Hi bantuk Ka Nupi Umtu Ning Hi Ka Ngaihthiam Ah Tha Law Maw?

Ka Nupi Hi Ka Ngaithiam Lai Maw, Zeitin Dah Ka Tuahlai, Zaangfah Tein Hi Ka Ca A Relmi Nih Rak Ka Bawm Ding In Kan Nawl Duh Hna: Kan Nu he hin 2006 lio ahkhan ai nei mi kan si. kan khua i sianginn pakhat ah ca chim rian a ttuan mi kan si ve ve i kumhnih chung hrawng kan i duh hnu ah nu le pa theihpi naak le, ttha tein man zong i manh in Biakinn ah Pastor thlacam piak naak in kutsih lehthah tein ai nei mi kan si.

Kan nu hi kan khua nu ahcun nungak fel bik tiah an chim thiam mi a si i, kan i neih hnu zongah hin nu le pa chungkhat dawt le tlaihchan a thiam mi le, pasal le caah zumhtlaak mi le pasal le upat ttihzah dawt zia a thiam tuk mi zong a si. Kan i neih naak kumcheu a tling cang nain naute kan nei kho rih loh i, kan hawile nih nau an hun neih hin kan pahnih in naute ngeih zawk zawk cu kan duh tuk nain thla zong kan cam lengmang nain kan nei kho rih loh.

Kan pawcawm naak bik sianginn ca chimh rian cu kan contact a dih caah kan pahnih cun rian ngei loin kan um i kan lungre a thei ngai, Kei tu cu cachimh rian cu ka sawk tthan i vaantthat ah Middle school ah cachimh rian cu ka ngah tthan i kan nupa in kan i lawm tak tak. Thlathum hrawng ka ttuan hnu ah cachimtu saya sayama te cu kan rianttuan naak hmun khua dang dang ah thawn cio ding ti si i duh le duh lo zongah cunglei nih an kan chiah naak poh ah va um a hau cang.

kei zong cu kan khua pawng khuate pakhat ah an ka tthial i cu ka cun ka va um i ka chung le cu thlakhat ah a tam bik voihnih hlei ka tlawng kho hna lo, cu hmanh ah zarhteni le Pathian ni lawng hi dinh caan a si caah Zarhteni zing te in ka tlung i Pathianni zaanlei pumh dih in ka umnaak ahcun ka kir tthan tawn.

Kan umnaak khua ahcun sianginn cachim sayama no nawn te khuadang in an rak tthial mi pakhat a um ve i, hmunkhat ah rianttuan mi kan si caah kan i komh in kan i tlaihchan ngai. Tlangval komh tein a ka komh caah nupi ngei mi ka si cu ka thuh i a sinah cun tlangval um cun ka um i kan nu nih ka caah zumh tlaak tein le, keimah ngai in khua a rak sak i a caan a rak hman lio ah kei cu ka umnaak ahcun a thli in nungak ka rak ngei i, ka thinlung chung cun a nuam ka rak ti ve hlei lo.

Cu ka khua i kumkhat hrawng kan um tik ah ka nungak nih cun a ka duh tuk cang i voikhat cu nupi caah hin na ka duh tak tak maw, na fa pawi ning law na ka tthi duh lai maw tiah bia a ka hal i, a ruah zong i ruat lem loin fawi tein nupi caah kan duh tuk zeiti na si poh ah ka nupi caah kan tthit hrim lai tiah bia ka kamh hnu ah kapahnih cun zaankhat cu ka inn ah kan riak tti i kan tuah lo ding mi thil vialte kan tuah dih.

Sianginn kharpi zong a hung nai thluahmah cang i kan khua lei ah tlun i ka chungkhar sinah khuasak lai kai ngeih tuk lio ah, ka nungak nu cu a umdaan a hmaan lo i, luak chuah le, thil rim huat ti bantuk a neih caah nau ka pawi ko lai kai zohter a hau tiin a rak ka chimh i, a thli tein an sibawinu sinah cun kan i zohter i naute thlathum mi cu a rak pawi diam ai. Sibawinu nihcun nan mah pahnih hi nuva maw nan si, a si lo ah ai uar lio mi dah nan si, nan naute hi hrawh nan duh a si ahcun a tu hi a caan a tlai rihlo, nan hrawh khawh lio a si tiah a kan hal i.

ka nungak nihcun siibawinu cu kan hrawk lialo, sianginn khar hin ai nei cawlh ding kan si tiah a chimh i, keimah zong bia ka chim ve lai tiin ka ka vun aan ah ka nungak mithmai panh le ka cungah zumhnaak a neih tuk ning cu ka hmuh tik ah ka biachim ding cu ka chim tthan lo i, a herhmi sii a kan pek hnu ah hi hnu ni 15 hnu ah nan rak ra tthan te lai a kan ti i kan lawi tthan.

Nau kan pawi ti ka theih hnu cun ka um daan hi ai dang viar i, zeitluk in kai chir zongah chir saan a tlai ti fawn loh. Zarhteni ah kan khua ahcun ka tlung i a thli in ka nupi sinah tlung loin ka nu le ka pa sinah ka va tlung i, ka nu le ka pa cu thil sining cu fiang tein ka chimh hna tik ahcun an nih nih cun zei si hmanh ah thil a siding cu a si viar cang i, na nupi hi a tu i na chimhlo zongah a hnu ah na mual a pho tthiam tthiam lai, cu caah a tu ahhin kan pahnih in kan in zulh lai i nan nu cu thil sining a dik ning tein kan chimh a hau tiah an ka ti.

Ka nu le ka pa he cun kan inn ahcun kan va kal i kan nu cu a lau tuk, ka tlung lai ti zong ka chimh ta lo caah zeidah cang kan pa ruahlo piin thawng zong thanh ta loin na rak tlun tiah a ka hal i, kei cu a holh zong ka holh ngam lo i ka mithmai zong a panh kho lo. Ka Nu le ka Pa nihcun kan nu cu thil sining cu fiang tein pakhat hmanh thup loin an chimh dih tik ahcun kan nu cu a holh hmanh a holh kho lo i, mitthli tla buin ka khup ai tlaih i kan pa hi bantuk in na um lai ti cu a ruah zong ka ruah bal ttung lo tiin ngaihchia lungkuai in a ttap.

A si nain ka dawt tuk ti hi ai fian caah i tthen ding tiang cun khua a ruat lo i, ttha tein ngaithiam ka hal i a ka ngaihthiam ve. Zarhtezaan cu ka riak i a thaizing zaanlei ah kan nu nih cun a ka thlah i ka ungak nau a pawi mi cu ttha tein nupi ngei cia ka si i kan tthi kho lai lo, nau na pawi man cu cawi ding nan kan ti mi poh kan cawi ko lai tiin ka nupi le ka nu le ka pa nihcun bia an ka rawnh ta hnu ah ka umnaak khua ahcun ka kir tthan.

Ka nungak nihcun khua ka phaan ti a theih ve tein ka inn ah a rak raa i, tuni cu na tlun a tuan ko ee na ka ngai pah i si bak lai tiah ka pawng ahcun a rak tthu, zeiti biahram vun thawk daan zong ka thiam lo i, ka um daan le ka mithmai ai dan caah ka nungak nihcun ziah cu ti cun na um cuhlaan bantuk in na mithmai a panh lo ee, nan khua ah harsatnaak maw na ton, na nu le na pa na chungle an dam maw tiah a ka hal.

Ka nungak cu ka chimh ding mi bia hi a ca hrangah a faak tuk ding mi bia a si caah ka zaang a faak tuk i ka holh kho lo, kai sum tuk nain ka mitthli tlaak ai tim. Ka nungak nihcun ai tuar kho ti lo i na chim duh mi a um ko, zeihmanh thup lo tein ka chim ko, na ca hrangah tuar a herh mi cu ka tuar huam ko lai ka chim ko tiah a ka ti i, thil sining cu fiang tein ka chimh, nupi ngei cia ka si naak cu fiang tein ka chimh.

A si nain nangmah kan hmuh khan nangmah sinah duhdawtnaak in ka khat liam i, nupi ngei cia ka si kan chimh cun na ka kom duh lai lo ti ka phaan caah tihin na cungah khua ka sak naak a si, tiin ka chimh i a mah zong lungkuai tuk in a ttap i, nupi caah kan tthit hrim hrim lai tiin bia na ka kamh caah dakaw na cungah tikhan ka um ngam i nau zong ka pawi naak hi a si, a si nain a tu ahcun na sining fiang tein na ka chimh i kailom.

Keimah ka hruh tuk caah ka rak in zumh i tlangval ah ka rak in ruah caah a si, kai chir len zongah saan a tlai ti hlei lo, na nupi a lungfahter ding hi keimah he kai tahchunh tik ah ka ruat kho lo, cu caah tuni thawk cun kan thlah ve ko lai e tiin a mitthli heka inn cun a ka lawi taak i, kei zong chim ding zeihmanh ka thei kho lo, ka zaang a faak tuk ve ko nain an pahnih cun thim awk le a tthat lo caah ka nungak cu ka zaangfah tuk bu cun ka tthen.

Sianginn khar a hung si i, ka nungak cu an khua hmanh ah a tlung ngam lo i, a rianttuan naak ahcun a um rih. Kei cu khua ahcun ka tlung i, ka nu le ka pa nih ka rianttuan naak khua cu minung dang he i thleng dingin kan pu le sinah an ka nawl piak caah ka umnaak khua ahcun midang an chiah hna i kei tu cu khuadang ah an ka tthial tthan. Thla 6 hnu ah ka nungak tthing cu nau a nei i fapa te a neih.

Nau a nei ti kan theih in ka nu le ka pa cu an va kal i nau a neih manh, tupa te a neih piak hna man cu Sia pakhat le, phaisa ting 14 in thupha an va cawi. Kan nu he cun nau kan pawi ve cang i naute cu kan hung nei i Nute kan ngeih, kan nu nih cun fapa neih a duh tuk nain fanu te kan ngeih caah a thinlung chung te cun ai lom lo ziar nain, kan neih tthan tik cu fapa te kan neih cang lai tiin ka hnemh caah a thinlung cu ai nuam tthan.

Kan nu nih fapa neih a duh naak cu midang sinah fapa ka neih caah cu cu a hnahchuah ruangah a rak si. Kan naute kum khat le cheu a tlin ahhin kan pawi tthan i, tutan cu fapa te si ding hrim in tiin kan pahnih cun thla kan cam tawn. Cu lioah cun khuadang i ka fapa cu a nu nih zeiti a si hmanh ah kei cu ka hngakchia tuk rih i pasal dang zong ka ngei lai lo tiin chim khawh a si lo caah na fapa hi nan mah sinah um sehlaw a hmailei caah thil ttha a si deuh lai tiin a kan ti caah ka nu le ka pa nih ka fapa cu an va laak.

Kan nu nih hin ka fapa cu a mah fa tak tak a fapa bantuk in a dawt i kan fanu he hin thleidan naak pakhat hmanh a ngei loh. A si nain naute kan hung nei tthan i fapa te kan nei cang lai tiah kan i ngeih tuk lio ah fanu te kan hrin tthan. Cu hnu cun kan nu cu ka cungah ai lom kho ti lo i, kan fanu hna le ka fapa cu nichiar in a tahchunh hna i, ka fapa cu a daw kho ti loh, a si nain khua chung le mi sinah cun ka fapa a remlo naak le a hnahchuah naak cu a langhter bal lo.

Cu ti ka fapa a rem loh ti ka theih caah a pi le a pu sinah kan umter, khuadang ahcun ca cu ka chim tthan i, a tu ka umnaak hi cu kan khua he ai neih mi te a si caah zarhkhat ah voikhat hi cu ka rak tlung kho peng cang. Fanu pahnih kan ngeih cang caah kan nu cu fapawi a duh ti lo i, a um ning ai dang i zukhnawm pakhat hmanh a tawng bal lo mi a si nain ka fahniang kum thum a tlin ahhin Beer din a hmang i, mi inn ah va len i zu va din le mi inn ah va riah hna a hmang tiah ka nu le ka pa nih an ka chimh pinah, ka fanu upa u kum 6 nih hin a ka chimh tawn.

Ka nupi hi ka cungah ai cenet lo i phuba laak a duh caah hi ti a um hi a si tiin ka ruah i, a hnu ahcun a lungfim lai i ai chir lai i a ttha tthan te ko lai tiin ka nu le ka pa cu ka chimh hna. Caan a hung rau deuh deuh i kan nu cu a um daan a over chin lengmang, fale zawnruah zong a hngal ti lo i, fapa neih lawng ka duh fanu cu ka duh lo tiin a fale zong a rak hrocer lengmang hna, cu pinah a zu din naak ah tlangval a ngei ti zong mi sinin ka theih fawn.

Ka tlun caan i ka sik ahhin nangmah pei a hramthawk tu cu na si ko cu, nangmah nih pei na ka phohpian taak i midang sinah cun fapa na hrin cu, kei cu fapa hmanh na ka hrin piak khawh ttung lo tiin a ka leh i khua ka ruah tik ah a chim mi cu a dik mi a si fawn i, keimah tu mawh kai puh i, kan nu cu ka dawt tuk caah tthen le ka siang fawn lo, kan fale zong nih a nu cu an ttih cang i ka va tlun caan ahhin ka pa kan kal taak ti hlah tiin an ka tlaih tawn.

ka fanu upa deuh nihcun ka pa na umlo cun ka nu nih a kan vah taak i mi inn ah a kan riah taak peng, a rak lawi in a kan vuak i rawl zong a kan pe duhlo tiin ka fanu pahnih nihcun an ttah bu cun kal hi an ka thloh tawn. A si nain ka kal lo ahcun riandang zeihmanh kan ngeih lo caah ei awk a ngei lo ding kan si fawn caah kan sia rem lo bu cun ka rianttuan naak lei ahcun ka fale cu ka kal taal tthan hna i, sianginn khar a si deng cang tiin ka hnemh tawn hna.

Voikhat cu ka nu le ka pa nih nan nu hi tlangval pakhat lawng hmanh si loin tlangval tamtuk sinah an phohpian/uire taak cang hih, puitling na si cang i nan chungkhar kongah hin i thlaak kan duh hrim lo nain nan nu um daan hi a luan tuk lawmmaam cang, a phohpian hmasa tu cu nangmah na si nain ttha tein an ngeihthiam mi na si.

A si nain a  tu ah hi ti na cungah phuba laak in zu le tlang he a um hi cu khua na ruah tak tak a hau cang tiin an ka chimh i, tlangval dang dang he an i komh ti cu ka hawile sin zong in ka theih caah sianginn kan khar cun kan nu cu ttha tein ka chimh i keimah ka rak palh hmasa i a si nain a tu ah cun na ka ngeihthiam caah fel tein ka um cang.

A si nain nang cu tlangval pakhat cung lawng hmanh ah si loin mi dang dang na komh hna i cu caah kei nih cun kan chuah taak cang lai tiin ka chimh i, na duh cun i tthen ko sih a ka ti ve caah ka thil cu kai tim i, ka fanu le pahnih nih a nu sin um cu an huam lo caah keimah sinah an ka zulh i ka nu le ka pa le ka fapa sinah cun kan i fonh i kan nu cu inn ah a mah lawng kan chuah taak.

Thla hnih khat chung hrawng cu a mah lawng cu a um i tlangval kip he an ding an ei an i nuam hna. A si nain phaisa hman awk zeihmanh a ngeih ti lo caah a nu le a pa sinah ai fonh ve. A nu le pa sinah thla khat chung hrawng a um hnu ah a nu le pa sinah cun kai chir tuk tiin a fale hna le keimah sinah cun ngaihthiam ka hal piak u law an sin ah rak ka chia uh tiin zingzaan in a buai hnawh hna caah, a nu le a pa nihcun an ningzah bu piin kan sinah cun an rak chiah.

Kei mah zong nih kan nu cu i chir seh law, a nun hlun vialte cu kal taak sehlaw ngaihthiam rak ka hal seh ti cu ka lungthli te cun ka rak duh ziar ve mi hi a si ve tthiam nain, ka nu le ka pa sinah ruahnaak ka hal hna, an nih nih cun nangmah na rak palh hmasa i a si nain an ngaihthiam i a tu ahcun fel tein na um cang.

Na nupi tu cu na cungah phuba a laa i zu he pa he khua asa i, pa pakhat lawng hmanh si loin pa kip a komh hna ai riah pi hna, hi hnu ah ngaihthiam an hal i nang zong puitling lungfim, fa zong pathum ngei mi na si cang i, na ngaihthiam khawh le khawhlo cu nan mah nawl nangmah cungah a um ko tiin an ka leh.

Ka hawile sinah ka kal, ruahnaak ka hal hna, nan nu cu na ngaihthiam khawh ahcun na fale ca zongah a ttha mi a si i, chungkhar i tthek lo tein khuasaktti cu thil ttha bik mi a si ko, nan fale zong pasal an neih tik ah nu le pa sin tein an pasal le inn ah chuahter kha a ttha tuk ding mi a si nain, Nu hi zu he pa he nuamh a cen cang mi cu an nun hi i thlen khawh tak tak hi a har ngai mi a si i, nangmah thu si ko nangmah tein i ruat ko tiah an ka leh ve.

Kan nu hi a nu le pa sin ai tthial hnu thlakhat chung cu zu zong a ding ti lo i, pa zong pakhat hmanh a komh ti hna lo ti cu a nu le pa sin in ka theihh pin ah keimah zong nih fiang tein ka hngalh mi a si, a si nain a tutiang hi zeitin biachah awk le ruah awk hi hngalhthiam a har tak tak.

Cu caah hi ka ca a reltu hna lakah hin hi bantuk thil lei ah hngalhthiam naak a ngei khun mi zong nan um hrim lai ti hi ka zumh caah, hi ca ka ttial mi hi ka nupi le a chungle zong nih an theih le an hmuh zong ka zumh ko nain zei ti si hmanh ah kan mual cu a pho i a pho daidua cang ko i, Mipi nan sinah kan ton mi thil kongah hin nan ruahnaak, nan bomhnaak ka rak in hal hna hi a si, kailom.Credit-Timeofchingerald

Be the first to comment

Leave a Reply

Your email address will not be published.


*