Laimi kan ton thil cu a fak kho tuk hringhran ko e!!



Tahan-Yarzagyo Motor Lampi Cu Zulh Khawh A Si Cang, NanChaung Khua Mitlamtling Lo SAC Nih An Thah
====================
Kalay peng, Nan Chaung khua i a um mi SAC ralhrang rual cu ni hin (Dec.14) zing ah an kir cang caah Tahan-Yarzagyo lampi cu mipi umkal nak ah a him cang tiah theih a si.

Nihin Dec-14 zing ah SAC nih khua an chuahtak hnu i, kan ralkap khuachung an luh ah Mi tlamtling lo Biak Za Ling tiah kawhauh mi cu SAC nih thah in inn meikang lak ah ankhangh tak chih mi ruak hmuh a si tiah theih a si. Khuachung i aa tapmi pawl himdam te in an hmuh thandih hna tiah theih chih a si.

Kalay Myo airport cu an remh lio caah December 16-19 tiang vanlawng luhchuah an i din lai tiah theih a si. Ninga ni (December 16) bel hi chun hnu in khar a si lai tiah an chim. Christmas le kumthar caan a si caah January thla tiang ticket an cawk dih cang tiah theih a si.

Kalay Myo, Taungzalat sang, Blessing sawng pawng ah SAC ralhrang hna nih nizaan December 13, zaanlei sml 5:30 ah hriamngan duhpoh in an kah ruang ah mipi minung 5 hliamhma an tuar tiah theih a si.

Hmapu mi an dihlak in siikhan ah an kal pi hna i minung pa 2 cun inn an ṭin kho cang nain a dang minung pa 3 bel hi ralkap siizung ah an thlop lio hna tiah theih a si. Hma hmu mi an dihlak in pa lawngte an si i mino 3 le upa 2 an si tiah theih a si.

Kalaymyo myohlah No(12) sang ah nizan Dec-13,2022 zanlei Sml 5:30 hrawng ah ralhrang nih daithlang hriamngan vawi hnih a tlak i hliamtuar mi 7 an um tiah theih a si.

Sagaing ramṭhen, Kalay peng, Nanchaung khua ah SAC ralkap an lut i mipi in an khangh hnu ah Duwaichaung-Yazacu lamcung mawṭaw pawl umkal lo ding in PDF-Kalay nih December 13 ah a thanh.

Ralrin peknak zul lo in a umkal mi cu PDF-Kalay nih zeihmanh kan in tawlrel piak hna lai lo tiah a thanh. December 12 zinglei ah SAC ralkap pawl Nanchaung khua ah an lut i Foursquare biakinn telh in mipi inn 19 an khangh tiah a thanh.

Nanchaung khua hi inn 190 hrawng an um mi milu 800 leng an umnak a si. Kalay peng ah SAC ralkap nih mipi inn 2,000 leng a khangh cang tiah theih a si.

Myanmar ram buainak kan tawlrel khawh nak ding ahcun a tlawmbik kum 5 a rau kho rih tiah ASEAN Chairman a si mi Cambodia Prime Minister Hun Sen nih a chim.

Sagaing ramṭhen, Kalay peng, Nanchaung khua ah SAC ralkap an lut i mipi in an khangh hnu ah Duwaichaung-Yazacu lamcung mawṭaw pawl umkal lo ding in PDF-Kalay nih December 13 ah a thanh. Ralrin peknak zul lo in a umkal mi cu PDF-Kalay nih zeihmanh kan in tawlrel piak hna lai lo tiah a thanh. December 12 zinglei ah SAC ralkap pawl Nanchaung khua ah an lut i Foursquare biakinn telh in mipi inn 19 an khangh tiah a thanh.

Nanchaung khua hi inn 190 hrawng an um mi milu 800 leng an umnak a si. Kalay peng ah SAC ralkap nih mipi inn 2,000 leng a khangh cang tiah theih a si. Myanmar ram buainak kan tawlrel khawh nak ding ahcun a tlawmbik kum 5 a rau kho rih tiah ASEAN Chairman a si mi Cambodia Prime Minister Hun Sen nih a chim.

Belgium ram, Brussels khua a phan mi Prime Minister Hun Sen le Europe a phan mi Cambodia miphun 20,000 leng he December 12 ah tonnak an ngaih lio ah a chim tiah The Phnom Penh Post nih a langhter.

Myanmar ram buainak tawlrel khawhnak hnga kum 5 a caan kan lak a hau tiah a chim, Myanmar ram buainak ka tawlrel khawh lai a ti mi poah kan i zuam cio a herh, amah zong a ṭuan caan a dih deng cang bantuk in ramdang lei Minister Prak Sokhonn zong Myanmar ram ah a kal ṭhan ti lai lo tiah a chim.

ASEAN Chairman rian Cambodia nih a ṭuan chung ah Prime Minister Hun Sen le Foreign Minister Prak Sokhonn nih Myanmar ram buainak tawlrel ding in an i zuam chih ko nain SAC lei nih daihnak biaruah ding a biakamnak aa theihter lo bantuk in mipi pawl a thah hna tiah Phnom Penh rambunh phunghram kong a ngiathlaitu pakhat nih a chim.

December 10, zinglei sml 7:00 hrawng ah Kah-Pah-Sah 21 in thazaang 70 hrawng SAC ralhrang hna cu Longsi peng, Ngaingpin khua le Kanlay khua lei ah ral-lam an sial caah Kangaw peng PDF Batallion 6, Battalion 3, Salin phu, Seya phu, le Moekyu phu phufonh hna nih an doh hna.

Longsi hmun ram ah a rak ra mi ralhrang hna cu mine bomb, hriam ngan le hriamhme tiin doh an si i ralhrang lei minung 5 an thi i minung 13 hliamhma faak an tuar. Ralhrang lei zong nih RPG 7, 60 mm tiin hriam phunkip an hman ve.

Ralhrang he dohnak ah PDF-Gangaw battalion 6 in ralkap pa 2 nih ram ca ah nunnak an pek. Myanmar ram nih Democracy a hmuh hlan tiang ral kan doh lai tiin LSRPDF nih cathanh an chuah.

Shan ram ,chak lei Moemyiakh peng Yepung khua pawng naih le Manyawn / Taungki / hmunram leng ah Ta-aung hmunram chung Namsan myo-ne Kungta khua pawng hna cu SAC nih nihin zong ah Vanlawng a hman leng ah hriamngan in ralser kahdohnak a pehzulh tiah theih a si.

Kungta khuachung um SAC hna nih khua cu an chuahtak cang na in nihin chunhnu Sml 2:00 hrawng tiang hriamngan voi (10) reng lo an kah leng ah vanlawng in tukdohnak an ngol rih lo tiah cuka hmunpawng i a um ve mi mi pakhat nih a chim.

SAC nih Vanlawng in a kah ruang ah inn (60) hrawng a um nak Kungta khua cu inn (50) hrawng ai rawk i, inn (4) a ciam . SAC le TNLA kar i december -7 ni in tukdohnak a chuak mi cu nihin tiang ah Kungta / Pinglone / Human / Manlone / Panalauh le Samngan khua hna in tualchung mi (1386)hna cu Namsan khuapi chung un Zayankyi phungki biaknak inn ah ralhrial in an um tiah theih a si.

West Laimi Bangaladest in Central Lairam Lawngtlai pengkomh Parva-III i a ummi hna thialnak kongkau ah Pi Marilyn Rualzakhumi telh in District Disaster Management Authority tonnak nih biachahnak an tuah.

A hmasa tumkhatnak ah, nikhatni le nihnihni ah Tuithumhnar le a pawng hrawng khua ah chungkhar 30 chiah an si lai. Chungkhar 20 cu Vaţhuampui ah, chungkhar 14 cu Chamdur Project ah chiah an si lai. Chungkhar 10 cu Mautlang khua ah chiah an si lai.

Chungkhar 64 chiahnak ding Tuithumhnar, Vaţhuampui le Chamdur Project hna hi, Lai Autonomous District Council hmunram chung a si. Mautlang hi cu Lunglei district a si. A tu i an umnak Vapar-III khua hi Chakma Autonomous District Council hmunram chung a si.

An i thialnak ding caah BSF hna nih ralzaam umkalnak caah an lirthei an hman lai. Chawngte SDO (Civil) nih Parva-III ah ralzaam dornak ummi zohfel in le hmundang an herhhai tuaktan lai. Parva zaanghleicawi hna zong theihter in ralzaam thialkamnak an bawmhchanh hna lai.

An i thialnak ding khua ahhin VCP le zaanghleicawi hna nih an rak don hna lai. An i thialnak ding ah VCP le Young Lai Association (YMA) hruaitu hna cu Village Level Committee on Bangladeshi Asylum Seekers dirh dingin theihter an si.

East Lairam, Matupi peng, Rengkheng khuami Pu Bawi Tyng thaisungnu Pi Tin Cawi kum 26 cu, Central Lairam Lawngtlai, Bethel veng ah innhlang in ralzaam dirhmun in an um, Pi Tin Cawi hi 2022 Dipa 7 ah, Lairam sii-inn ah nau a ngeihhnu a nilinak Dipa 10 zinglei suimilaam 5:00 AM hrawng ah a nunnak a liam. A pasal le fanu fapa pathum a roh tak hna.

Zahan zaan suimilaam 8:30 PM hrawngah East Lairam in Central Lairam Lawngtlai ah a rak i dormi Salai Zawng Man kum 15 cu Lairam sii-inn ah Kal lei dam lo nak in a nunnak a liam.

Salai Zawng Man hi Lawngtlai Bethel Refugees Camp ah a ummi a si, East Lairam a khua cu, Matupi Peng (Thai Boi) khua a si. Salai Zawng Man i hringtu a nu hi Kawl ralhraang bomb aa lamh sual caah a ke a bul i Delhi ah Salai Zawng Man a pa nih a umpi lio a si.

SAC ralkap 200 hrawng cu Mindat nitlaklei meng 5 le farlong 5 a hlatnak ah CDF Mindat nih December 13 chun ah an kah hna, tiah theih a si. Cu kahdohnak ah SAC ralkap 3 cu a hmun ah an thi i, 2 hlimahma fak ngai an pu.

Cu hnu tlawmpal ah SAC ralkap Battalion 274 nih hriamngan in an kah i hriamngan kuan a tlaknak khua zong kan hlathlai cuahmah, tiah CDF Mindat in chimphuannak nawlngeitu nih a chim.

A luancia November thla thawk lioah SAC ralkap le CDF Mindat karah Palungtwe(ပလုံတွီ) khua ah kahdohnak a rak chuak i, thla khat tluk kahdohnak a daih hnuah atu bantukin an i kah ṭhan hi a si, tiah theih a si. December 13 kahdohnak ah CDF Mindat lei in a thimi le aa hliammi kan um lo, tiah CDF Mindat nih cathanh an chuah.

Kum 19 tluk PDF ralkap pakhat cu SAC ralkap nih an tuk an velhnak muicawl cu CDF KKG nih December 13 an an langhter. Muicawl chungah SAC ralkap nih PDF pa cu, Ka nu Aung San Su Kyi rak ka khamh tiah an auter pinah dohthlennak kan tei lai lo ti zong in an auternak hmuh khawh a si.

PDF ralkap pa cu SAC ralkap nih an tuk an velhnak ah a mit pahnih in a phing dih i a mit a au kho ti lo. A mit, a hnar le a ka in thi tampi a chuak i a celh lo tuk caah a holh kho set ti lo.

Cu muicawl chungah SAC ralkap nih na far le pa zeizatdah an um tiah an hal i, 5 an um tiah a leh hna hnuah SAC ralkap nih holh dawh cah loin kan tlaihhrem hna lai, tiah an lehnak zong hmuh khawh a si. Cu muicawl cu a luancia May thla lioah Kalay peng Shiaphu khua i kahdohnak ah SAC ralkap sinin chuhmi phone chungah a ummi a si.



Source link

Add a Comment

Your email address will not be published. Required fields are marked *