Kan ithawh deng ah khin khuami pakhat nih a rak tli I arti pumhnih lampi ah va ding te tiah a ka pek

Arti pum hnih:Ruah asur ngai. Cu bu I khualtlawn vun ithawh ding cu ka lung chung te in ka ngaihlah ziar.

Motor a ka khalh piak tu ka fapa kha kan motor hi a kal kho lai maw tiah ka hal tthan.
Akal kho ko lai, 4/4 asi pin ah a ke hi tire a ngan mi kan bunh mi asi I kan mah cu kan tang lem lai lo. A mah belte midang motor a tang mi an um ah cun kan mah zong kan kal kho hlei lai lo. Lam abi ngai le I kianh nak a um lo a ka ti.

I thawh phot ko kun usi kan ti. Kan ithawh deng ah khin khuami pakhat nih a rak tli I arti pumhnih lampi ah va ding te tiah a ka pek.An kawmtang arder ah a vun purh chom mi Lai arti asi.Kai lawm ngai na in ka lung a ttha lo. An mah an fa le hmanh ding lo le ei lo in keimah tu arti pek cu ka ti.

Voidang zong ah hika khua hi arti pek an hmang ngai. Khuachung kai chawh nak ah ar ti an rak ka pek tawn. Midawt an thiam bia le an siaherh nak le dawtnak an langhter nak asi caah asung lawi ngai tiah ka ruah.

Kan ithawh in ruah cu a sur lengmang I a han hei bal ti lo.Tlangpar lakphak dawr kan phak ah tan lo in lan ko us ikan ti.

Kan lanh hnik ah dawr nei tu nih a kut a zo I heh tiah a vun au. Kan lanh tak hnik hnu ah zeidah asi hnga tiah kan kir hnawh than.
Kal hlah u, nan lan kho lailo Motor nizan in pa hnih an itap tiah a kan ti.

Lungrawk ngai in e tiah kan I din.A pawng khuami kha motor nam ding ah cun nizan te khan an va auh cang hna an rak rat in motor cu an nam lai I cun nan kal te lai ti asi.

E tiah kan hngah.Ruah cu a han hlei ballo.Khuami zong cu an rak phan hlei bal ti lo. Phone in vun chonh ding ti ah le line a um lo.

Tuzan hrimhrim ah kan itinh nak hmun le phak a hau fawn.Ka si a vun vang pah hnik.Thlam nei tu nih khohsuai kan chuan piak hna lai ati. Zei ei hmanh ka lung ah a chuak lo. Ka fa le cu khohsuai cu an ei.

Tlawmpal ah ka rawl cu a vun ttam ve.
Zeidah ka ei hnga ka ti I ei ding zei kan nei fawn lo.Tlawmpal ah e motor chung ah tuzing I arti pum hnih an ka pek mi kha a um ko kha ta tiah ka va fuh.

Arti cu thlam chung I an meiphu te ah cun ka rawh/em. Ruahsur khuasih pah, mei pawng I vun tthut I arti ka vun em mi cu kai nuam ngai. Thlam nei tu nu a tthut nak ka rawlh mi zong cu kai phuhrung pah. Arti ka em lio cu ka fapa nih hman a ka thlak I a ka capo pah len.

Tlawmpal ah mipa pakhat ciar cikcek in ahung phan. Thlam disap tang a vun phanh ah cangvut a ke I a she tu pawl cu a vun thur pah len hna.
Mangkhong ka veng le a nenh lo, ruah nih a ka surh tuk a ti I thlam ah cun mei a hung to.
Kan si ning cu kan chimh I tlawmpal mei atoh ah khoi keimah khua ah cun va tli ning a ti I ruah sur lak ah cun a kal colh.

Tlawmpal ah khua mi tlangval pa ngaruk cu an hung phan.Motor a tan nak hmun cu kan phan I ka fa le tlangvel 3 le khuami tlangval pawl cu an I bawm I motor cu an nam. An chuah khawh hna.

Harnak can lio ah khuami tlang val hna, lo thlam ah ttha te in mei a kan toh ter I rawl le eidin an neih mi a kan ei din ter tu hna le mipi dih lak cung ah lunglawmh nak cim cawk lo he hi ca hi ka vun ttial.Kan doh mi ral hi ral sawhsawh an si lo. Ral hrang an si. Kan tei hrimhrim a hau mi asi.

Kan zapi a tu ning te in kan ttan tti ah cun Pathian nih teinak a kan pek hrimhrim lai.Credt-Chak Um Pa

Be the first to comment

Leave a Reply

Your email address will not be published.


*