Pastor Lian Chawn: Min Aung Hlaing Zia Kan Keng Sual Maw

Ralhrang uk cu kan huat.MAH zong kan hua. Zei ruangah?

Kanmah duhning in thil kal seh,
kanmah bia in bia tlu seh,
kanmah hi lal ber si peng usih, ti an duh caah a si. Cu ruangah doh an si.

Kan philh lo ding a um ve. Kan chungkhar le Bu (biaknak le vawlei lei bu) cawlcanghnak ah lu bik si a duh mi, mah awka lawng biapi ah a ruat mi, mah bia in donghter le tlukter a duh mi kan si ahcun MAH zia, kan doh cuahmah mi ralhrang zia ka keng ziar ve ti i hngalh ding a si.

Laimi ah hi zia a keng mi kan tampi men la awh! MAH le ralhrang huat ngai le doh ngai bu in an zia ai nunpitu tampi khawh kan si. Chungkhar ah lu bik le awka nei bik si hmanh kan duh ahcun. Khrihfabu ah lutlai bik le nawlnei bik si hna kan hei duh bik ko ahcun MAH nih rampi uk a duh tuk mi hi khuaruahhar a si lem lo.

MAH le ralhrang kan doh lioah hin kanmah pumpak lungput i doh a herh mi philh hlah usih. Kanmah chung ah a um mi MAH le ralhrang lungput hi kan tei a biapi tuk.

Rev. Dr. David Van Bik nih, “Bingbir Par” a cauk ah si ko rua ka ti, “Jesuh Khrih nihhin vancung pennak kan chung ah khumh ai timh hmasa mi a si lo, kan chung ah a um mi Hell kha lakpiak a kan duh,” a ti. Kan chung ah a um mi hell, MAH le ralhrang ziaza bantuk hi kan doh i kan chuah a biapi tuk.

MAH le a ralhrang huat ngang i an pawi mi zia kan pawi peng ve sual ahcun teinak kan hmuh tikah kan ram a dam hlei lai lo, kan chungkhar a nuam hlei lai lo. Tei ding ah a herh hmasa bik, a biapi bik le tei har bik cu kanmah kan si tawn, philh hlah usih. Tei i zuam usih, kan tei lai. Credit: Pastor Lian Chawn

Be the first to comment

Leave a Reply

Your email address will not be published.


*