Chinmi kan dohtlennak caah NUG cozah maw a tha deuh Vaurawng Zuunthil dah a tha deuh?

Mahhi kan pa le cheukhat nihcun an ruah ngaimi a si cang. Kan pa le cheukhat nih an chim tawnmi a si cang. NUG maw kan Chinmi caah thil ti deuh Varawng Zuunthil team hi dah ti a si cang.

CNF kan pa le cu NUG cozah sinah ralhrang doh tti ding in min a thu hmasa bikmi hriamtlai an si. A tu tiang CNF lawng hi ralhrang doh ti ding in NUG ah minsen a thumi a si ko rih rua. A dang Tlangcung miphun hriamtlai hi an thu lem rih lo. Minthut le thut lo kha a biapi tukmi le sullam ngei tukmi cu asi lem lai lo. Minthut lo zong in KNU le KIA te hna PDF he ral an tu i NUG he an i pehtlai peng ko. Thut zong poi lo i thut lo zong poi hnga lo tinak si cu.

Nihin tiang kan Chin ramkulh ah ralhrang nih minung tamtuk an kan thah cang. Kan inn lo vialte an khangh i kan thilri vialte an hrawh. Kan khua an ciamter. Minung thong tamtul ralzam dirhmun ah kan um hna.

Kan Chin ramkulh dothlennak caah hin NUG nak in Vaurawng Team nihhin phaisa a let tamtuk in an chuah ter khawh deuh. Kan hnu ah NUG nih Chin hriamtlai caah Us dollar thong sawmruk cu hmaihngal ngai an kan bawmh tiah an chim.

Vaurawng team nih zan khat an au ahhin dollar in tong sawmruk hi cu fawi tein a chuak mi a si. Vaurawng team nih kan hawi le Yaw PDF ca hmanh ah dollar thong sawmruk leng an rak bawmh hna khah.

NUG nihhin kan Chinram caah sii le ai tampi a kan bawmh mi a um ko lai. Ngandamnak lei in an kan bawmh mi a um ko lai. Sinain ralzam bawmh le hriamnam lei bawmh tiahcun chim awk tlak lo khi a si. Kanmah le kanmah kan i bawmh mi hmanh a zat naisai lo.

Kan rak ruah ning ahcun NUG nihhin CNA le CDF caah meithal thatha tampi a kan bawmh lai i kan ralzam hna caah phaisa le din ei tampi an kan bawmh lai ti kha rak ruah cio a si.

Sinain mahhi zawn ahcun NUG cu bochan awk a tlak lo. Kanmah Chinmi le Chinmi, kanmah pengtlang cio in kan i bawmhnak lawng hi biapi cu a rak si. Vaurawng Team nih kan CNA le CDF caah phaisa tam taktak an kan chuah piak khawh. Cu lawng si loin Chinland Club zong nih phaisa tam taktak an kan chauh piak khawh.

NUG cozah nihcun UN le ramdang hna sinah Kawl ralhrang pawl hi sipuazi in dantat le meeting ah kaiter lo tibantuk hi an i zuam deuh mi le an ti khawh deuh mi a si.

Kawl ralhranh cu nan theih cio bang UN dantat le ramdang nih sipuazi in dantat lawng khan cu a ngah bak ti lomi a si. Than Shwe chan ah mah bantuk kha cu tamtuk an rak tuah cang. Ralkap an zei hmamh a poi lo.

Tutan kan dothlennak cu a thi poh thi le a nung poh nung in i kah kha a si ko cang caah meithal le kuanzen hi a biapi bikmi a si. A karlak ah ralzam rak bawmh le rak zokhenh kha a biapi mi a si. Cu thil ahcun NUG hi cu chim awk a tlak lo khi a si. Mah bantuk hriamnam le thazang ahhin NUG zong i bochan awk a rak um lo.Crd-Thestar

Be the first to comment

Leave a Reply

Your email address will not be published.


*