Kawlram Buainak Hi UN Le Vawlei Cung Ram Nih Zei Ah An Rel Ti Lo

Kawlram kong ahhin UN le vawlei cung ram dang hna nih zei ah an rel tuk ti lo.
Kawlram ah ralkap nih uknak an lak kaa hrawng ah khan cu vawlei cung ram dang le UN pawl zong an rak cawlcang ngai. US president Biden le UK Prime Minister hna zong nih bia an rak chim ngai.

Kawlram kong ah UN Security Council meeting zong voi tampi an rak tuah.
Sinain can a hung kal thluahmah tikah Kawlram kong ahhin vawlei cung ramdang hna le UN pawl zong an dai ngai cang. Kawlram kong ah a hlan bantuk in an cawlcang ti lo. A hlan bantuk in an holh an chimrel ti lo.

US le UN zong hi Ukraine le Russia kong ah an hun buai deuh cang. Covid zawtnak kong ah an buai deuh cang. Asean zong Kawlram kong ah a hun dai ngai cang.
Kawl ralkap nihhin uknak hi cansau pi an tlaih te ko lai tiin an ruah i vawlei cung ram pawl hna nih ralhrang pawl sin pehtlaihnak tuah ahhin a tha ko lai tiin an ruah cio cang hna.

Kan ram innpa a simi India cozah hmanh a hlan ahcun mipi a kan dirpi, ralhrang pawl a rak mawhchiat len hna. Sinain a tu ahcun ralhrang lei ah a dir ve cang. Ralhrang sinah bawmhnak zong a pek ve cang.

Kan nihin mipi le NUG hi ramdang nih cuti ngai in tanpi tu le bawmtu kan ngei lo. NGO deuh nihhin ralzam an kan bawmh le a si ko. Cu lo hriamnam le phaisa thazang in cun ramdang bawmtu hi kan ngei lo ti awk a si ko.

Kawl ralhrang tu cu Russia, China, Iran, Serbia le Pakistan nih an bawmh peng hna. Hriamnam le thiamnak bak in an bawmh peng hna. Ralhrang nih uknak an lak hnu ah Russia nih hriamnam le thiamnak in a bawmh. China nih hriamnam le thiamnak in a bawmh rih. Iran, Serbia le Pakistan zong nih hriamnam le thiamnak in an bawmh rih hoi.

Ralhrang pawl nih vawlei cung ramdang nih an kaltak kan ti ko nain a kaltak lomi a rak bawmtu tampi an um ve. Nitlak lei ram hna le US nih sipuazi in phihnak tuah lawng hi cu ralhrang cu an zei hmanh a rak poi lo.

Dr. Sasa le a hawi le NUG upa hna nih an aupi nak thawng in vawlei cung company ngan tampi nih ralhrang cu sipuazi in an phih ko nain a hram bongh ngaingai nak ding cun a rak si kho bak lo.

Dr. Sasa nih Kawlram ah R2P lut ding zing in UNSC ah a hal ko nain Russia le China nih ralhrang an dirkamh peng caah a si kho hlei lo. Ramdang nih NUG sinah meithal hriamnam thatha van bawmh ding ah le an kan bawm fawn lo.

A fiang komi cu ramdang le UN hi bochan awk an um lo. Kanmah thazang le kutke te bak in ralhrang hi kan doh i kan tei hna a hau ko. Ralhrang pawl zong hi Russia le China nih an bawm cawk te hna lai lo. An sungh tuk cang hnu ahcun san a tlai ti lo an ti le an bawm cawk te hna lai lo.Credt-Thestar

Be the first to comment

Leave a Reply

Your email address will not be published.


*