Min Aung Hlaing Nih Zei Ruangah Jet Fighter A Hman Tuk Ti Lonak A Ruang Pahnih

Nai hrawng hi Min Aung Hlaing nih mipi ralkap kahnak caah Jet Fighter a hmang tuk ti lo. A hlan deuh kha cu Jet fighter a hman taktak.

Kachin ramkulh Alaw Bum kahnak ah siseh, Chin ramkulh Lungler sakhan kahnak ah siseh, Mindat peng kahnak ah siseh, KNU lei kahnak ah le Kayah ramkulh lei kahnak ah tiin nifatin ti awk in Jet fighter a rak hman.

Sinain Min Aung Hlaing nihhin raltuknak ah Jet fighter a hman ti lonak hi a sau ngaingai cang. Helicopter deuh a hman cang. Helicopter hmanh cu hriamnam chanhnak le ralkap thazang chap nak deuh ah a hman hna.

Min Aung Hlaing nih raltuknak ah Jet fighter a hman ti lonak a ruang cu Kawlr ralkap kong a hlathlai i a ngaithlai tu Dr. Mg Mg nihcun a tang lei ah phun hnih in a ruah ning le a zumh ning a chimmi hi dik dawh ngai a si ko.

Datsi, phaisa a ngei ti lo. Jet fighter pakhat voikhat a zuan i bomb a thlak ah khin phaisa tamtuk a dih. Vanlong ah hman mi bomb khi Kawl ralkap nihcun Russia le Tuluk sinah an cawk mi a si. Jet fighter voikhat a zuan ah datsi tamtuk a dih.

Mah zatzat a dih ruang ah khin a batzat nih a chei ti lo. A hlan deuh lio ah jet fighter a rak hman tuk lio ah khan phaisa tamtuk an rak dih.

Kawlram buainak hi sau a rau ding a si i kahnak fak a chuak chin lengmang ding a si caah Min Aung Hlaing nihhin Jet fighter cu Kawlram khuapi pawl vennak lawng ah ai chiah cang.

A hlan bantuk in Jet fighter ka hman peng ahcun Yangon, Mandalay, Nay Pyi Taw tibantuk khuapi vennak caah ka ngei ti sual lai lo ti kha a phang. Cu ruang ah Jet fighter hi a hmang ngam ti lonak a si.

Kawlram chung i kahnak ah ralkap a tomtom in an thi. Chin ramkulh, Kayah ramkulh le Sagaing ramthen nitlak lei kahnak ah ralhrang a tomtom in an thi ko nain Jet fighter a hmang tuk ti lo.

Vawlei cung ram pawl mithmai a khap ti lo. Mah ram chung i kahnak ah Jet fighter tiangtiang hman hi ASEAN ram pawl hmai le UN hmai a khap ti lo.

A ruang cu Jet fighter tiang hman hi ram khat le ramkhat i kah bantuk ralpi caah hman mi a si nain Min Aung Hlaing nihcun mipi kahnak le khuate kahnak hna ah a hman tikah miphun cihmihnak tuah a timh mi khi a si.

UN le ASEAN ram pawl nih biatak tein an hun rengh cang caah jet fighter tiangtiang van hman kha ka thawngpang a thang tuk sual lai ti a phan caah a hmang ngam tuk ti lo.

A cung lei ah a langhter mi phun hnih hi a dik bak tinak cu a si lo. Sinain a zumh ning le ruah ning kha a tialmi a si caah van ruah ahhin a dik ko lai tihi zumh a um ngai.

Be the first to comment

Leave a Reply

Your email address will not be published.


*