Chin Ramkulh Le Sagaing Ramthen cu Kum 2022 ah Chin Ralkap Nih Kanuk Dih Cang lai

Chin Ramkulh, Sagaing Ramthen chung hi 2022 kum ah zalennak hmuh khawh ding kan i hmaithlak tiah CJDC GS nih a chim

Atu kan vun tial mi hi Myanmar Now media nih CJDC an General Secretary Saya Timmy bia an hal mi a si i a fiannak le a tawinak in kan hun leh.

Biahalnak: Ralhrang nih kum thar hnu Chin Ramkulh ah raltuknak an chuahter mi dirhmun zeidah a lawh?

Lehnak: Khual kan tlawn tikah zaa a long kho lo. Atu hna cu electric mei zong caan tling in an pe lo. Phone line zong a ciangkuang lo ca ah Information lei hi a har ngai. Paletwa hna ahcun zeizongza an phih. Facang, Chiti man pawl a hlan nak let hnih in an kai. Asinain, mizapi lei nih hihi kan ton te hrim lai ti ruahcia a si ca ah a hlankan in timhlamhnak kan rak ngeih cia mi si. A chia bik dirhmun ca zong ah timhlamhnak kan ngei cia.

Biahalnak: Chin Ramkulh chung ralhraang an dirhmun le an cawlcangh ning tah?

Lehnak: Ralhraang nih an i tinh ning in an cawlcang kho lo. Ramkhel lei hoih in chim ahcun, Chinram hi atu dirhmun ahcun zei bantuk uknak hmanh ralhraang nih an nunter kho lo. Kan ram chung ah an duh ning le an i timh mi a nung kho lo. Khuate khuapi i ukhruainak siseh, biaknak lei siseh mizapi nih mizapi ralkap lawng an kan bochan. Khuapi chung an umnak hmanh ahhin anmah ralkap chung lawng ah an duhnak a tling kho. Dothlennak ralkap nih Chin ram cu kan hruai khawh ko atu tiang ahcun.

Biahalnak: Asiahcun dothlennak ralkap nih kum khat chung hmun nan laak khawh mi zatuak zat na kan chim kho lai maw?

Lehnak: Chin Ramkulh zatuak 80 in 90 hi cu kanmah kut ah a um. Zeica tiah, atu ah zoh ko ulaw Peng kip i SAC Cozah zung pawl rian an tuan kho lo. Khuapi chung um mi nakin khuate lei kan tam deuh cang. Atu ah Mindat, Hakha le Thantlang zoh ahcun, “Mah te uknak le khuakhan lairelnak an hman cang,”. Sianginn zong anmah thazaang in an kaiter cang hna khi mu…

Biahalnak: CJDC nih kum khat ca nan i hmaithlak mi na chim kho hnga maw?

Lehnak: Kan i hmaithlak mi ca ah timhlamhnak kan ngei cuahmah. 2022 kum chung ahhin a tlawm bik Chin Ramkulh le Sagaing Ramthen hi zalennak hmuh ding in kan tuan lai tihi kan i hmaithlak cem. Sagaing, Magwe hna hi kanmah nih kan ukhruai lai ti hi ralkap dihlak kan i hmaithlak mi a si. Ralhrang nih Thaal ahcun vanlawng zong a kan hman hnawh. A fak bik hremnak zong a kan pek. A fak bik sungh zatlaknak zong a kan pek ko. Asinain fur a phak hin cun a hlan nakin kan den khawh hna lai ti kan zumh ca ah timhlamhnak tha kan ngei cuahmah. Cun mizapi zong hi zaa ah zaa kanmah lei an si ca ah hnu an kan chit tak lai lo ti zumhnak ka ngei…

Biahalnak: Atu lio nan hriamnam dirhmun zei a lawh?

Lehnak: Mizei hriamtlai phu kan si zong ah hriamnam hi cu tling in kan ngei kho cio lo. Asinain, atu ral kan tuk hi kum khat a si cang i hriamnam tling ngeih lawng ah doh ding ti si lo. Mah le thluak fimnak in a lam kawl i doh cio khi a si ko. Hriamnam kong ah NUG lei siseh mipi lei in siseh biatak tein an kan tanpi ve. Hriamnam zong i zalh cuahmah kan si ko. Cucaah 2022 kum ahhin cun Chin Ramkulh le Sagaing Ramthen chung cu zalennak kan hmuh khawh hrim lai tiah chim ka duh.April 18, 2022Credit-TheHakhaPost

Be the first to comment

Leave a Reply

Your email address will not be published.


*