Chin Miphun Nih Suu Kyi Kan Zumh Peng Mi Hi Kan Hrut Tuk Caah A si ko

Chin miphun nih Daw Aung San Suu Kyi kan zumh khawh peng rih mi hi khuaruah har ngaingai kan si.

Daw Aung San Suu Kyi party a simi NLD kha kan zum loh ti sk loin a mah Suu Kyi hrimhrim hi zumh a um lomi a si. Anmah Kawl miphun caah cun zumh a tlak tuk ko. A sinain kanmah Tlangcung miphun caah cun zumh awk hi a tlak bak lomi a si.

A ruang cu tuanbia kan theih lo caah le ca kan rel lo caah a si ko. Suu Kyi nihhin KIA zong a rem hna lo. AA zong a rem hna lo. A mah cozah chan lio ah khan Kawl ralkap pawl zong KIA kah ding in Suu Kyi nih nawl a rak pek hna. AA zong kah ding in nawl a rak pek hna. A herh ahcun Helicopter le Jet fighter zong hman ding in nawl a rak pek hna.

Cu tluk cun Suu Kyi nihhin tlangcung miphun hriamtlai hi a rem hna lo. NLD nih teinak hmu usih ti a duh caah Tlangcung miphun pawl hi a daw ngai bantuk in ai umter tawnmi a si ko.

Hihi tlangcung miphun hna nih kan fian awk a si cang. Chinmi upa cheukhat nih NLD ah cozah riansang le Suu Kyi nih Minister rian tal a ka pek theu lai tiin an i ruah caah Suu Kyi hi biatak tein an tanh mi a si.

Ralkap nih uknak la hna hlah hmanh sehlaw Suu Kyi nih uknak a tlaih hnu ahhin tlangcung miphun kan ram ahcun kahnak hi a dai kho ding mi a si hlei lo.

Suu Kyi nihhin Federal State hi a ngaingai ahcun a duh taktak lem lo timi a lang. A ruang cu Federal state a khelmi kan miphun hriamtlai hna hna kha zei ah a rel hna lo. Hihi Kachin le Rakhine nihcun an i fiang tuk caah NLD le USDP cu ai khat bak ah an rak ruah mi a si.

Cu caah Chinmi nih hriam kan tlaih i dothlennak kan tuah tikah kanmah miphun ca bak ah siseh. Kawlram pumpi ca a si sual ahcun Kawl upa pawl uknak tang ah can sau tak kan um rih lai. Kawl hi cu Kawl an rak si ko. Credit: Bawi Lian

Be the first to comment

Leave a Reply

Your email address will not be published.


*