Kan Ar Zuat Mi A Zawt Tik Ah Zeidahnak Kan Zohkhenh Lai, Ar Zawtnak 2

Ar Zawtnak -2 ~ Kan hnu zerh ah Virus ruang ah a cang mi zawtnak kong kan rak ttial cang.
Tuzerh Bacteria ruang ah a cang mi ar zawtnak kong kan rak ttial tthan lai.Bacteria ruang ah a cang mi zawtnak pawl cu zawtnak a can ter mi Bacteria a rian ttuan ning zoh in damh khawh a si.

(1)Bacillary white Diarrhea (Ek raang zawtnak)
Salmonella Pullorum timi bacteria ruang ah a cang mi zawtnak a si.Hi zawtnak a can ah cun an ek a raang tawn caah ek raang zawtnak tiah an auh tawn. Ar pi in arfa sin aa chawn khawh bantuk in zawtnak ngei mi ar pakhat le pakhat naihniam tuk ruang zong ah aa chawn kho .

Zawtnak a ngei mi ar cu rawl ei ti lai lo, a ngawr lai ,a thaw chuah aa harh lai ,a ek a raang lai ii a ekchuah nak zawn ah ek raang pawl a taang lai , cun an pum chung um mi ti zong a zawr ter . Hi zawtnak cu arfa pawl nih an celh tawn lo ii an thi colh.

Sulphamerazine ,Furazolidone si lo le Clortetracycline pakhat poh an rawl ah cawh piak in siseh ,an ti ah cawhchih in siseh damh khawh a si.

(2)Fowl Typhoid
Salmonella gallinarum bacteria ruang ah a cang mi a si. Ar Ek raang zawtnak he palh a fawi ngai mi zawtnak a si.Ar pi in arfa sin ah siseh,ar a zaw mi pakhat le pakhat in siseh aa chawn tawn.

Zawtnak aa chawn mi ar cu rawl ei ti lo, an ek a hring (a caan ah a raang in ek ve) ,ngut,a pum chung a thi a zawr ii a taksa a rau lai.Acaan ah zei zawtnak a ruang lang ta loin ruah lopin a thi kho.

(3)Paratyphoid
Salmonella enteritidis Bacteria ruang ah a cang mi zawtnak a si . Mah bacteria cu vawlei ah siseh,ti ah siseh, a rawl ah siseh caan saupi a nung kho.Cucaah zawtnak a ngei mi ar pakhat le pakhat a neihniam ruang ah siseh,ar zawtnak a rak um bal nak hmun ah ar zuat tthan ah siseh,ar rawl,ar zuat nak hman mi thilri pawl in siseh aa chawn kho.

Zawtnak a ngei mi Ar fa pawl cu um sawh zong ah an baa lai,a chung thlet lai, an mit au a har lai ii arhmul a buar lai.Mit phin ,thahri thih tbk a cang kho.

(4)Ecoli
Escherichia coli Bacteria ruang ah a cang mi zawtnak a si. Escheria coli Bacteria hi minung kan ril zong ah a um tawn mi a si. E.coli Bacteria chung ah a phun tam pi um ii mah lak ah cheukhat cu zawtnak a chuah ter/har nak a pe kho.

A lum tuk,a kih tuk,a inn aa thurhnawm nak , thli lut chuak a that lo ,ek haw ah a tel mi pneumonia tam tuk nak,an rawl ei nak i zat lo ,an i tet tuk tbk ruang ah zawtnak a chuah ter a fawi.An thaw chuahnak ah a cang tawn mi zawtnak phunkhat a can tik ah hi zawtnak hi fawi ten a rak lut tawn ve .Aa chawn zong a fawi ngai mi zawtnak a si .

E.coli Bacteria ar pum chung a luh nak hmun nih ngeih in an zawtnak a langh daan a dang cio.Ril phin,ril ah um mi thahri rawh ,artit aa ser nak phin, a kut le a ke phin tbk in aa dang cio .

(5)Fowl Chlora
Pasteurella Multocida ruang ah a cang mi a si. Serotype phun 16 a um .Zawtnak ngei mi sin in siseh,zawtnak um nak hmun in a ra mi minung kan thil puan in siseh, rungrul/tho hna in siseh ,thli in siseh zawtnak aa chawn kho.

A zual mi cu zawtnak aa chawn le cang kain a thi colh kho.A zual tuk lo mi cu a ngor lai,rawl ei lai lo , a ka in a buan pawl chuak lai ,a hmai a rau lai , a thaw chuah aa harh lai ,zawtnak aa chawn ka ah a ek a raang lai ii a hnu ah duhsah in a hring lai ii khak bantuk tete aa tel lai.A zual lo bik mi zawtnak aa chawn mi ar cu caan saupi an pum ah um lai ii an hmai hrawng a phing lai , a hak lai ,an hngawng a cei lai ,cheukhat ar cu an ke zong a phing chih lai .

Zawtnak khamh nak (Vaccine ) pek in khamh khawh a si.Antibiotics pek in zong damh khawh a si .

Credit~fidi_veterinary_supplies_and_service ah Satil ngandamnak lei le thlawpnak kong ah pehtlaih khawh peng kan si

Be the first to comment

Leave a Reply

Your email address will not be published.


*