Kalay PDF chungtel kan Lainu Minung 9 Cu Kawl ralhrang nih a faakbik hremnak an pek hna – Thawngpang Dik Thanh Hna Usih


November 29, 2022 Sagaing ramthen, Kalay peng PDF sungtel nunau sii ralkap 9 pawl cu tuikum October thla ah Kalay thawnginn sungih thuthennak zung ihsin kum 12 ciar thawng tlak dingah thu thencatsaknak an nei tiah thawnginn thawn a naiaw tu le PDF sungtel pawl in an sim.

An zate hin kawlram ralhrang in thuneihnak an long hnu hriamhrei kai ih dothlengnak a sosang zet caan 2021 kum November 16 ni ah kaih an tuar mi a si ih Kalay thawnginn ih an ret hnu ah ralkap sungih thuhla sosang dingin cangvaihnak an neih ruangah tin Section 505 (a) le tharum hmang ih cangvaihnak an nei tiin Section 50 (j) thawn taza cuai an tuar a si.

Kalay thawngin sung thuthennak zung ihsin kumkhat zikte thusut le dawpnak an neih hnu ah tuikum October thla ah an za ten kum 12 ciar thawngtlak dingin thuthensaknak an tuar tiah tuanvo nei PDF mipi ralkap pakhat cun a si.

“Section 505(a) thawn kum 2, tharum hmang ih cangvaihnak timi thawn kum 10 ti in a si ih a zate kom kum 12 ciar thuthennak an neihsak mi a si. Thawnginn sung ah an harhdamnak a tha tiah kan thei. Thawnginn sung ah an fial mi pawl an tuan rero. Cet khal an thit ter tiah kan thei” tin tuanvo nei PDF pakhat cun a sim.

An nih hi hnatuan le thawngtlak kom ih thuthensak mi an si lo nan thawnginn ah hna a tuan ter ti khal in PDF ralkap pakhat cun a sim bet.

Kaihkhih a tong mi nunau sii ralkap pawl hi Chin miphun mi si in Mang Lun Dim, Ngiang Don Cin, Mal Sawm Dawngi, Lal Tan Luaii, Zam Zo Zam, Lal Lun Sangi, Lal Muan Kimi, Van Lal Rawni le Lal Piang Feli pawl an si ih an zaten kum 20 kiangkap khukthi hlir an si.

Hi nunau pawl hi thu sut le dawpak ah thla 5 rei lai ralkap pawl ih sut le dawp an tuar ih cui caan sung hmuahhmuah pehtlaih an theih loh lawlaw a si tiah Lal Tan Luaii ih sungkhat mi pakhat cun a sim.

Cui’ hnu ah pehtlaihnak mal lai an nei thei nan farah harsatnak, thawnginn lutnak caa hmuh harsatnak le a thup te ih thuthennak pawl ruangah October thla sung ziangtik ni bik ah thawngtlak dingin thu an thencat sak ti cu felfai ten an thei lo hlei ah thawnginn hnatuan pawl le Ukil pawl hnen ihsin thawng an thlak hnu thlakhat rei lawng ah thu thennak an nei sak ti an theih tiah Kalay peng PDF ih tuanvo nei pakhat cun a sim.

Dawp an tuar lai caan thla 5 sung cu a thi pang ding ti an phang zet ih tui hnu lam ah cun thla hnih voi khat thawnginn sungah ei inn le tul sam mi thilri pawl an va pek thei thu hmin lang duh lo Lal Tan Luaii ih sungkhat pakhat cun a sim.

“Kaihkhih an tong ihsin thla 5 hnu lawng ah kan pehtlaih thei. Cui caan sung hmuahhmuah cu an dawp nak ah an thleng tiah kan thei ih ka fanu te hi a thi zo maw? Ziangtin a um pei? A nungdam lai ko maw tiah nitin ka ruat. Ka aa zik theu si. A tu cu a tul mi hman ding thilri pawl thla hnih voi khat kan kuat thei. An suak ding ni kan cuan rero” tiah Lal Tan Luaii ih sungkhat pakhat cun a sim.

Lal Tan Luaii hrang ah Ukil hlang theinak le thuthensak an si lai ah va ngai theinak covo an ngah lo hlei ah thawnginn kum 12 sung thawngthlak dingin thu an thensaknak khal SAC lam in simtheihnak an nei lo ih social media par ih thuthang an hmuh hnu lawng ah an thei ti khal in a mah cun a sim bet.

A liam zo mi November 25 ni cu Numi pawl par ih tharumthawhnak dokalh ni a si nan SAC ralhrang in an kaihkhihmi Myanmar ram nunau 370 cu an thi ih, 3,385 kaihkhih an tuar hlei ah 127 in sualpi an tong tiah NUG ih Numi, mino le nauhak thawng pehpar ih tuantu ministry cun thuthannak a nei.

 

Chinram, Kalaymyo Le Gangaw Ah Mei A Rawk

Nyaungpinkyi(ညောင်ပင်ကြီး)-Chaungkulaing(ချောင်းကူးလိုင်း) 230KV electric meihri a cah ruangah Chinram, Kalaymyo le Gangaw hna ah November 28 zan in zan khuadei in mei a mit lai, tiah ṭuanvo ngeitu hna nih an langhter.

Electric meihri a cah ruangah Chin ramkulh chung Mindat, Matupi, Kanpetlet, Hakha, Falam, Gangaw pengkomh chung Htilin, Saw, Kyaukhtu, Pauk, Gangaw le Kalay pengkomh vialte hna ah mei an mit dih, tiah theih a si

 

 



Source link

Add a Comment

Your email address will not be published. Required fields are marked *