Nihin Matupi Pastor Telh In An Thawngpang Theih Cu Celh A Si Lo Mu

MATUPI AH PASTOR TELH IN MINO 9 RALHRANG NIH KUM CAANSAU THONGTHLAK DINGIN BIAKHIAH

Lawngtlai, 18 Pur 2022 : Lai ramkulh, Matupi khua ah ralhrang nih tlaihmi hna Pastor telh in mino 9 cu a luancia Biangreithlep thla le Pur thla zarhnihnak ah kum caansau thongthlak dingin bia an khiahpiak hna.

Matupi khuachung ah CDF le CDM riantuan hna cu tangka na bawmhnak ti hramhram puh in an tlaihmi Pastor Kep Thang le tangka kuatnak tuahtu U Aung Ko hna cu ralhrang nih 13 Pur ah rianhrang le thong 15 tla dingin bia an khiahpiak hna tiah The Matupi Times Editor nih a chim.

” Pastor Thang le U Aung Ko cu Yangon lei in tangka kuatmi a um, cucu CDF nan bawmh hna tiah an pahnih in an tlaih hna, bia an chah piakmi hna zong hi fiang te’n an tial ko nain rianrang in thawngtheih a si lo, nizaan tihni lawng ah an pahnih in kum 15 thongthlak ding timi biachahmi kei zong nih ka theih” tiah a chim chap.

Pastor Kep Thang hi Matupi peng Champian khua Gospel Baptist Church i Pastor a si, U Aung Ko hi cu Matupi khua Sanbawng veng ah tangka kuatnak tuah tu a si. Annih pahnih hi Dipa 2021 thladongh lai ah CDF le CDM nan bawmh hna ti ruangah ralhrang nih an tlaihmi hna an si.

Pastor Kep Thang le U Aung Ko hna nih CDF le CDM hna cu tangka an bawmh hna lo bantukin CDF Matupi he pehtlaihnak a ngeimi an si lo tiah CDF Matupi in hruaitu pakhat nih a chim.

” An nih pahnih hi ralhrang nih hramhram in sual an phawt hna i CDF nan bawmh hna an ti hna, CDF/CDM cungah bawmhnak kong ah an i pehtlai lo hi phuchung zong ah an cawlcanghnak a um lo hnangam te’n a ummi mizapi an si” tiah a chim chap.

Matupi ah CDF ralkap he nan i pehtlai ti’n hramhram sualphawt mi mino 7 zong a luancia 31 Biangreithlep ah ralhrang nih thongthlak ding phunphun in bia an chah piak hna.

20 Hniang 2021 ah Matupi peng, Champian khua le Kawlin khua in mino 6 chungah mino 4 cu 31 Biangreithlep ah rianhrang he thong kum 5 tla dingin le a dang mino 2 cu kum 18 an tlin rih lo caah kum 2 chung thongtla dingin bia an chah piak hna.

14 Hniang 2021 i tlaih a tongmi Matupi Lawnvan veng ummi Pa Thung cu 31 Biangreithlep 2022 ah rianhrang he kum 5 chung thongtla dingin bia an chah piak ve. An dihlak in Matupi palek riahbuk ah hren an si rih i a rauh hlan ah hmundang ah an thial hna lai.Credit-The Lairam Times

Be the first to comment

Leave a Reply

Your email address will not be published.


*