Ni Donghnak Armageddon Ral Cu A Si Rih Lai Lo

NI DONGHNAK ARMAGEDDON RAL CU A SI RIH LAI LO

Tutan, Russia nih Ukraine a tuknak in hin, ni donghnak raltuknak, Armageddon raltuknak cu a chuak kho rih lai lo.

Kan ral, khuachia nihcun, ram țhawng le ram țhawng hna cu ralthawh terin, nuclear raltuknak hi chuakin, mipi a tomtomin thi hna selaw, hremhmun ah a tomtomin tla hna seh, ti cu a duh cemmi le aa zuam bikmi a si.

Kan BAWIPA JESUH KHRIH a rat țhannak caan zong hi a nai ngamsam cang ko. Kan vawlei zong hi aamah hrimhrim ti lo. Vawleicung ram țhawng le ram rum hna hi an țhan ning aa ningcanglo chin lengmang. An țhanning hi țhatnak tuahnak lei i țhan si loin, chiatnak, rawhnak nganpi pi chuahter kho dingin an țhang i an puitling ko cang hna!

Sihmanhselaw, kan BAWIPA JESUH KHRIH a rat țhannak caah siseh, donghnak raldohnak, “Armageddon ral” a chuah khawh rihnak hnga lo caah siseh, a dawntu cu, PATHIAN Vel hi a si i; Rom 11:25 le 2 Piter 3:9 i BAWIPA Bia hi a tlin rih lo caah a si.

Rom 11:25 i PATHIAN Bia bantukin, Jentail mi, khamhnak a hmu kho hnga dingmi hna, khamh an si dih bak cun, 2 Thes 2:7-10 bantuk hin, khuachia nih sahrang/Antichrist cu phawhhnih in a chuahter colhte lai i cu tikah, donghnak raltuknak, “Armageddon ralpi,” cu a chuak te lai.

Jentail mi hna, khamh an si dih caan kha, ahohmanh nih kan hngalh te lai lo caah, ralring te cioin um kan herh ko hna.

BAWIPA kan PATHIAN nih, “Ni hmanung bik ahcun, mi vialte ka THLARAU ka toih hna lai,” tiah a chimmi, BAWIPA PATHIAN a Vel ruang te ahhin, Vel le caanțha kan ngeih khawh rihnak hi a si.

Cucaah, porhlawt le ruamkainak thil le nuncan hna kha hlaw hna usih, BAWIPA țihzahbu tein le toidor te tuin, kan caanțha ngeihchun hna hi hman i zuam hna usih.

BAWIPA JESUH nih, Vel le Daihnak in pe ko hna seh.KHRIH Lamkaltu~Tluang Lian (Martar

Be the first to comment

Leave a Reply

Your email address will not be published.


*