Pau Dohthlennak Ah USA Nih Ukraine Bang Ankan Bawmh lo Kan Pi Suu Ruangah Asi

Pau Dohthlennak Ah USA Nih Ukraine Bang Ankan Bawmh lo Kan Pi Suu Ruangah Asi.

Daw Aung San Suukyi nih Politic le Hawikom ah aa palh caah American le Nitlakram hna nih, Urkaine Bantukin Pau Dohthlennak hi an kan bawmh lonak asi.

Kan NLD Chan ah Kanpi Suu nih American le EU, Nitlak ram hna he Hawikom nak a tuah lo. American Ral asimi Tuluk he aa Hawikom. American he kan I Hawikom lo ruang ah le Sipuazi kan tuah ṭi lo ruangah ah Kan sining ding tlukin kan si lo, Ṭhancho ding tluk in kan ṭhancho lo. Rampi rum duh ve ahcun Dollar in Sipuazi tuah a herh. Dollar man cu suiman he aa khat. Tuluk Yuan tangka cu Dollar hmai ahcun; Chiahrin le santlai lo fa, saalchiat khi asi. Amah Tuluk hrim hi Dollar acawk mi asi. Tuluk sin ah kan cuai mi Yuan kha Dollar in a thlen tawn. American dollar cu man ngeih lo catlap asi ko nain, Suingun Lungvar le Gas in Ramdang nih an cawk hna. Cucaah American cozah cu Vawleipi a rum bik asi. Ameircan mipi zong an rum ve bak. Pau Dohthlennak ah hin American nih MAH te Rallokap an I ngeih mi Hriamnam vialte khi, kan bawmh sehlaw, cucu American caah chipi pumkhat tia lawng asi rih. Cutluk in a rum mi American Cozah asi. An ram ah mangṭam tlung sehlaw, an ram mi, kum 100 a cawm khawh hna lai.

Kanpi nih American kha rak Hawikom sehlaw, kan ram ah American Sipuazi le mifim tampi an um lai, a let 100 in kan ṭhancho lai I, kan fimthiam fawn lai. American Ruahning le duhning in Rallokap zong an lungthlen in a kal khawh mi an si. Indonesia Tamada Suharto cu American he aa kawmh caah, fawi tuk in Rallokap uknak an thlah khawh. S. Korea zong Rallokap uknak an thlah khawh cu: American Hawikom asi caah asi. American ṭih ah MAH nih uknak an kan chut lo khawh men. Uknak an kan chut hmanh ah American nih kawlram a Sipuazi le an interesting vialte khum zual awk ah, a sik lai, a ngai lo ahcun: Ukraine bang in meithal an kan bawmh lai, tu hrawng hi cu Ralhrang kan thluk lawng siloin, an cihmih an si diam cang hnga. Hi vialte asi khawh lonak aruang bik cu Kanpi Suu nih American he Hawikom lo caah asi.

Rohingya tuksapur cihmih thahnawnnak ah Justice le namneh mi hna sin ah um ti loin, aa kaa aa cip, dai tein aum, ICJ ah ralhrang MAH le Misual Rallokap bawizik rual a khumzual hna, a chanchuah hna. American le Dinfelnak fa le rual an ngeih a chiat ter dih hna. American nih MAH telin Ralbawi zik tampi cu Blacklist a tuah hna. A phih kharh hna. Kum 80 leng Tlangcung mi cung ah Kawl Rallokap nih nawl an buar mi Genocide vialte: War Crime Against vialte: Crimes Against Humanity vialte zeirello tu Kanpi Suu asi an ti cang. AA le Rakhine cihmih awk ah nawl apek hna. Kapa I Ralkapbu tiah aa Uanthlaar tuk lehlam. American cu Kanpi Suu cung ah an lung dong ngai ngai. Cucaah minṭhatnak le laksawng an pek cia mi tam ial te an lak ṭhan. Nobel Peace Prize belte an lak ṭhan lo. Ahohmanh kan chut bal hna lo an ti salam huar ko. ICJ ah Kanpi Suu nih MAH le Rallokap kha rak khumzual hna hlah sehlaw, ICJ Tazacuainak hrim ah khan kan tei cang hna lai. UNSC nih ICC ah ap lai I, an hngawng tan le hrithlai an si diam cang lai caah Anaa laktu le Chuttu hrim kha rak umlo khawh asi. Fim hmanung hrut hmasa tuanphung kha.

8888 thawk in Kanpi Suu, Tlangcungmi le NLD cu Ti le Nga bang ṭhen khawh loin, Hawikom an si. 2008 phunghrampi kan cohlan lo caah thimhnak ah lut lo ding tiah biakamnak an ngei. 2012 ah Kanpi Suu le NLD cu thimhnak ah an lut, Tlangcungmi le EAO cu hnu a chit bak hna, a kal tak hna. Reconciliation Political Ideology le Philosophy kha a hmang. Tlangcung mi le EAO he asi men lai tiah, Rallokap he i remh ṭhannak tu asi. Rallokap hi an lung an i thlen phum hnga maw? Cuticun an lung an i thlen tikah, Hlutdaw in 25% ralkap an chuak lai, Democracy tling tein kan ngah lai timi Theory in a kal. Tlangcung mi Federal pek ding ah asi ti lo.

Tlangcungmi party cu lakhruak pi in hnawhsare in party an dirh I 2012 thimhnak ah an lut, 2015 thimhnak zong an lut, 2020 thimhnak zong an lut nain teinak an hmuh khawh ve ti lo. Achan cu Kanpi Suu nih Tlangcung Party teinak hmuh ding cu Panglong in kal asi lai kha aduh bak lo caah asi. Tlangcung mi cu a phung men in Panglong ah kal pi a timh hna. NCA kha 21st Panglong Conference tiah min a thlen. Panglong ah senthuh ve lomi EAOs le Tlangcungmi dang zong an i tel caah, Panglong ning in asi khawh lai lo caah Tlangcung mi Federal cu asi khawh lailo ti kha a hngalh tuk caah Kanpi Suu mah tihin aa silhnalh mi hi asi. Federal in kan kal rih lailo. Ralkap 25% hi duhsah tein Hlutdaw in kan dawi hna lai, Ralkap um lo hnu ah Democracy in kan kal lai, Cu hnu ah Federal Democracy in siloin Democracy Federal in kan kal lai. Cucu Bahu ah Power le nawlngeih nak a um mi asi. Ram nih zeidah a kan tuah piak lai timi nakin Rampi caah zeidah kan tuah lai, ka pek khawh lai ti lawng hi ruah / ruat / tuak uh tiah Tlangcung mi cu rolung a bunh hna. John F Kennedy bia aa hlan. Tlangcung mi hruaitu hna nih pek awk vialte kan in pek dih cang hna. Kannih nih pek awk kan in ngeih ti hna lo, hmuhding lawng a tang cang an ti ve.

Rohingya Miphun timi kawlram ah an um lo. Bengali lawng an um ati, Kanpi Suu nih. American Embassy, Rangoon, Ambassador pa nih Rohingya min ahmang mi kha Kanpi Suu nih sual aphawt, Bengali ti tuah a ti. American Palai Pa zong nih Kanpi Suu cu sual a phawt ve. Rohingya an Pipu hi Rakhine ram ah hlan lio tein a rak um cang mi an si. An Pipu nih Bangladesh ah an I ṭhial, a tu hi an kir ṭhan timi Vawleipi tuanbia ah a um I, vawlei pi nih cohlan mi asi. Anmah nih an I kawh ning tein ka kawh mi hna asi tiah Kanpi Suu cu rolung a bunh ve.

Tlangcung mi Federal a hlawhtlin tertu, Pohma 261 remh awk ah Kanpi Suu telin NLD nih an duh tilo. Vawleipi le Tlangcungmi an khuaruah a har. Tlangcung mi nih Amyotha Rualrem nak Cozah Dirh awk an chimh len nain, Kanpi Suu nih aduh lo. Cucu anaa an kan chut hnu ah CRPH nih Tlangcungmi duhmi asi tiah, NUG National Unity Government tiah an dir. Atak tak ahcun Uknak chut hlan ah dirh awk ah Tlangcung mi nih fial mi asi. CRPH nih nan dirh ding cu: Federal Union of Burma nan ti ding khi asi deuh. Kanpi Suu nih aduh bal lomi Federal Ram kan serh lai tiah NUG nih an ti, Rohingya cu miphun an an cohlan, ICJ ah Rohingya lei an ṭan, nain, Hlanlio Kanpi Suu bia kha ICJ ah a nung rih. Kanpi Suu nih a hlawt mi EAO hna he Federal Army siam ah NUG aa zuam nain, Kanpi Suu le NLD bangin hlen lai kha an duh ti lo caah, Federal Army cu asi khawh lai lo, Mahameih kan si lai I, ral kan doh hna lai tiah an leh. Kanpi Suu hi luat sehlaw, NUG cu hitin a ti hna hnga. Ka duh lo mi, ka rak duh ballo mi lawngte tuah nan I timh, nan tuah fawn caah tiah NUG hi sual aphawt hna men lai. Kei cu Noble Dindaihnak co tu ka si caah Hriamnam dohnak cu ka duh lo ti sehlaw, zeitin? Kannih NLD cu CEC biachahnak in kan kal. NUG le CEC hi phu dang an lawh ngai. Cucaah NUG le NLD hi an i ṭhen cang ko a lam aa dang an ti cio cang.

Thihnu lungdonh tuah piak phun le thih lai Arsa tuh phun in NUG nih a cawlcang tikah, AA btk Tlangcung mi cu an lung hrin chin ve. EAOs dang le Tlangcung mi hruaitu tampi cu: holh lemlo in, dai tein an um mi, NUG an kan ngiar ko khi an lawh. Cucaah NUG nih kan saduhthah ning in rian kan ṭuan khawh ti lo. American nih NUG cu mipi cozah ah a cohlan ko. Nain Biatak tein a cawlcangh pi lo i, a bawmh lem lo. NUG le PDF /CDF he kawlram mipi chanchuah awk nakin, ASEAN he USA nih aa thim dueh. ASEAN le an special Palaipa thawng in MAH le Kanpi Suu tawn ter ding, ASEAN biachahnak 5 cu MAH zulh ter ding: Kanpi Suu le MAH i tawnnak nak thawng in Kawlram ah Democracy um ṭhan sehlaw, Nuhrin covo zalen cang seh, ti lawng hi Ameircan nih Kawlram caah an POLICY asi. Humanitarian zong ASEAN in bawmh dawh asi. President asi ka ah, Refugees ka lak lai, ati tu Joe Biden zong a holh ti lo. Kawlram ralzam 1000000 leng cu American nih Refugees lak aa timh rih lo. NUG / PDF / CDF / EAO / LDF vialte zong Hriamnam chiah uhlaw, MAH he PEACE tuah uh, aherh lo ah mipi tamtuk an thih tiah USA nih an ti.

American nih Ukraine Bantukin Dollar le Hriamnam he an kan bawmh nak lai, NUG nih ṭuanvo lak thiam ngai a herh, papek a herh. Ramdang tampi he I ton nak chacun, American ram khat tawn in, American kan lei an ṭanh hi a biapit bik mi asi. American a holh lawng ah Vawleipi hi aa thlen I aa letthalh dih. American nih NUG thazang apek tuk lo ri in, a Hawikom asi mi, Japan, Australia, France, Germany tbk hna nih hnu an kir ve. Hlan lio Bantukin an kan ṭanhpi ti lo. Kawlram Sipuazi an tuah ṭhan dih. American nih Biatak tein, an kan ṭanhpi nak lai, hriamnam tiang an kan bawmh nak lai: NUG le ṭuanvo ngeih tu hna nih I zuam a herh. Culocun Raltei lo kan fawi te, Raltuk can asau lai i, mipi kan temtuar tuk ve lai. Ukraine bangin USD 820 million a herh lo, Million 50 an kan bawmh khawh ahcun: MAH te kan thluk hrim hna. UN Humanitarian cu ASEAN le MAH nih ṭuan ko hna seh. American kan lei ah a ṭan poah ahcun UN Humanitarian nak in Dollar tampi deuh an kan bawmh te lai. Afghan caah 12 trillion adih kha hngah ding asi.Credit-Zingtincuai Cinzah

Be the first to comment

Leave a Reply

Your email address will not be published.


*