NUG Hi I Bochan Tuk Hlah Uh, Kan Chim Hna

NUG hi i bochan tuk hna hlah usih, zei ngai an si lo. Tu hnu zong ah zei ngai an si hlei lai lo.

Kan rampi le kan miphun dothlennak caah hin NUG fak tuk in i bochan hna hlah usih. Tlawmpal cu i bochan ko hna usih law fak tuk cun i bochan hna hlah usih.

A ruang cu CRPH le NUG an dirhnak hi a sau ngau cang. Nihin tiang an tuah khawh mi thil hi a tlawm tuk rih. Vawlei cung ramkip sinah le UN sinah biatak tein rian kan tuan lai an ti. An tuan ko. Sinain vawlei cung ramkip le UN sinah an phichuah hi a tam rih lo.

Nihin tiang vawlei cung Democracy ah a ngan bikmi India cozah hmanh an mah lei ah an tan ter kho rih lo. India cozah cu ralhrang lei ah a dir peng rih ko. NUG chimrelnak thawng in vawlei cung ram tampi nih Kawlram hi sipuazi lei in phih deuh lawng a si rih.

NUG nihhin raldohnak caah meithal zong tam an kan bawm kho lo. Phaisa lei zong in siseh, ti rawl le sii ai lei zong in tam an kan bawm kho lo. A min men te khi bawmhnak cu an kan pek ve tawn ko. Kanmah Chinmi ramleng ummi bawmhnak he cun tahchunh tlak hmanh khi a si lo.

Cu ruang ah kan Chin miphun hna nihcun kanmah bak hi i bochan ko hna usih. Kanmah bak in meithal kan i cawk lai, hriamnam kan i cawk lai i ralhrang hi Chinram in kan dawi dih hna lai timi hi ruat ko hna uisih.

A ngaingai ti ahcun kanmah Chin miphun nih Nay Pyi Taw le Yangon va lak khi a hau lo. A herhnak a um lo. Kanmah Chinram te kan i lak khawh i kanmah tein kan i uk khawh ahcun cucu a za tukmi a si cang ko.

NUG nihhin zei ngai a tuah khawh mi a um lo caah kan i ruahchan ning tluk in a kan bawmh khawh lo te tikah kanmah lila kan thazang a zor sual lai. Cu ruang ah NUG bawmh hau lo bak zong in kan Chinram cu kanmah nih kan luat ter lai ti kha i tim ko hna usih.

KNU, KIA le AA te hna zong khi NUG an i bochan lo. Anmah hriamnam te kha an i bochan ko. NUG a um hlan piin ral a doh peng cangmi an si. Cu caah NUG maw fak tuk in i bochan sual lai cih.Credit- Thestar

Be the first to comment

Leave a Reply

Your email address will not be published.


*