Ram Sersiamnak ah Biaknak Hruaitu Dirhmun

Ram Sersiamnak ah Biaknak Hruaitu Dirhmun

Pur thla 30 ah a pur cia remh thannak kong ceih mi nih Facebook kuang a hninh. An hmanthlak ka zoh cu, biaknak lei kan Dr pipi hna an i tel. Phundang in kan chim ahcun, Laimi nih biaknak le zatlang nun ah bochan mi kan mifim pipi an itel. Cheikhei! Acu lalek cu ka ti. A kan thattu, kan cihmih a kan duhtu, kan inn le lo vialte a hrawk i a khaangtu ralhrang he biaruahnak a tuah i a lengkai lengmangtu hi midang si loin kan Pastors te lengmang an si ko ti’n ka hei lanhtak ko. Khua ka ruat i, “Hihi Pathian aw ka theih i Thantlang khuapi sersiam nakding ah va tong hna u a kan ti,” an ti maw si hnga ka ti. Atu lawng si lo, kan hnu September thla hrawng ah tangka fang in bawmhnak an cohlannak kong le thil dang tete kong ah tonbiaruahnak an ngeihpi hnanak kong a rak thang lengmang. Hiti a si tikah, kan pastors hna nih hin religiopolitical kalpi an palh deuh hlah maw, ti ka ruat.

Ramrian kong hi Baibal mit in kan zoh tikah Israel tuanbia mitchinhkanh awk a tha hrim lo. Miphun phun khat in an i funtom khawh nakhnga, an biaknak (Judaism) humhaknak le ram sersiamnak ah mi biapi bik tiah, ruah mi hna cu Sanhedrin (Supreme Court) chungtel an si. Sanhedrin cu ramcaar chung an um lio ah Pathian nawlbia pek bangin (Number 11:16) Moses nih a rak dirh mi chirhchan khan ser mi Council a si. Anmah biachahnak le khuarel lairelnak hi, biaknak kong ah siseh, ramrian kong ah siseh, biaceihnak tiang khi a zik a si tawn. Nihin Pau Dohthlennak (Spring Revolution) ah bochan mi kan pale (ralhrang he aa remtha mi) khuakhannak hi a zik a si ve sual lai, ti phan lo awk tha lo a si. Aruang cu hram an thlaknak vawlei (ralhrang) a thatlo caah, a theipar zong tihnung a si te ding khi hmuhcia a si caah si.
Annih (Isreal) mi hna hruaitu pawl ram sersiamnak ah an dirhmun zoh tikah phun dang ngai a si. Ram sersiamnak kong a si caah, Jerusalem sersiamnak chirhchan in hruaitu pathum hna nun van zoh hna usih. BC 580 hrawng kha, Babylonian Siangpahrang Nebuchadnezzar nih Jerusalem khuapi le biakinn a rak hrawh kha si. An khuaram a hrawh lawng si lo, sal ah a tlaih mi hna tampi an um. Khua le ram a rawh hnu in an i thekdarh i miphun an tlau phahnak zong khi a si. Laihri tannak khua le ram rawk nelnul in um peng i hmun king si lan lai a ruat kho lo mi khuaruat hruaitu upa lungfim pathum Ezra, Nehemiah le Zerubbabel hna nih “Tho Usih Law, Sa Than Usih” tlangtaar in an rak sersiam kha si. Ezra nih an biaknak (Judaism) a hrimh than (restored) i, Nehemiah nih khuapi kulhnak vampang le Zerubbabel nih biakinn sakremh rian ti’n an rak kalpi (Ezra 3:8; 7:8, 12; 10:10; Nehemiah 1;2).

Khua le ram sersiam an thawknak tuanbia zoh tikah, sal ah a tlaitu hna, a rak hremtu hna le an khuaram a rak hrawktu hna sin in nawl (permission) an hmuh ruang ah a si ti a fawite, sinain Bible nih cun “Pathian thawng in a si ti.” Prophet Zechariah le Haggai cauk, Ezra le Nehemiah hna rel tikah, Siangpahrang hna nawlpeknak phen ah Pathian a rak umnak tampi hmuh khawh a si. Culawng hlah, khua le ram sersiamnak rian taktak ah Persian le Babylonian an i teltumnak kong hmuh a si loh. Anmah Judah mi lila nih Pathian remruat ni le caan ah an sersiam ko i aho midang he hmanh ceihkhannak zong an ngei lo. An riantuannak ah mi hnahnok a si mi hna tu kha an doh hna. Cucaah aho siangpahrang hmanh nih keimah remh mi ti khawhnak nawl an ngei lo i aho bawi hmanh zong nih keimah kutneh tinak nawl an ngei lo. Chim duh mi cu, tutan Thantlang sersiamnak kong ah ralhrang hrihhrawhnak in tonbiaruahnak an ngeihpi mi hna ruah tikah, a nehhnu a ra ding mi cu lihchim thiam ralhrang hna biathluan dawh le thlum a si te lai. Anmah (mizapi + CDF+CNA) nih khangh le hrawh mi vutcaam kan ruh i kan sersiam tiah, vawleipi hnakhaw ah an luhter lai. Culawng hlah, tuanbia ah a um lan cang fawn lai. A sullam cu anmah thiamcoter duhnak khi a si. Cucaah biaknak hruaitu le biadik tanhtu ding a si mi nih lainawng ralhrang va komh hi cu, Baibal tlaih hmanh ningzah ding a si.Credit- Salai C. twintwin

Be the first to comment

Leave a Reply

Your email address will not be published.


*