Skip to content
Home » Federal Locun: Kanpi Suu Locun: Ralkap Locun Titu Hna Kan I Dannak

Federal Locun: Kanpi Suu Locun: Ralkap Locun Titu Hna Kan I Dannak

Federal Locun: Kanpi Suu Locun: Ralkap Locun Titu Hna Kan I Dannak

2007 ah Suivua Muci Dohthlennak a chuak. 2008 ah Nargis thlichia a hrang. Mi tampi an thi, kawlram mikip sifah Retheihnak le Harnak tuar asi. Kawlram kong cu Vawleipi lungthin ah khua a sa ve cang. Vawleipi Ramkhel kong ceihnak ah Kawlram kong loin a dih ti lo. Kawlram kong cu papek in vawlei pi nih an ceihphai cang. U Than Shwe hruai mi Ralhrang Rallokap cu Pressure an hung pek thluahmah hna. Rallokap zong nih timhlamh nak tampi a tuah ve. 2007 ah Suivua Muici Dohthlennak a dih bak in Nargis thlichia nih aa pehzulh caah; mipi tirawl le Eidin kan har ngai cang. Abik in Nargis nih a den mi Irrawaddy Tikulh hi a harsat bik an si. Ramkulh dangle Ramkomh dang zong ah tirawl a harsa tho tho. Hranhram in Uknak Chuttu Than Shwe nih arau hlan ah sandah piah nak a chuak te lai ti kha a hngalh cia cang. Kawlram pumpi Dohthlennak a chuak kho tiah a tuah cia cang.

Ralhrang uktu vialte ah aza bik mi cu U Than Shwe hi asi ko. A zia ṭhatlo le a lungput ṭhatlo lawng hi asiko. Thluak le Tuaktan nak ahcun Ralhrang Ni Vung le MAH nih an tluk lo. Ralhrang Ralbawi hna an I lawh dih nak pakhat cu: Anmah le chungkhar le sahlawh rualchan cingla rumnak le siṭhatnak lawng papek an hmang: an kut tang Rallokap kha uico tluk zeihmanhah an rel cio hna lo. Mipi cung ah an ṭhatlo ning cu aa lawh dih. Than Shwe cu a Saya asi mi Ni Vung nawl aa cawng dih lo. A ṭhat mi kha a lak I, abau mi kha a remh i a chap. Thazang dernak kha a ṭhawn ter. Mipi nih Sandah an piah hlan le Dohthlennak an tuah hlan ah 2008 Phunghrampi kha lim cikcek in a tuah ter hna. 2008 Phunghrampi cu Rallokap papek mi le COVO Tling a pek mi Upadi asi.

(1) Mipi nih thimh herh loin Hlutdaw ah Rallokap 25% an to lai. (2) Thimhnak ah 26% an hmuh ahcun 25% he fonh in Rallokap nih Cozah tlaih lengmang ding (3) Rallokap cu Tamada le Cozah lutlai hna nih nawl pek a ngah lai lo, Rallokap Luzik lawng nih nawl a pek khawh. (4) Rallokap hmang mi phaisa cazin cu check le Audit nak nawl aum lo. (5) Rallokap Luzik hna an duh le an sual ko lai nain, tazacuai khawh le dantat khawh asi lai lo. Hnu khirh in sual nak kawl le tazacuai dantat a ngah lomi Rallokap bawirual ah Than Shwe nih a sersiam hna. (6) Nipidaw ah Khualipi a thawn. Mipi nih an kan duh lo tikah, Uknak le cozah ṭha tein aa merh khawh nak hnga tiah saduhthah nak he an tuah mi Nipidaw Khualipi asi. Kawlram mipi kan doh hna ding hi Than Shwe nih a hngalh cia cang. Mipi nih an kan doh zong ah Nipidaw aum ahcun kan uk khawh zungzal hna lai tinak caah Nipidaw aum nak asi.

U Than Shwe cu a lamkip in timh cia tein a um dih hnu ah thimnak a tuah I, uknak a chanh hna. Ramdang Sualphawt nak le dantat nak an zawr bak ve cang. Rallokap cung ah Vawleipi zumh nak a karh. 2010 thimhnak cu an tuah cia mi bang in asi dih. Tamada ah anih: Hlutdaw Chairman ah anih: Rallokap Luzik ah anih: tbk in Than Shwe nih a thiah cia dih hna. Nominate a tuah ning tein rampi Luzik cu an si dih. Cozah uktu le Cozah tling tein le fek tein an tuah dih hnu ah Kan Pi Suu cu Innthong in an thlah. Dawtnak le Zangfahnak an ngeih tuk ruang ah Kan Pi Suu an thlah hi asi lo. Kan Pi Suu U Than Shwe nih a thlah nak aruang hi (2) aum. (1) Tuluk Leiba in kan thih cang lai, Sri Lanka kan hluan lai kha damter a duh caah. Tuluk Kuttang le Tuluk Saal sinak in luat a duh. (2) Vawleipi nih Ardel ah khumh in Erh mi kan si caah kanmah lawng in khuasa mi kan si. Vawleipi ah Dotla mi si a duh ve. Ramdang Phihkarhnak an kan thlah piak I, Ramdang bawmhnak tampi kan hmuh ve nak hnga.

U Than Shwe cu a zia a chiat rup in a thluak a zer ve. Kan Pi Suu a thlah caah Ramdang bawmhnak tampi an ra thluahmah cang. Democracy ram kan si cang caah Ramkip nih cohlan mi le cawnglawmh mi kan si cang. Kan Pi Suu thawng in Ramdang phaisa cuai awk tampi an ra ve. Ramdang he pehtlaih nak an ṭha I a tliang fawn. Leiba tampi zong ngaihthiam kan si. U Than Shwe nih Salen Kuat in an kan ṭhuat dih hihiar ko. Cucu a hngalh lo mi nih Tamada Thein Sein tuah mi ah an ruah. Dr. Andrew Ngun Cung Lian zong nih a ruah ve caah tu dirhhmun hi a phan ve. Thlarau ah akal sual I Pathian thlarau thangchait tu ngaithiam khawh an si lai lo timi Bible bia kha Dr. Andrew Ngun Cung Lian cung ah tling ve.

U Thein Sein cu hnu lei in chakhri tlaih in duh poah in merh mi Tamada asi. Tang lei nih cazin an hlen mi zong a hngalh lo, adik tiah a ruah dih. Fimthiamnak timi cu kan co ṭhan khawh tilo mi Hlawnthil asi tiah “ပညာရေးဆိုတာ ပြန်မရနိုင်တဲ့ ရင်းနှီး မြှုပ်နှံမှု ဖြစ်တယ်” Pulpit cung bak in a chim. Tang lei nih an cuaisan mi kha a tak in aa ruah sual mi Tin Sui asi. Ramdang phaisa cawi mi kong le Ramdang phaisa in tuah mi Simankin le a dot dot tein leiba cham kong lawng a theih mi pa Tin Sui asi. Cucaah thimnak ah a sung bak ve. Hlutdaw ah a ap cia mi ngeih mi thilri le hlawnthil cazin cu athli tein a lak ṭhan I a thup diam. Mipi nih Tin Sui ngeihchia hngalh khawh asi ve ti lo. Tamada Thein Sein cu a fit bak, azaa bak, a thiam tuk, amah ruang ah, tbk in mitcaw lakin a zumh I, achim tawn tu nan um caah tu lawng ah ka chimhphuan mi asi. Hlan ahcun, Vuanṭhan kan si caah, mumal le phungphai nih a onh lo, rian phuak ding kan si. Tu cu Pathian thawng in Ka CDM ve cang caah zalon tein ka chimh phuan khawh ve cang.

Ram le miphun caah Thein Sein a ṭhat lo nak cu: Kan Pi Suu nih Phu (4) tawn biaruahnak a hal I aduh lo. Tamada; Hlutdaw Chairman; Ralbawizik: Mipi Hruaitu: tiah minung 4 tawn awk ah Kanpi Suu nih a hal. Thura Sui Mang le Kanpi Suu cu tawn ding ah an I hliphlau ngai nain Thein Sein nih a phih bak ko. NLD lawng nih Kaalung an auh duh lo hi asi lo. MAH zong a duh lo bik tu asi ve nain, NLD ni Kaalung an meeting an kawh ballo a hei ti ve ningzak in. Ram le Mipi zawnruah ah Kanpi Suu nih tawn a duh nain, TS le MAH nih hnahchuahnak an ngeih caah an duh lo. Kanpi Suu cu a fimza mi asi caah voi 2 tiang Rallokap nih an tei khawh lo. Amah ruangah NLD nih teinak kan hmuh zungzal ve. Amah kanpi Suu um hlah sehlaw, NLD lawng in teinak hmuh khawh asi lo. Rallokap hi Kanpi Suu loin, NLD siseh, NUG siseh tei ci asi lo. Cutin ka ti tikah, Kanpi Suu tuah mi vialte ahman dih, adik viar ka ti nak si lo. Dawtnak ahngalh lo tuk mi Rallokap minung hna nih theihhngalh ve hna seh ti ka duh bia asi. Thein Sein aza tuk ati tu pa Dr. Andrew te pawl nih hngalh ve hna seh ti ka duh caah, mah ti in Kanpi Suu hi ka cuaithlir I asi, ka theih thiam uh.

Kanpi Suu a palh mi cu amah le pumpak miak nak le hlawk nak caah aapalh mi asi lo. Cu ruangah MAH nih Kanpi Suu cu a huat tuk in a rem ti lo. Ka tei khawh ti lailo ti a hngalh caah I pheh thuh khawh ti loin uknak an kan chut law law. Kanpi Suu a um ti lo hnu cun NLD tei kan fawi ngai kha a hngalh ve mi MAH asi. A zer bak mi asi. 2008 Phunghrampi ah a ṭhu ko mi MAH cu duh paoh tuahnak nawl an pek ko nain, a thluak nih a phan lo caah, atuah khawh mi a um ti lo caah Anaa a lak law law hi asi. Uknak lak tham cu a fawi tuk 8888 lio bantuk asi ko lai tiah MAH nih atuak ning cu asi. IT chan kan phan hi a philh sual. Mipi hlen khawh kan si tilo ti kha a hngalh lo. Democracy Thawtnam nak a tep cang mai GZ rual nih MAH uknak chut cu an I fak sak tuk lawmmam. Mino hna fimthiamnak kha a zawmtai sual. Mino hna zeirel loin aum sual. Cucaah mino hna nih chuaknak lam umti loin, a lamkip in alam an phi kanh dih cang. Kawlram ah MAH cohlan tu hi an tlawm tuk. Anmit an chinh I a cohlan tu ansi. Nain an tlawm te. 1% lawng an si lai.

Ram Mipi nih MAH kan cohlan ti lo. Amah a cohlan tu tampi zong, Rallokap ralhrang an si ning le an thluak chiat ning kha an hngalh dih cang I, an cohlan duh ti hna lo. Ramchung ah cohlan tu cu pelte an um rih nain Ramdang cohlan tu cu an um khawh ve ti lo. MAH a hlen khawh mi; amah MAH he aa lawh mi Tuluk el Russia tbk lawng nih hnarcheu in an cohlan. International el Rampi Ramkhel kong ah MAH cu athih cikcek cang. Dotla mi asi khawh ti lo. Raldohnak lei ah thazang a der kan ti nak cu EROs nih an cohlan ti lo. Uknak le ti ah, zalen tein uknak aa merh khawh lo.

Abik in, Siang Inn Saya/ma te le Siizung rianṭuan tu Dr te, Nurse te le sii lei rianṭuan tu hna nih MAH cu a hrawm an dit I amit lawng ai tar hur ko. Rampi pakhat ah abiapi bik mi Fimcawnnak le Ngandamnak zung aa merh khawh lomi cu thih asi ko. CDM cu aphun phun in a lem soi hna. A tlerh hna. CDF le PDF zong cu tho tho, a lem hna, a tlerh khon hna, EORs hna cu ningzak hngalh loin PEACE kan tuah hna lai tiah amah nawl tein a auh hna. PEACE kan tuah lai ati nain, a peace lo chin chin, Hmunhma hip aa zuam, a ti khawh hlei lo. Helicopter le Jet Fighters in minung le khua he a kah hna. CDF le PDF um lo zong ah a kah hna. Raldoh lo zong ah Khua mi a kah hna, anmah Rallokap lawng in an ti khawh ti lo caah Russia Pilot nih an bawmh hna. Ramri an hngalh lo caah Thailand an kah sual. An pah nak khua vialte mei an duah dih, an ruah nak in mikip an tlaih hna, an hrem hna, an hremthat hna, thong an thlak hna, an nung in mei an duah hna, an nung in an hngawng an tan hna, Aruang cu chuak nak lam a hngalh tilo mi MAH asi caah asi.

Ram Mipi le kan ralkap rual nih tu kan dirhhmun ah kan um khawh zungzal ah cun: arau hlan ah thil aa thlen lai tiah ka zumh bak ko. Hmai kan nawr khawh deuh ahcun; kan thluk hrim hrim cang. Aruang cu Rallokap nih biaruah ding in an kan sawm leng mang cang. Thantlang Khua Nupa in hlenh an kan timh cang. Tuluk le ASEAN nih NUG he biaruah ding in an fawrh cang. Hi hi asi khawh ahcun; Kawl ram ningpi in arau hlan ah aathlen bak ko lai. A si khawh lo ahcun Hnarcheu lawng aa thlen ve lai. Asi lo ahcun: MAH maw an thah? Ralbawi le Luban zik pakhat khat maw an thah, zoh te uh a ra ko lai. MAH cu a Ngandamnak a ṭha lo tiah adang in an thlen khawh mi zong asi. Limhang zawr loin Sr. Gen Saw Maung Bantukin, Pension an pek khawh mi asi. U Than Shwe anung rih caah amah nih a tuah ter hna lai. Ka lungdong tuk a ti tu mipi hna nan um caah lungdong ding asi lo tiah lehnak caah hi capar hi ka ṭial mi asi. Dohthlennak hi nan tei deng maw, a sau lai maw tiah biahal tu hna lehnak zong asi chih. Cucaah Dohthlennak cu na duh siseh, na duh lo zong ah siseh, tuah ding ah na rian le ka rian asi. Chuahpi rian cio asi.

MAH cu alam apit dih cang caah CDM, Mipi le CDF PDF nih a hrawm kan dit cang. A zang hngawng ah kan ke in kan lamh chih cang, theory in cun. CDM zong thih lo in nan thaw I hrim ṭhan cang uh. CDF PDF LDF UG hna nih a kaa kip le hmunkip in an namh I an deh cuah mah cang. Kan Hero rual an herh bau mi bawmhchan lawng hi mipi kan rian nganbik asi cang. Kaa lawng si ti loin, kan bawmh hrim hna a herh cang. Mah le khap tawk tein, kan ti khawh tawk cio tein, mah le pahrang cio in CDF le mipi kan ralkap cu bung hnawh cang hna usih. TEINAK nih an kan hngak ko. Kanmah nih TEINAK kan hngak ti lai lo. Amah TEINAK tu nih an kan hngak cang.Credt-Zingtincuai Cinzah

Kan ithawh deng ah khin khuami pakhat nih a rak tli I arti pumhnih lampi ah va ding te tiah a ka pek Chinland Army Kalaymyo