Krifa le Buddhist Phungki Vialte Hi Ralhrang Lei Ah An Lung Um Dih Ko Rua

Krifa le Buddhist Phungki Vialte Hi Ralhrang Lei Ah An Lung Um Dih Ko Rua

Azoh mi le a theihmi vialte sock a ngah ter I, Trauma a si ter mi tuksapur thahnawnnak, Minung he I lawh loin a buin mithat nak, saram bang in duh poah hremh nak intuar ter hnu ah Lainawng nak tbk hi Rallokap nih nifatin ti awk an tuah zungzal. Mipi nun Duhdim ah lamhruai tu le Cawnpiak tu Phungki hna dai tein an um I an kaa an cip dih. Krifa Phungki le Buddhist Phungki rual he a holh ngam mi an um bak lo. Vawleipi an khuaruah a har dih ko. Buda Phungki kong cu chimh awk aum lem lo. Ralhrang nih an biak hna I, an duh mi an tlin ter dih. Phaisa le Suingun Lungvar relcawk lo an pek hna. Ralhrang nih chimh mi cu mipi kan ngai lo caah Phungki rual cu an chimh ter hna. Cuticun Kawlram mipi tampi cu duh na loin Rallokap lei ah an um ter hna.

Rohingya Thatnawn lio ah ICJ ah Pastorte an ṭanh lo, Bualrawn ah mipi an pumh hna, We “Stand With Justice” tiah au pi loin “We Stand With DASSK” tiah an au ter hna mipi cu; Anmah Rev. Dr te zong Halleluiyah Amen tiah thlacam an tlo ngai ngai. Rohingya cu Krifa dohtu Muslim an tam caah an lei ah an umlo asi lai tiah Vawleipi nih Pastorte cu an ti hna. Paucan Dohthlennak ahcun an turuun le Krifa tampi an hremh hna, thong an thlak hna, an that hna caah; Fak pi in: Rallokap cu sual an phawt hna lai tiah Vawleipi cuanh lio ah Daiṭhup in Ui thih in an thih ko. Jesuh nih mi dinfel cu mi thluachuah nan si vawlei ro nan co lai tiah an kan Cawnpiak caah KRIFA asilo mi zong nih kawlram Pastorte aw kha hngakhlang cio asi. Nain an awn pelte hmanh a lang lo. Nimte aw tia hman theih awk aum tilo. Kawlram ah Pastorte hi an um lomaw? An zaw dih maw? Covid19 in dah an thih dih ti tiang in Vawleipi an khuaruah a har dih. Krifa Phungki rual hi Justice lei ah aum lo mi lawng te an si ko lai, Jesuh lamthluan an zulh lo, Bible Cawnpiak ning silo in, anmah duh ning Bible le Jesuh Cawnpiak nak hi an merh ko lai, Krifa bu ah Phaisa tampi lut in vaivuan le rum, rumra le popular, Credit lawng te hmuhco aduh mi an si lai tiah, Vawleipi nih an kan ti cang. Gandhi nih Jesuh Cawnpiak ning le Bible ning in Krifa le an Phungki hi an dinfel lo ati mi kha atak in kan sin ah a tlung ve cang.

Bible OT chan Pathian minung Profet hna nih Uktu chiakha le Uktu Ṭhat lo hna cu: rolung an bunh tawn hna. An ṭhatlonak kha an sawh piak hna. Ṭhatnak lei ah I merh ding in an chimhrel. Kan chimh lo ahcun zeitindah an theih khawh lai, an theih loah cun zeitindah an nunnak ṭhatlo cu an merh tak khawh lai, an nun ṭhat lo kha an merh tak lo I sualnak an I ngaihchih lo ahcun dantat nak in zeitindah an luat khawh lai timi Policy cu; an tlaihtleng asi. Chimh loin nan um ahcun an thisen man kan hal hna lai tiah Ralkapbu Bawipa nih ati. Bible thiam le Phungbia Cawnpiak tu Saya hna; Tlangbawi hna; Pharisees le Saduccess mi hna cu: Uktu chiakha ti an theih ko nain, an ka an cip tawn ve. Profet hna hi mifim le cathiam an si lem tawn lo. Cawkhal mi, Tuukhal mi, Nel thuam mi, Lothlawh mi, tbk hna an si tawn. An chimh mi kha mipi le SPH le Uktu hna nih zei ah an rel tawn lo caah Pathian lung an fak ter, Bawipa thin an hun ter I, a hnu bik ah dantatnak an ing tawn, an Cihram atlau lan mi zong an um. Ralhrang Rallokap nih Krifa mi turuun tampi hram hram loin, sualnak kan ngeih lo buin, saram bang in a duh paoh in an kan that mi an hmuh ko nain, Dai tein aum I, aa ka aa cip mi Pastorte le Pathian rianṭuan tu hna hi, huat cu an tlai bak ko. A chinchap ah Ralhrang he aa kawp mi Pastorte, Third Party phun in kik lo, lum loin a um I, ka hngalh lo, kaa pehtlaih lo, ti phun aa zukphir mi Pastorte hi, Khuaruah har minung cu nan si hrim ko.

Phungki Luzik hna dai tein an um I an kaa an cip caah Mipi nih an mawtchiat nak a ruang he aa pehtlaih mi Abik bik Ralhrang tuksapur Thatnawn nak hna cu; Cianhsinci khua Mah Nanda cu Latṭih Piosawṭhi nih Tuksapur in an thah (ကြံ့စိမ့် ကြီးကျေးရွာက မနန္ဒာဟာ လပ်တီး ပျူစောထီးသတ်ဖြတ်). A theih mi kip cu Sock an ngah I Trauma an si dih. Tidaku telin Krifa le Buda Phungki rual dai tein an um ko. Zeihmanh kan theih I kan hngalh lo ti phun in an I molh ter I an hna an I chet ter. Apaw Thla 5 fano he asi mi CDM Sayama nu le sualnak ngeih lo mipi 5 cu an nung buin mei an duah hna (ရေစကြိုမှာ). An thah hlan ah an kutke an tan dih hna I, an pumsa vainam in an cheuhbauh dih hna. Gangaw ah, Mihrut pa pakhat an tlai, hri in an ṭem, an hnu lei ah zawngkut bang in an kut cu an ṭem, a nung buin mei an duah, hrintu anu ik hluaimai in a ṭap ruangmang, Phungki rual an holh lo tho tho. 8888 hruaitu Ko Jimmy le MP Zezar Taw cu aruang um loin le Upadi ning in siloin thihdan an pek tikah, Vawlei pumpi a hninh dih, Phungki rual an dai tho tho rih ko.

Dinfel lonak, Ṭhatlonak, a ruang um loin, a sual lomi mipi that asi tikah, Sualphawt tu ding cu Phungki rual an si nain, Phungki he aapehtlai lo, kan rian asi lo ti phun in an um caah, Phungki rual an rian hi zeidah asi hnga tiah khua tuak loin um lo an ṭha ve ti lo. Mipi nih kan hlu mi le kan pek mi hna 1/10, thawhlawm le phaisa relcawk lo hi maw, khim tein an ei lai? Pekchan tu mipi khumzual tu rian hi Phungki rian asi ve lo bang. Ralhrang kan thluk in ICC ah taza kan cuai hna lai: Hri thlai awk hna an si tikah cu an bia atam tuk hoi te lai Phungki rual hi. An holh tamtuk ah kan Hnachet khawh men. Mithat Lainawng an si caah, an sual nak an ing awk asi ti phun in an chimhrel te lai, ka hngalh cia ko hna. Ralhrang an cihmih asi tikah le kan ram a zalen tikah, a holh bik ding mi Phungki rual lawngte nan si caah; Khi tikah cun, MAH he lu kawng in Hrithlai ding ah aa tlak mi Phungki lawngte nan si ko, KRIFA Phungki le Buda Phungki he. MAH le Ralhrang kan thluk khawh in Nanmah Krifa Phungki le Buda Phungki rual hi Thianghlim nan herh te lai.

Fianternak; RC Cardinal le Bishop Siangbawi te lawng hi Mipi an kan thatnawn nak ah an aw thlah tu an si.Cred-Zingtincuai Cinzah

Be the first to comment

Leave a Reply

Your email address will not be published.


*