Kan Hruaitu Kan Pa Le Lih An Chimmi Hi Theihthiam Uh Ca

Tulio kan ram buainak kong ah le kan rankhel kong ah kan pa le hna nih lih bia an chim tawnmi hi a thei thiam lomi Chin mino tampi kan um hna. Mahhi hmanh kan theih thiam lomi hi cu kan thluak a rak niam tuk rih tinak kha a si ko.

Ral kong ahcun lih chim thiam a hau. Fake tampi ai tel a hau. CNF kan pa le lawng an si lo, tlangcung miphun hriamtlai hruaitu upa vialte lih an chim dih. A hmanmi tampi an chim bantuk in ral kong ahcun lih an chim dih. Vawlei cung ralkap nih cucu hriamnam pakhat ah an hmanmi a si.
Cheukhat Chin mino a hrut pah mi nih nan theih thiam lo caah Facebook online ah nan zai. Nan kaa lawng a si ko. Zei hmanh nan si lo. Cucu khakha kan tuah lai nan ti, ziah nan tuah ne lo ti bantuk in bia halnak tuah nan hmang. Khakha nan thluak a tlawm tuk caah a si.

Kan hnu ah Dr. Sui Khar nih Vaungrawnh hi biaruahnak ah Chin ramkulh cu biatak tein kan phomh ahcun zarh hnih ah kan lak khawh lai a ti. Cucu a rak chimmi si. Sinain nihin tiang Thantlang pakhat hmanh lak khawh a si lo.

CNF lei in ramleng biachimnak nawl ngeitu Pu Denial Sakhong nih palik le ralkap CDM ah lut uh. Tuanvo kan i lak hna lai. Ramthumnak zong ah kan in kalter hna lai tibantuk a chim. Nihin tiang CDM palik pakhat zong ramthumnak kalter a um lo. Mizoram mipi cawm chom in an um hna.

Dr. Sasa nih kan tei deng cang. Min Aung Hlaing cu ICC ah taza kan cuai lai. Tlaih a si lai. R2P kan auh lai i UN ralkap nih an tlaih lai tibantuk kha a rak chim lengmang. A taktak ah a cang kho ding phun a si lo.

NUG vuanci Dr. Lian Hmung Sakhong zong nih kan tei deng cang. Zubui mei can te lawng ai duh cang. Kawl ralkap ah khin kanmah lei tang tampi an um. Nan meithal kha Min Aung Hlaing hmai ah mer cang uh kan ti hna ahcun Min Aung Hlaing cu a dih ko lai tiah a rak chim tawn ve.

Chin mino cheukhat nih kan i fian ding mi cu ral kong ahcun lihchim a hau. A can ahcun lih chim a hau. Cucu kan ral nih kan tih hna seh, kan ral hi an lungdong seh tinak caah khan a si tawn.

Nan zumh ngaimi AA ralbawi Tun Myat Naing nih AA cu minung 30,000 kan si cang tiah nai ah a chim. Mah cu nan zumh ngai. Kha zong lih a si cuh. Ralkap nih kan tih hna seh kan ti ngam hna hlah seh ti khi a si. AA hriamtlai 30,000 an sinak ding lam hi a um lo. Wah hriamtlai hman 30,000 hrawng lawng an si.
KIA hruaitu zong nih an chim tawn. Kan duh ahcun Nay Pyi Taw le Mandalay khi KIO zungpi a si kho. Nay Pyi Taw le Mandalay khuapi zong khi a herh ahcun vutcam ah kan canter lai an ti. Cu zong cu lih a si cuh. An i hrocernak a si.

Raltuknak kong ah lih rang chimmi tete hi thei thiam uh. Fian i zuam uh. A herh ahcun Vanlong kahnak a deu hmanh hi tampi hun ding an si. Vawlei cung hriamnam ahhin a taktak si lomi a deu an chiah sawhsawh mi tampi a um tawn. Cucu kan ral hna an lungdonghnak ding caah hmanmi hriamnam pakhat a si ve. Ctedit: Cung Bawi Lian
Note: Midia dang nih copy in post chin lo ding. 

Be the first to comment

Leave a Reply

Your email address will not be published.


*