hram hlah seh.

Rallokap nih uknak an lak hnu in CNA nih CDF an cawn piak hna. Thil sining fiang deuh in an chim hna. A sinain CDF hi fapa chuaksual ban tuk in an um i, CNA hmanh hi an kuttang ah chiah an timh hna tiah thawng a len ngai tawn.

CDF hi Peng le tlang kip in a um cio. Daniel Sakhong nih cun a ttha tuk a ti. Kei nih cun a tthatnak in a chiatnak ka hmuh deuh. Ziah tiah cun alu si an i cuh te hna lai i, kan ral kan tei te tik ah an mah le an mah an i kap te lai tiah chim chung khawh a si. Cun nihin ah kan thei lengmang mi cu, buu dang cio in buu khat ban tuk in ral an tuk tik ah, an raltuk ning a hman lo nak kong an chim lengmang. Hihi a tthat lo nak phun khat a si fawn. Minung tampi nih CDF an duh lo nak le CNA i fong hna sehlaw timi an duh deuh cio nain raltha te in an chim ngam lo. Fake account luklak in an chim caah mipi nih zei ah an rel piak hna lo. Ralttha te in a chim ngamtu um hna sehlaw a ttha tuk hnga.

Cu caah Peng le Tlang CDF hi support ti lo in CNA hi thazaang pe hna usih law CDF hi CNA ah i fong hna sehlaw Ralkap bukhat in dir usih law kan thawn chinchin lai i, kan ral hi fawi deuh in kan tei lai tiah zumhnak ka ngei. Ramleng ummi zong nih CDF hi thazaang nan pek tuk ti lo i, CNA ah an i fonh deuhnak tu in thazaang pe cio hna usih.

CDF hi kan i upat ko hna nain CNA command tang i nan um khawh lo ah cun CDF min hi nan hlawt i CNA ah nan lut viar ah a ttha lai tiah kei nih cun ka ruah.Credit-Global Village News

Be the first to comment

Leave a Reply

Your email address will not be published.


*