kan inn pawng ah CDF zuri pahnih an i chok len

Ka Mang le Dothlennak
Zingka ka thawh ah khua a durdawm, zingka in khua it lai bantukin in a um. Ka fanu a thawh rih lo caah ka umhar pin ah khua durdawm nih lunglen phun in a ka lak. Ka mang ah CDF zuri pahnih an i boxing lio le kan inn ka um lio ka manhmi kong ka ruat.

Minung lakah saram, saram lakah minung bantuk a simi ralhrang ruangah inn zuat satil hmanh nih an hngah ti lomi, loduah in an duahmi le hmangsom i an som cangmi, ralhrang ttih ah zuu hmanh nih thindomh bu in rawl a kawlnak le va hmanh nih aw thang deuh in an awnh ngam ti lonak Thantlang khua The Chin Post TV nih a hnubik video an tlakmi June 17 zantlai hnu ah ka zoh. Hngilh zai ka rel pah in kan dothlennak le Thantlang kong ka ruat. Khua ka ruahmi cu kai mangphanh.

Ka mang ah cun kan inn pawng ah CDF zuri pahnih an i chok len. Uniform an i hruk, Lai meithal le AK47 an i ken. Bia an i el ciammam i Kapa Khar (Bawi Hnem pa) innhmai ah an i vua. Kapa Khar he kan va tthen hna.

Hriamtlaimi chungin zu dingmi caah cun Paul nih Timote (Timothy) zudin ning a chimh phun deuh khan ceicer damnak ca deuh ah din ah a tha. Luan deuh in a dingmi kan um ahcun mah nunhimnak caah ttihnung a si cu chia rih u sih. Miphun hriamtlai an sinak le an hriamtlai hawidang mithmai a bitter pin ah mipi nih kan bochan hnanak a zor kho. Mipi nih kan bochan hnanak a zor ahcun kan dothlennak thazaang zong a zor ve ko lai.

Ka mang ah cun Thantlang kan inn ah ruah loin ka um. Kan inn ah a ummi cu kan tam ngai caah TABC civui lio khual ngeih phun khin hnokcur khin kan um i kan i nuam ngai hna.

Ralhrang kut tuar in May 23 ah khan kan inn zong vutcam ah ai cang ve. Kan dothlennak hi zeican a rauh lai kan thei lo, nain nikhatkhat cu a dih te ko lai. Vok le ar hmanh nih zanlei khuamuih zuahmah cun an riahruun an hlam. Nain, Thantlang mipi belte riaklangva bang riahruun hlam ding ngei ti loin zeican dek kan vahveih rih te lai.

Thantlang hi zeitindah sersiam than a si te hnga tibantuk ka ruat, nain kei te hna ruahphak khawh phun zong a si fawn lo. Chanpi@ Chan Khar nih ‘arhlei donh i thlapa lak i timh bantuk a si’ a timi bantuk kha ka si. ‘Hinak let 10 ttha in ka ser than lai’ tiah kan mifimthiam le kan pale cheukhat bia nih a ka hnemh, nain caan karlak khuasaknak ruah belte ahcun thaw a pit pah cang.

Dothlennak hi aho paoh nih dih zok seh ti kan duh. Kan tlanval no lioah van ti ve ko ninglaw kan hawipa Kawi Hmun @ Hmunlian Mualhaih nih key dang thleng ruam loin D key pakhat lawng bakin ‘Nunu aw kan dawtnak na hngal rua lo……” timi hla chuakput i a rak sak khawh tawn bantuk khan atu kan ngeihmi kan hriamnam te hin ralhrang hi daidup in tuah awk an tha fawn hoi lo.20/06/2022 credit-Hmunhmung

Be the first to comment

Leave a Reply

Your email address will not be published.


*