Kan Dothlennak Hi A Tlawmbik Kum 5 Cu A Rau Lai

Kan dothlennak hi tuhnu a tlawm bik kum 5 cu a rau lai. NUG lei nih kan tei deng cang, tukum chung ah kan tei lai tiah an chim lengmang. Mipi tha thawhnak caah a si i a tha ve ko. Chim ding a si.

Kawl ralhrang le hriamtlai kar i kahnak ahhin thla 8 lebg a si cang. Thla 8 leng chung ah kan zoh tikah Kawl ralhrang hi an ba ngaingai ko cang. Mipi lei zong kan ba ngaingai cang fawn. NUG lei nih UN le vawlei cung ramkip ah fak piin an au mi zong a hung thahnem ngai ko cang. Vawlei cung ram tam deuh nihcun NUG kha cohlan cangmi a si nain vawlei ram zeimaw nih ralhrang a cohlang i a bawtu an tampi thiam rih.

Ralharng hi hriamnam bak in kan doh lai i kan tei lai ti kha a si cang. Kawl ralhrang cu cabuai cung ah biaruah an ngah ti lo. A kah bak in kah ve i ralhrang hi an cihmih bak an hau ti kha ruah cio mi le i timh ciomi a si cang.

Nihin tiang i kahnak ahhin zoh ulaw Tlangcung miphun ram hmanh ah hmunhma kan lak khawhnak a tlawm tuk rih. Myone tlawmpal cio kan lak khawhnak cu a um ko. Chin ramkulh ahhin Thangtlang peng khuate cu kan lak dih ngawt ko. Peng dang khuate kan lak khawh mi a tlawm ngai rih. Tlangcung dang cio zong ah cucu an si.

Hakha khuapi hna kan van lak khawh tik,Loikaw khuapi hna an van lak khawh tik, Sittwe khuapi le Myitkyina khuapi hna an van lak khawh tik ahhin kan ral hi kan tei deng cang hna timi hmuh khawh an si lai. Ram lak timi cu khuate in khuapi ah a kal hmasa tawn. Ramri in kan nawr lai i Nay Pyi Taw tiang kan nawr hna lai. Cuticun kan tei hna lai.

A tu ah Tlancung ram hi la kho dih hmanh usihlaw Kawlrawn khuapi pawl khi lak an har taktak rih lai. Khuapi cu ralkap nih fek tuk in an ven thiam rih lai. Mandalay le Yangon khuapi hlan ah Kalay khuapi, Sagaing khuapi dang tampi an tang rih hna. Mah vialte khuapi kan van lak khawh tik khi cu a tlawm bik tu hnu kum 5 cu a rau ko rih lai.

Hihi biasi phai a si lo. Kan raltuk hi a rau kho rihmi a si caah canrau ding in mipi nih timh tuahnak kan ngeih tu kha a herh mi a si. Kan ralzam hi a can sau lai, kan harnak can a sau lai caah zeitindah timhtuahnak kan ngeih lai timi hi a biapi ngaimi a si.

Be the first to comment

Leave a Reply

Your email address will not be published.


*