Pantei Le Pantea An Nupa In Christmas Hla Thar An I Chuahmi Ngai Ve Hmanh Uh, An Thiam Kho Taktak Khi Si (+VIDEO) – Onlinenungak


Pantei le Pantea nih Christmas hla thar an van i chuah than cang, an thiam kho taktak si. An nih nupa hi upat an tlak ngaingai tiah ka ruah, an aw zong tha taktak rih.

An video thar a chuak, “I Lawm Ang U” timi an i chuahmi cu ngai hrim a nuam i, video in zoh le ngai a duhmi hna nih a tangbik te ah video kan chiah piak hna, zoh ve hrimhrim ulaw, an thiam taktak khi si.

Thawngdang Relchap: BLUE CHRISTMAS Tuah Usihlaw A Țhatuk Lai/ DECEMBER 21, Christmas cu mi cheukhat caah a nuammi Merry Christmas a si nain mi cheukhat ca ahcun Lileng Zuun ngaihnak ni Blue Christmas a rak si ve.

Merry (A nuam mi) Christmas cu nuam te’n kan tuah tawn nain Blue Christmas cu Laimi Khrihfa nih kan tuah lemlo mi asi. Tuah awk zong kan theih lo caah asi kho men. Nitlak lei ram Khrihfa nih cun Blue Christmas Service hi biapi tuk in an tuah mi a si.

Blue Christmas cu zeidah a sullam a si? Kum khat chung ah zan caan a sau cemmi December 21 (The Longest Night) ah hin Blue Christmas Service cu an tuah tawn. Zuun ngaih lileng mi hna le ngaihchia mithli he a um mi hna, an dawtmi hna nih a kaltak (a thih tak) mi hna caah hnemhnak le an zuun ngaih tuar damnak ding caah Blue Christmas Service cu Dec 21 Zaan ah tuah mi asi. Cucu Blue Christmas asi. (Zaan asi lo zongah chun ah tuah khawh asi ko)

Kan khua kan ram le kan Khrihfabu cio zong nih Blue Christmas hi tuah kho hna usih law a țha tuk hnga tiah saduhthahnak ka ngei. Atu kan ram le kan miphun sining zoh tik ah Lileng Zuun tuarmi inn chungkhar tampi an um lio caan asi caah Blue Christmas service tuah caan bak asi tiin ka ruah.

Thihnak a tong mi, Zuun tuar mi inn chungkhar nan dihlak cung ah Blue Christmas hnemhnak thluachuah cu um hram ko seh. 🙏🙏🙏 Blue Christmas, Amos Thang Chin, Yangon

Relchap; Mirum hna caah ‘A thlummi Dipa’|| Misifak hna caah ‘A khaami Dipa/ Kan hngah hlang tukmi Jesuh Khrih chuah thla December cu kan hun phan ṭhan ruangmang cang. Kan/Nan lungthin ah a hung um cio Christmasa khi a si.

Dipa thla a hung phan i kan lungthin a hung lang colhmi ‘cu A thlummi Dipa, tikhi a hung lang colh. Zumtu he zumtu lo he ‘A thlummi December’ mirang in kan hun ihlan cun ‘Sweet Dipa ‘ tiah a mikip nih phai cio a si.

Kei cu A thlummi Dipa ka ti kho loh! Miṭhen nan ca zongah a si lo kho men lai. December thla a hun chuah i kan ihmuitinh bikmi cu Khamhtu chuahni sunglawi ‘Christmas’ hi kan i hmuitinh bikmi (focus) cu a si.

Vawlei sualnak a kalpitu ding, Hell mei kam ah a dirmi hna lam hmuhsaktu le ruahchannak ngei lo, lungdongh vansang in a ummi hna ca’h lam hmuhsaktu le khamhtu chuah thla sunglawi a si. Cu rualrual in misifak hna kan sifah mualphohnak le kan ngaihchiatnak ni a si. Mirum hna an ha an i likni le an rum an langhnak ni a si ve.

A fawinak in kan chim cun mirum le misifak kan i theihni le cuai kan i thlaini ti usih law a dik deuh men lai. Kan vawleipi thleidannak in a khahni thla a si. December thla cu kan theih cio bangin khuasik thla a si tikah, thil man a fak khun. Nangmah thilthuam maw ṭha deuh keimah thilthuam ti i zuam cawhnak thla pakhat a si tiah ka ruah. Hi ko ah mirum le sifak kan i theih khunnak le thleidannak thantar a zar liopi a si

Cucu a thlummi Dipa tiah fawi tein cohlang awk a ṭha hnga maw? Nangteh zei bantuk lungput in dah na zuanh ve i cuai na thlai ve. Sifak santlai lo fa a mithmai bitni le ngaihchiatni. Mirum fa a hmaihngalni le minṭhatni. Sifak santlai lo kan caah cun a rak kha tuk hringhran. Fiang ko in kan chim a si ahcun, mirum hna caah ‘A thlummi December’ misifak hna caah ‘A khaami Dipa ‘ ti usih law a fiang bik ko.

Dipa (Christmas) a hung chuah le phak cun chungkhar kan von ihlam cio hna. Cheukhat cu chung tling tein cabuai kulh in rawldum ṭi caan a si. Bia thawthaw in biaruah le thluachuah phun za i lakpiak le i pek caan a si. Chungkhar tlinglo cheukhat cu ngaihchiat bu le mitthli hria in rawldum caan a si.

Mitthli he thlanmual kal in rihzung mual a liam cia kan chungkhar hna va tlawn caan a si. Hi thla ko ahhin mitthi zuun ngaih a fah khunnak le ngaihchiat bik thla a hung caang. Ngaihchiatnak zuun nih faak terei in a kan denni le phakni a si. Ngakṭah buangro hna nih nulepa an hlamni le ngaihchiatnak in an khahni an caah vawlei a muihni ah a cang ve. Chungkhar tling tein a um bel caah cun, chungkhar i funtomni le nuamh bik lio caan a si ve.

Thawngṭha tuk a simi pakhat cu, Van sunparnak kal taak in ngakṭah buangro hna caah nulepa can, sifak mirum thleidannak ngei lotu, ngaihchiami hna hnemtu, misual mi hna ngaihthiamtu le tlanhtu vawlei misualmi kan caah ngakchia pakhat a chuak. Amah cu a kan uktu Bawi, bawi vialte lakah bawi bik, siangpahrang vialte lakah siangpahrang Jesuh Khrih a chuak cang.

Ngaihchia lungkuaimi hna tho u law i lawm uh! Khamhtu Jesuh Khrih cu zaihla vawr in lam hna usih! Lungthin thar le ruahnak thar he amah cu dong hna usih. Lunglawm tein le ruahchannak nganpi he kan thinlung innka hong in Jesuh Khrih cu dong cio hna usih! Kan ngaihchiat le sifaknak philh in kan ca’h a chuakmi Naute cu dong cio hna usih!

Hi Baibal caang in thazaang la cio hna usih! “Kan caah ngakchia pakhat achuak! Fapa pakhat pek kan si! Amah cu kan uktu Bawi asi lai. Amah cu Khuaruahhar Fim Chimtu, A Ṭhawngmi Pathian, Zungzal Hmunmi pa, Daihnak Bawi, ti asi lai” Isaiah 9:6

Jesuh Khrih nih a chuahpi Lawmhnak, daihnak le hnangamnak cu pumpak pakhat cio nan cungah tlung hram ko seh!! Salai Van Lahnin, 2020 Dipa 12/ #Kum 2020 lioah ka rak ṭial cangmi a si. A thar in ka vun taar ṭhan hi a si. Credit: Salai Van Lahnin

Video Zohnak


Post Views: 12



Source link

Add a Comment

Your email address will not be published. Required fields are marked *