Matupi Peng Hte Bui Khua, Chin Pian Khua Le Khua Dangdang In Thla (3) Chungah Minung (13) Nih Bomb An Lamh

Matupi Peng Hte Bui Khua, Chin Pian Khua Le Khua Dangdang In Thla (3) Chungah Minung (13) Nih Bomb An Lamh!

Kum 2022 chung thla thum chungah Chin ramkulh, Hte Bui khuami minung (13) hna cu khua pawngah SAC ralhrang ralkap nih bomb an phummi lamhsual nakin hliam an tuar tiah khuami nih an chim. Mipa (12) le nu (1) nih hliam an tuar.

Bomb an lamhsual caah India ramchung Mizoram, Aizawl khuapi ah anmah pumpak tein an thlop tikah harsatnak tampi an tong tiah theih a si.

Mipa (7) cu an ke aa taan. A dang (5) cu a ke he an mit he hliam an tuar. Kum 50 leng nu pakhat cu fang chiahnak ah facang a laak hnuin a tumnak ah bomb lamhsual in hliam a tuar. A vakvaimi Vok, Sia, Caw tibantuk cu bomb lmhsual nakin a thimi an tam tuk cang. Hte Bui khua pawngkam dihlak cu ralhrang nih bomb an phum dih. Hi bantuk an tuah awk a si lo tiah Hte Bui khuami pakhat nih a chim.

Bomb lamhnak in hliam tuartu hna cu Aiawl khuapi ah i thlop kho dingin Hte Bui khua in motor he caw leng he zarhkhat leng caan pekin an kal.

March (2) nikhat chungah minung pahnih nih bomb an lamhsual hnuin Hte Bui khuami dihlak cu khua pawngkam ah an kal ngamti lo caah pawngkam khua dangah an i thial tiah theih a si.

Matupi peng Hte Bui khua pawngah SAC ralhrang ralkap sakhan pakhat a um i, cu sakhan cu a liamcia September thla ah khan Chinmi hriamtlaitu nih luhhnawh in an kah hnuin thazaang chap chin in khuami tlunkalnak tiangin vawlei tangah bomb an phum.
Crd: The Matupi Times

Be the first to comment

Leave a Reply

Your email address will not be published.


*