Opinion ~ CDF Hi CNA Fonh Maw Tha Deuh An Mah Tein Um Ve Ko?

Opinion: CDF hi CNA ah an i fonh dih ah maw a that deuh CDF a dang tein an um ve komi hi dah a tha deuh.

Kan hnu ah ramleng in CNF ah biachimnak nawl a ngeimi Denial Sakhong nihcun ” CDF hna CNA ah rak lut dih uh, kan thazang kan fonh lai” tiah ca a tial i ruahnak phun tampi in a chuak.

CDF hi CNA ah an i fonh dih ah maw kan miphun le ram caah a that deuh lai CDF a dang tein an um ve ko ahhin dah kan miphun le ram caah a that deuh lai timi hi ruahmak phun hnih in a um. A ruang cu thil phun hnih a si caah ruahnak phun hnih in a um a hau. Ruahnak phun hnih cu a tang lei ah ka van langhter hna lai.

Ruahnak pakhat: CNA ah an i fonh dih a hau cang. CDF in an um hna i cheukhat cu a huam ti lo, lungdong in ai ma mi zong tampi an um cang hna. Cu pinah CDF hi an tamtuk. Meithal le hriamnam kan i deih fawn tung lo. Raltu taktak mi hi cheu 5 ah cheu khat tluk fai hmanh an si lo caah uniform cawknak le din ei zong ah phaisa a hlei in a dih.

Ramleng bawmhnak phaisa a kalnak a tam tuk. Meithal ca le hriamnam ca lawng ah kal ti loin CDF an tam tikah an tultak thil herh tete ah phaisa tampi a kal.
Cu ruang ah CNA ah i fonh hna sehlaw ralkap bu pakhat an si cang lai. Phaisa bawmhnak pekmi zong ai fonh cang lai.

CNA tang ah an um cang lai caah duh poh in i phuah le khualtlawn zong a ngah ti lai lo. Fullfim bak in CNA ah an um cang lai i phaisa hmannak a tlawm deuh lai i meithal le hriamnam caah phaisa a kal deuh ahcun kan thazang a thawng deuh lai tiah an ruah.

Ruahnak pahnihnak: CDF an um ve hi a tha deuh tuk. CNA cu kum 30 leng an um cang nain an thazang a thawng kho hlei ti lo. A ruang cu CNA caah hin phaisa a thomi kan tlawm tuk. Miphun huap in Chinmi hi kan cawlcang kho taktak rih lo.
Chinmi cu pengtlang in ti lawng ah thazang kan chuah. Cu caah pengtlang cio in ralkap kan i ngeih ahhin ramdang in phaisa thawh kan thawng. Kan pengtlang caah cun a ho poh nih phaisa kan thawh huam tawn.

Cu caah CNA zong Chin ralkap an si. CDF zong Chin ralkap an si i a dang veve an um ahhin kan thazang a thawng deuh. Raltuknak hmun ahcun an i fonh thiam ko. Ramleng lei in hriamnam le meithal caah tiin phaisa tam deuh a chuahnak kha a biapi mi a si. Cu caah a dang tein an um hi kan Chinram le miphun caah a tha deuh ko.

A cung lei ruahnak pahnih hi Chin miphun kar ah ai thenmi ruahnak phun hnih a si. Nang zeitindah na ruah ve. Na ruah ning comment ah van tial ve. Credit: VN Lian

Be the first to comment

Leave a Reply

Your email address will not be published.


*