Chin Mi Nupa Hna Nih Bomb An I Lamh Caah Pa Bik A Nunnak A Liam Ee, An Nu Zong Hliamhma Fak A Tuar Ve – Onlinenungak


Bomb Lamh Sual Ruangah Matupi Khuami Pakhat A Nunnak A Liam. Chin ramkulh, Matupi khua ah nihin November 29 zing sml 9:00 hrawngah Pu Ya Peng le a nupi cu,

SAC ralkap Khah Lah Yah 304 sakhan lei kap an dum ah an kal lioah bomb an i lam sual i Pu Ya Peng cu a nunnak a liam, a nupi zong a ke ah hliamhma a pu i Matupi sii-inn ah an kalpi, tiah theih a si.

Lawng Van sang ah a ummi Pu Ya Peng(kum 56) cu pehtlaihnak zung ah rian a ṭuanmi a si i, fapa pahnih le a nupi a roh tak hna, tiah theih a si. Crd: The Chin Post

Relchap: Lawmh Bia chim philh hlah. Tuzing vawlei thawngpang ka hun bih cu ka lau ko – India ram, Bangalore khuapi kum 42 a simi pa, Rahul Parmar nih a fanu cu rawl pek awk a ngeih ti lo caah a thah ti a si.

Hi pa hi a luan ciami thla 6 chung rian a ttuan kho ti lo. Bitcoin ah an phaisa ngeihchun investment a tuahmi vialte a sung dih cikcek; a nun beidongh tuk ah a nupi Sui tiang a thli in a fir i a zuar piak dih cang. Nain zeihmanh zuar awk zong an ngei ti lo, phaisa leibaa tampi a ngeih fawn caah a chungkhar eikhim rawl a chuahpi kho ti lo. A fanu cawm a lungkhua hmu ti lo.

Cucaah a fanu cu tiva pakhat pawng ah a kalpi i a kuh, hehlawh tiah tiva kam ahcun nuamhnak phunphun a tuahpi hnu ah “ka fanu, kan dawt tuk, kan sianginn lo tuk nain rawl pek awk kan ngeih ti lo caah ka ngaithiam ko mu” tiah a ti i a thah hi a si..

Rawl ei awk ngei lomi tam tuk an rak um hi mu… Judah miphun nih an fale cu rawl cabuai an hun kulh dih sin ah “Kan fale, Bawipa nih rawl ei awk a kan pekmi ruang ahhin i lawm u; nan pupa hna cu thetse ram ah rawl ei awk ngei lo le ti din awk ngei loin dawh an rak um cuh” tiah rawl ei awk an ngeihmi a sunglawi zia an rak cawnpiak peng hna ti a si.

Na chungkhar rawl ei awk nan ngeihmi ruangah lawmhnak bia na chim maw? Kan minung hawi an rum bantuk i kan rum ve lo ruang i phunzai nak in rawl ei awk ngei lomi kan minung hawi hna lak i ei awk kan ngeihmi ruang ah lawmh bia chim hi lungthin damnak a si deuh. Ei awk kan ngeih ruang i lawmh bia chim philh hlah usih.. Credit: Dr. Hram Bik Lian


Post Views: 11



Source link

Add a Comment

Your email address will not be published. Required fields are marked *