Kan doh lawlaw lai maw, kan ngol lawlaw lai dah

Kan doh lawlaw lai maw, kan ngol lawlaw lai dah

Kannih cu miphun tlawmte taktak kan si caah miphun dang hna lak ahcun chiat kong si seh, ṭhat kong si seh, ai ṭhencheu thiam ding kan si lo.

Atu Kawlral dohnak caah kan fa kan naule miphun le ram a daw taktak tu hna an nunnak le thisen tampi an pek cang, mi cheukhat nih an pum cheubang an pek cang, cheukhat kut loin an um, cheukhat ke loin an um, cheukhat mit loin an um, hivialte hi Kawl ralhrang hna uknak chia chungin luatnak hmuh duhah nun ai pemi longte an si.

Ramdang khuasa kan miphun vialte nih it lo le ei loin thlanhriput in an ṭuannak nihlawh $ vialte hrinmi fale zawn hmanh ruat kho tiloin miphun le ram zawnruahnak he kan raldohnak caah tiin kuat cio tawn hna, ngei ruangah siloin ngeihlo chunte tiang kan raldohnak caah thawh lengmang cio tawn hna.

Kan fa kan naule miphun le ram caah ralhrang kutin a thimi vialte hna thlanchung ah an mitmu hmanh a tla rih lai lo, ralhrang kut in hliam a tuarmi kut lo le ke lo le mit loin siizung a phanmi cheukhat zong siizung hmanh in an chuak rih lo. Atu hrim zongah hin kan ralkap hna nih an doh cuahmah hna i cheukhat nih an nunnak tiang an pek cuahmah rih hi mu

Thantlang khua upa hna, zeitluk in dah Thantlang khua nan dawt timi kan hmuh hna tikah kan upat bak ve hna, mahbelte cu atu bantuk caan ah ralhrang he remnak tuahin anmah he Thantlang khua ser ṭhan nan i timhmi hi cu Thantlang khua nan dawt lung le nan sianlo lungin nan lung a rang deuh hrimhrim ko rua.

Nanmah nih ralhrang he remnak serin Thantlang khua remh ṭhan nan i timh taktak ko ahcun kan miphun ral a doh cuahmah mi kan ralkap CDF le CNA hna an zawn nan ruah ti hna lo bantuk a si caah kan ram tu hi nan buaiter chin lelam sual lai ti hi phang a um ngai.

Kannih cu miphun tlawmte taktak kan si caah lung ai rual lo awk kan ṭha lo, a doh naa, a rem naa cun kan si kho lai lo caah kan doh ahcun kan dihlak lawlaw in kan doh a herh i an tangdor ahcun kan dihlak lawlaw in an tangdor lawlaw a haumi kan si hna.Cred-Vanbik Sawmhal

Be the first to comment

Leave a Reply

Your email address will not be published.


*