Skip to content
Home » Kawl ralkap kan tei hna lai lo,Vuivai rih hlah u sih

Kawl ralkap kan tei hna lai lo,Vuivai rih hlah u sih

Nihin Falam le Hakha karlak ah an i kap cuahmah ti thawng ka van theih bak in chun nitlak ka riantuannak ah ka um siarem loin kan ralkap hna an rethei lai ning le an ralthatnak ka tuak i keimah tein ka mitthli ka thlak. Umnak inn ngei lo bang le nu le pa nih dawt ve lo bang, zei ruang thengte ah thih ding theih ko mi nunnak pakhat hi ui loin pek an sian hnga ti ka ruah, hriamnam tha hmanh ngeih loin miphun le ram caah an ralthatnak ksa ruah, cu lioah ralhrang an khamh khawh hna lo tiah kan soisel in kan vuivai le bia s ikan phai len mi online ah ka hmuh i keimah khi anmah dirhmun ah kaa umter i ka ngamh hnga lo mu tiin khua zaza ka ruat. Ramsa bang fingtlang kip an hrawn i, zan ih merem lo, rawl ei chungpil loin cangvat le fikfa lakah siangbah lai meithal te he zei tikah ka thih te lai ti tuak buin thlennak hnipuan hmanh ngei loin ram tlawngsa bang fingtlang kip an cul khi ka hei tuak i, misual caah nunnak petu Pathian bangin miphun le ram caah nunnak pe siangtu pasal/nusal hna upat lo awk an tha hrim lo mu tiin keimah tein bia za kaa ruah.

Ka lung ah a hung chuak mi cu Israel mi hna Izip sal an tannak in Moses nih a chuahpi hna lioah ramcar chungah an rawl a ttam i an ti a hal caah an phunzai i hi tlukin ramcar ah tuar nakin cun Izip ram ah sal ah tang in ei thaw kan ei kha kan duh deuh tiah an zai len. Nain Bawipa nih a dawt mi miphun hi mi sal ah tanter thai a kan duh bal lo. Nihin kan tuarnak ruangah cheukhat hna kan ngeichunh chawva dih in kan sakmi ruun inn a ciam dih theih tikah Kawl ralhrang kut tang um ko hmanh kha a rak ttha deuh tiah vuivaitu zong an um kho men ko hnga mu ti ka ruat. Kan ruun inn le chumtual mitthlam in van cuan tikah chungkhar tling lo kan um lai, innpa chakthlang kan i tthen hna tikah vaiui cu a fawi ko hnga. Israel mi zong luatnak an hmuh nakhnga caah ramcar ah harnak tampi an rak tuar ta ve. Cu bantukin kan luatnak ding caah harnak tuar ta zong hi Pathian nih zei tlukin dah an ka bochan ti a kan hneksak zong a si kho ko ti lei tu in kan ruah thiam hi a biapi ngai ka ti. Tulio kan dirhmun hi Israel miphun bangin rili kan tan i tanttim uak kan tan cang caah kan tan cia nak lei kir than awk kan ttha ti lo caah kan luatnak caah a dihdongh tiang kan tan lawlaw a hau cang bantuk a si.

Voikhat cu Moses nih Kanaan ram ngiathlaitu ah minung 12 a thlah hna i Kannan ram cu ramttha a si nain Anak miphun a tthawng mi an um pinah kulh hruang a si caah kan tei kho hna lai lo tiah minung 10 nih anmah lei sinak zoh in bia an chimh. Nain Joshua le Kaleb zong anmah hmuh mi bantukin an hmuh ve ko nain minung sinak zoh loin Bawipa kan cungah aaa lawmh ko ahcun kan tei ko hna lai kanmah kan rawl ah an cang lai an ti. Cucaah a chiatnak leiin a hmutu(minung sinak aa rinh mi) minung 10 cu Bawipa hmai ah rai in an thi tiah a ti. Cucaah nihin zongah kanmah minung lei sinak zoh si loin Pathian tthawnnak a zoh mi hna caah teinak hi a um ko ti hi kan theih a hau.

Cuaah Kawl ralkap kan tei hna lai lo, an thiamnak a sang deuh an hriamnam a tha deuh, Russia Pilot an hman hna tiin minung sinak lawngin a tuak mi Moses nih a thlahmi hna ram ngiattu 10 lakah aa tel ve mi ka si ti kan i theih a ttha. Minung kan tlawm deuh ko la ikan hriamnam a chia deuh ko lai nain Gideon le a kalkap teinak an hmuhnak cu minung thazang a si lo i hriamnam a si lo, thol lawng an den, meifar an van i muko an tumnak in teinak an hmuh, cucu khuaruahhar, a tthawng mi Pathian a sinak cu a si. Bawipa min put le Bawipa bochan le Bawipa nawlngei te in raldo mi an sungh bal lo. Cucaah nihin kan dohthlennak kan teinak ding hi kan minung thazang le hriamnam a si lai lo, Bawipa thawngin teinak kan hmuh lai ti ruahchannak he hmai a kal mi kan si tu hi a biapi bak mi a si.

Cucaah dawtmi miphun hawi hna, kan ralkap hna nih ralhrang kan duhning in an kan teipiak khawh lo ruangah maw vuivai lai ci, hriamnam tha ngei lo le raltuk cawnnak ngeih lo bakin dawtnak tak he miphun caah an i pekchanh ngam mi tu hi upatnak pe hna law, an thachiattertu si loin thazang petu si hram ko u sih. Nihin ah an kan tei ahcun thaizing ah tthawng chin in thazang chuah tthan ko u sih. Sungh kan duh lo nain minung phung a si ti zong ruah chih a hau. Kan miphun kawl sin phak nakcha in tiah nunthap in miphun kilventu an si ti kha theithiampiak an hau. Nihin maw ka thi lai thaizing ti hi an i theih cia mi a si ko nain siangbah lai meithal te he miphun dawtnak he raltha in an kal hi zei tluk upat tlak dah an si. Thih ding theih ko bu in an doh caah tuartu ca tu ah thla i campiak hna u sih law, nihin an kan tei deuh ahcun thaizing ah tam deuh in chawva thawh u sih law, ttang rih u sih. Kan sunghmi thilri ruangah, kan siang lomi kan mino hna nunnak a liam ruangah maw vuivai sual hna u sih, kan kalpi cuahmah mi kan lohma hi a dihdongh tiang vuivai loin kan kalpi ko ahcun Chin miphun hna hriamnam ttha ngei lo le minung thazang tel lo teinak kan hmuhnak thawngin teinak ngeitu Pathian a si kha vawlei pumpi nih an hmuh caan a phan te lai. Vuivai rih hlah u sih, lungrual in kan ti khawhnak, kan pahrang cio in lungkhat thinkhat in dihdongh tiang theipar hmunlhat ah zun tti dingin i zuam hram hna u sih.

Tu bantukin kan miphun nih har an tuar i thihnak le nunnak ri ah an um lioah Pathian nih an dawt i ramttha an phakter mi midang caah santlai le thathnemnak petu na si lo sual ahcun ka nung ko nain ka thi ti hi i theih u sih ti ka duh. Pathian khuakhan hi a ruang loin a si, ramttha kan phak hi Pathian nih zeidah a rak kan timhpiak mi a um caah a si ko ti kan theih ko ahcun hi tlukin kan khua, kan ram le kan miphun ah har tuar le nunthap in dirtu an um ko lioah kan chawva kan sian lo sual ahcun nikhat caankhat kan chawva hi kanmah ngaichiatnak a kan petu ah a cang te sual lai. Ramttha an phaktertu le nunnak le damnak an petu Pathian a si caah, Pahthian nih mission riantuan a kan fial, cucu tulio kan ram le miphun ah harsatnak tuarmi hna caah bawm dingin kan caantthat lio a si. Pathian nih ramttha an phakter i nunnak le damnak an pekmi hmangin Pathian pekmi Chinram le Chin mi caah na pek siang lo sual ahcun hakkau tukin naa khawn mi chawva hi an ttahtertu, ngaichiatnak an phortu ah an cang te lai. Cucaah thawhbur a tam e, CNA/ CNF,PDF/CNDF san an tlai lo e tin vuivai rih hlah.
Pathian tu nih teinak kan pe hram ko seh.Crdt- Salai Za Thawng

Kan ithawh deng ah khin khuami pakhat nih a rak tli I arti pumhnih lampi ah va ding te tiah a ka pek Chinland Army Kalaymyo