Dr.Ngun Cung Lian~ Ralkap Tello In Kan Ram Hi Uk Khawh A Si Lo

Ralkap pakhat te tal loin 2008 phunghram pi remh khawh a si lo. Upadi cu meithal nih a kah ahcun a dih ko.

Myanmar ralhrang nih uknak an lak hnu ah ruahnak petu ah an hmanmi Dr. Ngun Cung Lian nih a luan ciami can i bia a rak chimmi pawl zoh thannak a si.

Pu Aung Min nih tlangcung hriamtlai le Kawl ralkap kar ah kahdaihnak min thut khawhnak hnga caah kum 5 chung a rak sawm i a pu Aung Min he rian an rak tuan ti. Kum 2015 ah NLD nih uknak a tei i Pu Aung Min te cu an rian phuah an si bantuk in Ngun Cung Lian zong a rian phuah a rak si.

Cu hnu ah rian lo bantuk in a um cang i USDP upa pawl he ai kom. Suu Kyi cu fak piin a rak soisel. Meithal voikhat zong a tlai bal lomi, miphun hriamtlai hna an konglam le sining zong pakhat hmanh a hngal lomi nih tlangcung miphun hriamtlai hna he dainak ser ding in a mah nih tuanvo a lak hi cu nihchuah a si. Zei eibar tling a chuah canh lai lo a rak ti. Nihin tiang Suu Kyi nih a kalmi Panglong Confrance cu a tlamtling kho taktak lo. Eibar cu a chuah taktak lo.

NLD cozah chan lio ah an rak buai bik mi cu kum 2008 ralkap nih an sermi phunghram a rak si. Cu phunghram cu NLD nih kanmah kan tlin ahcun kan remh lai an rak ti i kum 5 chung an i zuam nain an remh kho lo. Pohmah pakhat te hmanh an remh kho lo. Ralkap nih remh khawh lo ding in an tuah mi a si caah a si.

A donghnak ah kum 2020 thimnak ah NLd nih teinak a hmuh than i ralkap nih thimnak a dik lo an ti caah uknak an lak beh. Ram chung kahnak le buainak a chuah i nihin tiang mahhi thil hi kan chuak.
NLD cozah chan lio ah Dr. Ngun Cung Lian cu upadi thiam sang a si caah Kawlram media minthang hna nih voi tampi interview an tuah i a chim tawnmi bia a si.

Kum 2008 phunghram pi remh khawhnak ding caah cun ralkap pakhat te lungthlen a hau. 25% a simi ralkap vote pakhat te kha a herh. Cu pakhat te a um ahcun phunghrampi hi remh khawh a si. Cu lo cun a lam a um lo. Upadi cu cauk menmen a si. Meithal kuan nih a kah ahcun a tlek lai, zeihmanh a si lo tiah a chim.

Cu a chim duh mi cu ralkap hi an thinhun ter hna hlah uh. An thin nan hun ter hna ahcun upadi le di lo a um lai lo. An duh ning poh in rian an tuan lai. Cu caah ralkap hi a lem in lem hna uh law nanmah NLD lei ah tlawmpal tal tanter kho hna uh ti kha a rak chim duh mi a si.

Mahhi ti van ruah ahhin a dik bak mi a rak si. Upadi thiam nih upadi kong an chim ahcun al awk a um bak lo. Kum 2008 phunghram remhnak ding ah 75% cung vote lawng in remh khawh si seh ti a si tikah ralkap kha 25% an si peng tik ahcun upadi kha remh khawh bak a si ti lo.

Suu Kyi zong nih ralkap lungtluanh a rak i tim tuk ko nain hlutraw meeting ah ralkap palai le NLD palai pawl lung i hmuh ti lonak a chuak cang. Suu Kyi nih ralkap bia zei ah a rel piak ti hna lo caah uknak cu an lak taktak. Phunghrampi cu meithal in an kah i anmah ralhrang caah cun upadi le di lo a um ti lo. An duh mi kha an tuah i an duh lomi kha an tuah lo ko cang.Credit-Thestar

Be the first to comment

Leave a Reply

Your email address will not be published.


*