Puaisa Nih Myanmar Sinum Dubai le Oman Ah An Kalpi Hna i Tamtuk An Hlen Cang Hna

Siinum Tuan Ding In Dubai A Kalmi Puaisa nih an hlen hna caah Myanmar nu tampi Dubai ram ah harnak an tong cang tiah theih a si. UAE ram DUbai lei in puaisa cheukhat hlennak ruang ah Myanmar ram in a ra mi cheukhat harnak faktuk in an tong tiah Labor Right Promoters tiah an chim.
Chokhleipar

Myanmar ram ah Puaisa nicun Rian nan ngah cang tiah an hlen hna an kalpi hna i Dubai taktak ah rian a um lo caah harnak an tong.

An hlen hna ning cu Dubai in puaisa cu kawlram ah an kal i Myanmar rian tuantu hna cu rian nan ngah cang tiah visit Visa in an kalpi hna. An phanh tak tik ah rian a um lo . Thla thum chung rian lo in an um. Dubai ah khuazeihmanh kal kho lo ding in inn khan chung ah an hrenh khumh hna. Tawh in an hrenh khumh hna. Cun an passport zong an chunh hna. A caan ah puaisa inn thianh hna an tuan ter hna. Nain phaisa zong an pe hlei hna lo.

Tu bantuk in an tuah mi hi Dubai puaisa le Myanmar lei puaisa i pehtlaih in an tuah mi hna asi. Harnak a tong mi hna lak ah hin Kayin miphun pawl an tam bik tiah theih a si. Cheukhat lebang cu an phone tiang an chuh hna.

Cu bantuk in harnak a tong mi siinum tuan a timh mi hna pawl cu Dubai puaisa sin ah thlahnih an tuan ter hna hnu ah UAE ram chung Oman khuapi ah sinum tuan ding cun an kuat hna. Oman khuapi zong ahcun ei fing thathi an pek hna lo lengah riantuan caan hi nikhat ah suimilam pariat leng an tuan tet hna tiah theih asi.

Cu bantuk in harnak a tong mi hna cu Myanmar ram lei ah kan kir than lai an ti tik ah Puaisa pawl nihcun Kyats ting 100 cung nan liam lai tiah an halchap lehlam hna.

UAE ram Dubai le Oman khuapi i sinum a tuan mi hna hi Thailand tluk hmanh an lahkhah a tha lo. Oman khuapi sinum a tuan mi hna cu thlakhat ah 120 (Kyatsting5) lawng an ngah. Myanmar ram innpa Thailand tluk hmanh an lahkhah a tha lo chinchap. Puaisa pawl nih an chim hna lio ahcun Thilsuk rian ngah mi cu thilsuk lawngbak a si, ngakchiah um rian a ngah mi cu ngakchia umh pakhat lawng bak a si an ti hna nain kalei an va phanh tak tik ahcun Inn ngan taktak pi chungah thianhhlimh rian an tuan ter hna lengah thil suk le a dangdang he tampi rian an tuan ter hna.

Cucaah Myanmar ram in UAE ram Dubai, Oman te pawl kalding in Puaisa pawl nih a tulio ah hin minung an lemsoi cuahmah lio hna a si i an lemsoi hna ning cu Dubai, Oman ah rian na ngah colh lai, mirang holh thiam a herh lo, rian a tamtuk tiah an hlen hna i nu tampi an kuat hna. Cucaah tulio hi Dubai, Oman te pawl kal ding in puaisa nih an in lem hna ahcun zumh bak lo ding a si lai . Myanmar in Dubai or Oman kalnak cu Kyats nuai 40 an lak hna.

Be the first to comment

Leave a Reply

Your email address will not be published.


*