Kannih cu mithiang kan si, vawlei sunparnak a kawl ding kan si lo.

Kannih cu mithiang kan si, vawlei sunparnak a kawl ding kan si lo…

A liamcia kum 15 hrawngah khan si rua ka ti. Ram chiahru Kawlram bantuk a phan bal lo phu kan sin an rak pha. Khrihfa kan zumhnak le biaknak ram kauhnak caah ti in maktaduai buu ngan pakhat i lu bik pa aa rak itel ve.

Kan Yangonpi cu an rak phan. Kawlram i minthang cem an timi Shwe Dagon pura hna a va phan ko rua khah.Rawldumnak an tuah i an sawmmi ah cun ka rak itel ve ai. Cu pa nihcun,

“Kawlram hi khuachia nih a domhtlaihmi ram a si,” a tongh ko. Khrihfa kan sinak ah a piangthar ai ti bal lomi kei nihcun, “Si reeng ko. Zei zawn ahkhin dah khuachia domhtlaihnak cu na hmuh?” tiah ka rak hal.

Yangon khuapi nan lam cung ai chokmi munung vialte nunnak le khuasak cawlcangh ning ka zoh tikah khin, “khuachia domhtlaihnak a si a fiang tuk” a ti.Cucu mi zapi hmai ah a rak chimmi a si. Mirang an tampi. Kawlram mi chungah biaknaklei pazaza an rak tampi ve.

“Toyota Hilux phun khi bus hmete phun ah an hman. A khaal nih cian taktak in a mongh. A hnulei ah zultu pate cu hni ai fenh. An motor hmete chung khual pawl cu phaisa a hal pah hna. Phaisa khi a hmur hna in a ceh, a tai ah ah cehmi a tam bik. Taliban tapung bantuk in an mileng phurhnak motor cianh le an umtuning ka zoh ahkhin, khuachia khuahrum nih a veen ve hrim hna ti khi ka hmuh khawh,” a rak ti.

Hei tuak ve hmanh. A chimmi a dik ngai cuh! Mi zapi kan ichawhlehnak ding i Kawlram khualipi cem YGN ah an hman tawnmi bus, dyna ti phun le hilux pawl kha.

US ramchung khuazei hmanh ah motor ka khal ngam ai titu hmanh nih Kawlram ah cun ka ngamh lai lo, an ti. An mawh lopi. Minung pei kan lawh fam lo cu, ti ding khi si.

Korean pawl hi a meih taktakmi miphun an si ve. Cozah nih 60 kmh kal ding an tinak ah 80-90 kmh in an kal. 100 kmh an ti ah cun, 120 kmh in an kal. 100 kmh in a cunglei na kal lai an tinak highway lebang ah cun, 150-160 kmh in an choi. Tennis ball tluk in an rang.

Cu pawl cu Kawlram an phan ciammam. Kan ṭih tuk, an ti dih ngawt. “Ziah?” ka ti hna le… “Myanmar tham ah cun, na kal ding lam caah riinmi zong an ifiang lo. Motor he seihka he, a phunphun in an icawh dih. Kan hnur kan pah dih hna lai lo maw?” ti si ko.

Mi ramdang i bus chiahru an hnon cangmi pawl a khaltu pawl khi an i-uah ve ning le an lor khawh ve ning. A bus chung i na to hnu cun, doctor na si le si lo zei ah a rel lai lo. A bawicem le siangpahrang bantuk an si. Thinzar Wintkyaw hmanh nih nawl a neih ngam hna lai loh!

Ramdang ah cun, servant ceo an hei si ko cu mu.

An bus le an hilux pawl cung cun, uukaang cung kawm reu phun khin an kan reu hna i kan kal duhnak hmun ah cun an kan kalpi. “Na zanglu, na bus khalh cian tuk, minung phurh in teh nan kan phurh” ti awk te an si. Cuti phun cun, vai ti sual ca. An in ṭumter colh lai i, “Taxi vai hlan…” an ti tongh lai.

Kawlram kan taxi pawl zong cu ramdang motor chiahru thlan chung hmanhah ai tlum ti lomi a thutheng motor ruak bantuk an tam.
Cuti te cun khua kan rak sa ko hna cu.

Vawleicung ahhin Buddhist ram paoh a ṭhangchomi ram an um rih lo ti awk a si. Tuluk rampi chungah Buddhist milu an tam cem. Nain, an milu dihlak he van tuakchun tikah, zei huaha an si lo.

Kawlram nakin Cambodia le Laos tbk hna ahkhin Buddhist milu zatuak cun an tam deuh.

Buddhist biaknak cu Kalaram in ai rak isem. Lih in a rak parmi pa a si. Kala nih pathian ah an cohlang duh ti lo i an hnon hnu ah Kawlram tepawl a rak phanhmi khi an si.

Japan, Korea le Tuluk ah Buddhist an tampi ve. Nain, Kawlram ta pawl he khin an ikhat lo. Annih cu, a thiannak le a nunzia dawhnak lawng ai cawnmi phu an si. Thai duhmi cu, Buddhist ram chuak Khrihfa miphun kan si hna.

Aung San hei ti, a fanu Pi Ci heiti pawl khi Buddhist sunparnak in ram ser a duhmi an si. Mah caah dahkaw, ka rem khawh hna lonak a si cu…. “Lai pastor mihrut rual” van ti awk te si naan.

Ruruhranghrang Min Aung Hlaing phun khi miphun caah ṭihnung an si leem lo. A neemnak in na ruh in na thlik tiang an hlanh kho dingmi fazer pawl tu khi ṭih an nung deuh.

Tikah, zeidah kan ikilvennak hriamnam hauhruang bik si kun lai?”Mithiang kan si. Jesuh nih a thimmi miphun ah kan itel kho ve cang!” Vawlei sunparnak caah buai leen awk si lo.

Kum khat nan van tlin khan cun, nan lungfiim cio ko cang seh! A herh lo sopawt le ruamkainak nihcun mah le mah tilzang ai cum bantuk dirhmun lam a kan chuahpi.

A hmete in a nganpi si khawhnak lam tu A Nung Pathian nih hmuh khawhnak mit in pe hram hna seh mu.”Zawng sopaw rual” tiah van beet ning law nan nii tuk hoi lai. Salai C. Alexander

Be the first to comment

Leave a Reply

Your email address will not be published.


*