Kawlram Nih Zelensky Bantuk Ralthami Hruaitu Kan Herh

Kawlram ah Ukraine ram bantuk in hruaitu tha kan ngei lo.

Ukraine ram an President Zelensky cu na himnak ding caah US ralkap nih kan in bawmh lai, kan in lak cang lai an ti nain a duh lo. Zamnak lam kan duh lo, hriamnam lawng kan duh tiah a leh hna.

Russia ralkap nih zeitluk in Kyiv khuapi Jet fighter le Rocket in an den an kah zong ah Ukraine President Zelensky le a MP pawl hna cu an zam ve lo. Kan thih ah thih kan nun ah nun an ti i ral an do peng ve ko.
Cu ruang ah Ukraine mipi zei tluk hmanh in tuar ko hna hmanh sehlaw an thinlung a thawng i Russia ralkap nih an tei kho hna lo. Nihin tiang Russia nih an ram an lak piak kho rih hna lo.

Kannih Kawlram MP le kannih Chin kan MP pawl cu an mah tu kha hawi hlan cem ah a zammi an si. A zam manh lomi ralkap nih an tlaih hna i zeitik hmanh ah ralkap kan doh ti hna lai lo tiin min an thut tet hna i an chuah ter hna. Nihin tiang Kawl ralhrang an doh ngam ti hna lo.

Kawlram dothlennak caah hruaitu kan timi luban pawl hi a tam deuh cu ramdang ah an zam hna. Ram chung ah a ummi cu minung tlawmpal te lawng kha an si hna. Hruaitu hmanh an zam ahcun hruaimi cu an zam ko lai hen ta.

Kan nua le mino tampi nih nunnak an pek nain kan hruaitu pawl an zam dih caah hin kan ram dothlennak cu tei a har ko lai. Fawi tein kan tei kho ti hna lai lo. A langpar ngai cun ral tei hi a har tuk.

NUG nihhin kan ram dothlennak caah zei ngai a tuan chuah mi a um rih lo. Kannih Chin miphun kan ralkao caah zeital a kan bawm cang maw? Si ai le din ei tlawmpal cu a kan bawmh men lai nain chim tlak a si lo. Kanmah le kanmah kan i bawmh mi sinah chim tlak a si lo.

NUG cu vawlei pi a kan theih, UN pi nih a kan theih an ti nain nihin tianh zei ngai hi an tuah mi a um lo. Can a rau deuhdeuh i NUG hi an thazang a der chin lengmang cang.

Ukraine MP pawl bantuk in kan MP pawl hi zam hna hlah sehlaw kan ram dothlennak caah hin tamtuk a thahnem hnga i ralhrang pawl hi tam tuk kan tei cang hna lai.

Zelensky bantuk in a dik a felmi le ram a dawmi hruaitu ah Dr. Sasa hi a si ti usih law ramdang ah a zam hoi tung i a si kho deuh fawn lo. Dr. Sasa hi miphun le ram cu a daw bak nain a zammi a si ve caah a poi deuh. Zelensky bantuk hruaitu tha kan herh.Credt-Thestar

Be the first to comment

Leave a Reply

Your email address will not be published.


*