Malaysia ah Kawlram Minung 5 ciitmi Mawtaw Cu Police Nih An Pah Chih Hna I An tlaih Hna – Thawngpang Dik Thanh Hna Usih


Myanmar Rammi Minung 5 Ciitmi Mawtaw Cu Malaysia Palik Mawtaw Nih Pahchih In An Tlaih Hna!Malaysia ramchung Kelantan ‘state’ GUA MUSANG pengah phungnin loin a lutmi Myanmar minung 5 ciitmi mawtaw cu palik nih mawtaw in an pahhna hnu ah an tlaih hna tiah (Western News) nih a chim.

December 7 zaanlei suimilam 6:00pm tluk ah Malaysia palik nih an zumh hnalo caah chekhlat dingin lam an kham hna i an dir duhlo ruangah a tubantuk in an tlaihkhih hna hi a si tiah a langhter.

Cu nawtaw chungah cun kum 26 in kum 42 karlak minung hna tlaihkhih an si i Malaysia rammi pa zong aa tel i rit-hai-si an tawngchih tiah Malay palik nih an chim.

Malaysia pa le Myanmar minung 5 hna cu rampi nih a ngeihmi phunghrampi in tazacuai le dantat an silai tiah Malaysia ram palik thawngthanhnak nih a langhter tiah theih a si.

SAC Ralhrang Nih Kum 50 Nu Pakhat An Tlaihhrem Hnu Ah An Thah!Magway ramtthen Pauk peng Tharaphi (သရဖီကျေးရွာ) khua ah nu Tin Nuh (kum 50) cu SAC ralhrang nih an tlaihhrem hnu ah an thah tiah theih a si.

“December 8 zing suimilam 10:00 tlukah SAC ralhrang nih Tharaphi khua an luhhnawh i mei an khangh lio ah tualchung mi, nu Tin Nuh (မတင်နု) cu SAC ralhrang nih an hmuh i an tlaihhrem hnu ah an thah” tiah tualchung mipi nih thawngthanhnak an tuah.

Matupi Peng, Thaiboi Khuami Zung Mang Cu Damlonak In Mizoram , Lawngtlai Camp Ah A Nunnak Liam. Chin ramkulh, Matupi peng Thaiboi khuami Pu Kawng Hu fapa Zung Mang(kum 15) cu Mizoram , Lawngtlai pengkomh Bethal Camp 2, ah ralzaam in aa dormi an si i damlonak ruang ah Lairam siizung ah thla khat le cheu tluk hrawng aa thlop hnu 2022, December 8 zaan suimilam 9:00 hrawng ah a nunnak a liam tiah theih a si.

Damlonak ruang ah nunnak liam mi Zung Mang hringtu a nu Pi Van Taw cu Matupi, Thwiboi khua an um lio ah SAC ralkap nih an hmanhmi bomb lamhsualnak ruang ah a ke khatlei a bul caah, India Newdelhi ah ke lem bunh ding ah ai thlop lio tiah theih a si.

SAC Ralkap Nih Duh Paoh In Meithal An kah Caah Nahau Tlang Inn Cheukhat A Rawk. Chin ramkulh, khuapi Hakha ah nihin December 9 zinglei ah bomb thawng le meithal thawng a thang, tiah theih a si.

Tualchung mi pakhat nih, “Nihin deilei sml 3:55 hrawngah bomb thawng le meithal thawng voi tam ngai a thang. Kahdohnak a chuah le chuah lo cu fiang in kan hngal lo,” tiah a chim.

SAC ralkap nih duh paoh in meithal an kah caah Hakha thar Nahau tlang ah a ummi inn cheukhat cu kuan tam ngai nih a khen, inn chung thilri zong tampi an rawk, tiah theih a si.

 



Source link

Add a Comment

Your email address will not be published. Required fields are marked *