Laimi Cheukhat Ei Loin Kan Um Taktak Cang Lai

Laitlang lei hi tihin cun ei loin a ummi chungkhar tampi kan um te kho men.

Ralhrang nih uknak an lak ruang ah thilman van a tong cang. Chin ramkulh thilman a let bak in a kai cang. Zeitindah hmailei khua kan sak lai tihi ruah awk ngam hmanh a si ti lo.

Chin ramkulh le Kawl lei pehtlaihnak lampi ah duh ning in Motor an kal kho ti lo. Hakha in Kalay ah thil a latu Motor pawl hi a hlan ahcun nithum hna an rau i a tu ahcun zarh hnih hna an rau cang.

Hakha khuapi cheukhat dawr pawl ah thil a um lomi a tampi cang. Thil a um mi hmanh a let bak in thilman an kai hna. Cu tikah thil man a let bak in an kai i zapi zaran caah cun thil cawk a har tuk cang.

Hakha khuapi dirhmun in kan tuak a si ahcun ramdang ah phaisa kuatu a ngei ve lomi chungkhar pawl caah cun nun hi a har bak ko. Nun hi a fawi bak ti lo tiah Hakha khuami pakhat nih a chim.

Matupi khuami zong a tu hi lungrethei in an um ko hna. Matupi khua chung ah Facang cawk ding a um ti lo. Cawk duh zong ah a man a fak tuk fawn. Datsi cawk ding zong a um ti lo. Thilman hi a fak tuk cang.

Kawl lei thil ai rinhchanmi kannih Chinmi caah cun Kawl lei lam a phih hin cun thil man hi van a tong i ramdang in phaisa kuatu ngeimi caah cun tlawmpal ai ning deuh. Ramdang in phaisa kuatu ngei lomi caah a hlan bantuk in riantuan i hlawhnak zong a um fawn ti lo i lungrethei bak a si ko.

Mah bantuk in kan ram a buai peng ko ahcun a hnu ahcun din ei awk ngei loin a ummi chungkhar tampi kan um te lai i vansang in kan um te hna lai.

Cu caah CDF nih a rannak in thil man hi nan control a hau i thilman hi nan chek a hau. CDF le CNA nih thil man nan control lo ahcun zapi cheukhat kan lo cang lai.

Be the first to comment

Leave a Reply

Your email address will not be published.


*