Chin Miphun Dohthlennak Tuanbia Ka Rel

PUR 29 DIARY: Chin Miphun Dohthlennak Tuanbia Ka Rel, CP Lian C

Kawlte nih furpi nikhua he pehtlai in phungthluk an ngeih mi hi a dikpah ngai.
“Zingka ni a tlan ahcun luchin i ken, zingka ruah a sur ahcun tithawl i ken,” ti khi. Nihin Sangau zong 1:00 PM tiang cu ni a tlang nain zanlei cun khuadawm, chum le ruahhmai he!

Sangau YLA hruainak in Kawlram cycle kan i luhpi mi kha Sangau khuachung ah zalong tein kan hman khawh naklai cycle nambar a kan benhter. License ti ngaingai khi cu a si lo. Kan i lawm. Nai cikua cu Sangau lamton in palik in cycle luchin te hna zong an chek lengmang, ralrin a herh. Cycle nambar an kan benhpiak mi zong kanmah ca a si. I ralrin hi himnak a si.

Ralzam lio kan ti cu cauk rel awk i hmuh a har ngai. Salai Khin Maung Thein D. Ed., nih a ṭial mi, “Chin Miphun Dohthlennak Tuanbia,” cawk ding a um ngelcel. Rs. 500 in ka cawk i ka rel. Kan ram le kan miphun nih dohthlennak a tuah cuahmah lio ah hi cauk rel cu hmual a ngei khun mi ka lawhter. Tuanbia cu a hmun mi a si caah theihhngalhnak tampi mi a chap. Lal Deng hruainak in Mizo nih India a dohnak vialte zong ai tel. Rel ah thlah colh awk a ṭha lo. Ka chuahsemnak Bungkhua, Mar nih AD 1858 ah an rak chim hna nain Bungkhua nih Thangzang, Sopum le Tlangpi tiang in an rak i sawm hnanak le Mar ral cu an rak tei hnanak, an rak dawi hnanak zong ai tel. Mar pawl nih Bungkhua an chim i an sungh le Laimi pawl nih an rak tei tuk hnanak he pehtlai in, “Lai ral tuk ahcun ka zang hmanh in ka hnuk hna sehkaw tel hlah,” tiah an ti phah, ti a si. A ka ciah ngai. Nihin kan ralkap CNF/ CNA a dirnak le tuanbia in dohthlennak a cauk cu a donghter.

Cahmai 432 chah in Chin Miphun Dohthlennak tuanbia a kan ṭialpiaktu caṭialtu hi ka upat tuk hringhran. Muidawh soikhat phur tiah a cauk belte proof reading a chambau deuh rua, cafang palh mi le ṭ cafang deh lo mi a tam ngai. A rel rih lo nih rel cio awk, rel phu cauk a si.
2022 Pur 29, Cawnnithum.

Be the first to comment

Leave a Reply

Your email address will not be published.


*