Min Aung Hlaing A Lau Cang~AA Ralkap Nih Ralhrang Uico An Tlaih Lengmang hna

Rakhine ramkulh Ponna Kyun khuapi ah thilril cawk ding ah a kalmi ralhrang uico pahnih cu AA ralkap nih an bawh hna.
Nain vanchiatnak ah ralhrang pakhat cu a zaam manh i pakhat cu an tlaih khawh tiah khuami hna nih an chim.

Rakhin ramkulh Ponna Kyun khuapi hrambunh ralhrang uico Khah-mah-yah 550 tat-yin chung pakhat cu June 16 chunhnu 2 pm tluk ah AA ralkap pawl nih an tlaih tiah mithmutu pakhat nih a chim.

“Ralhrang pahnih hna nih hin innsaknak thilril an rak cawk. AA ralkap nih pakhat cu an tlaih i a dang pakhat cu a luat manh tiah min langhter duhlo minpakhat nih Western News ah a chim. An tlaihnak hmun hi ralhrang uico pawl umnak he aa naihte a si. An tlaih mi ralhrang hi zeibantuk rank dah a si timi cu ka thei lo” tiah mithmutu nihcun a chim.

Hi ralhrang uico hna cu mi sawhsawh thilthuam i thilril cawk ah an kal tiah theih a si. Ralhrang uico pakhat an tlaih hnu ah uico pawl nih meithal hme an kah len i Ponna Kyun khuapi luhchuahnak gate pawl ah checkhlat nak an tuah len.

Hikong kau he pehpah in AA chimphuannak nawlngeitu Khaing Tuhkhah an haltik ah tutiang ahcun hi thawngpang cu ka thei rih lo tiah a leh hna. Cun a liamcia June 11 zongah Kyauttaw khuapi ah ralhrang uico pakhat an tlaih mi cu thawngdik a si ko tiah AA nih cathanh an chuah.

Ralhrang uico pawl nih AA ralkap pawl an kan tlaih caah kanmah zong nih ralhrang uico pawl kan tlaih lehrulh hna nak a si tiah Khaing Tuh Khah nih June 14 press conference ah a chim. A tu hi Rakhine ram chung ah ralhrang uico le AA ralkap i tlaih a um lengmang caah kaphnih i hmuhthiam lo nak a zual hma ngaingai cang tiah theih a si.

Be the first to comment

Leave a Reply

Your email address will not be published.


*