Ramchung ramleng um Laimi tampi nih ruahchan bik mi Australia Auhnak 202 Visa kalnak

Australia Auhnak 202 Visa Sining

Ramchung ramleng um Laimi tampi nih ruahchan bik mi ramdang kalnak Humanitarian Visa- Subclass 202 XB visa fiangfai deuh in kan hngalh khawh nakhnga, ka banh khawh mual ka van langhter than. Mi tampi nih hal le fial ka ton lawng si loin, auhnak tuahpiaktu (Form phitpiaktu) nih palh ruangah hlawhtling lo mi tete a um caah, a herh ko rua, tiah ka ruat. Cucaah tawi-sau ngawn in ka van fianh.

Bia a sau lai caah, zapi nih hngalh mi Subclass 200, 201, 203 le 204 kong lanhtak in Refugee ciocio nih Humanitarian Program in sok khawh mi 202 kong tuhi tam deuh ka van langhter lai. Hi Visa, kong ah “chungkhat lawng nih maw lak khawh a si siloah Mibu (organization), missing, hawikom le naihniam chungkhat nih laknak tuah khawh a si ve maw, timi biahalnak pawl hi nan ka hal cem mi a si bik. Laimi theo cu pumpak hlawknak lawng ruat in mizapi mitchinhkanh le hnuchit riangmang in a nehhnu thil a cang ding mi miphun ca tihnung thil hngal bu in i hrahhram le pahchih tibantuk kan hman caah, biachim holhrel zong i sum caan a hau tawn. Sinain tutan cu a thatnak in ruat ko usih, ti lungput he hi kong ka van langhternak hi a si, tiah bia tang danh ka duh ko.

Subclass 202 XB Visa hi a tlangpi in sining then 5 ah an then. Phundang in kan chim ahcun, mizei bantuk dah papek a si, zeibantuk hi dah tuaktanpiak (consideration) ah a tha tiah, tahfung le zohchih mi an ngei. Cu hna cu:

Split-Family Provisions:
Split-Family Provisions ti mi cu, nun-him ruah ah sempi laitlai (thisen tlai or chuakkhat) chiahtak (chuahtak) mi ti khi a si ko rua. Phundang in “Immediate Family” an ti i thisen tlai – chuahpi unau le nu le pa” pawl kha chim duh mi an si. Hi bantuk “pehtlaihnak” ngei in auhnak (sponsor) kan tuah tikah, papek (first priority) a si. Anmah Cozah thanh ning in cu, Australia phan cia chungkhar nih visa an hmuh kum nga chung ah auhnak (application) a ap lai ti si. Cucaah auhnak tuah mi Form 842 chung, cahmai 16, biahalnak 19 zawn i “Split family provisions for immediate family members” zawn i “No” le “Yes” khi thimpiak thiam a biapi tuk. Laimi theo cu, kan chuahpi unau/hringtu nu le pa taktak zong UN luhka ah ai khumh lo mi (case ah a telh lo) kan tampi. Hi ruangah atu kan chim mi Split-Family in auhnak tuah zong hi a fawi tawn lo. Sinain vanthat kan ti hnga maw, Pathian nih a kan zaangfah i a rak i khumh bal lo chuahpi unau ai au/la kho mi tampi kan um cang. Hngalh ding a herh mi tu cu, nan rak i belh (khumh) bal lo mi unau chuakkhat bak a si mi auhnak tuah tikah “chuakkhat unau nan si hngalh nakding ah thisen chek nan ngamh maw” timi biahalnak a um te lai. Cun chuakkhat bak nan si ko nain a tirte in nan i belh lonak aruang zong hal nan si kho fawn. Cucaah i nawnnok lo dingin fianh a hau te lai. Cun Form nan ap lai ah 842 Form, cahmai a donghnak catlap i thim ding an pek mi zawn khi thimpiak thiam a herh te lai.

Close Family: A cung ka langhter bantukin chungkhar naihniam nih tuah mi hi a pahnihnak papek a si.

Extended Family: A pathumnak papek mi cu, rualchan cingla, pi le pa, ni le far, tu le fa tibantuk pehtlaihnak ngei in tuah tikah…

Distant Relatives or Friends: Naihniam chungkhat ngai si lo nih tuah mi siloah ai dawhria mi hawikom tibantuk pehtlaihnak ngei in tuah tikah…

A panganak cu Laimi ca ah a herhnak um lo caah ka langhter lem lo

Mah hna pin ah thil biapi bik in an zoh mi cu “Compelling Reasons” an ti i Visa pek tlak a si maw silo ti khi si. Phundang in kan chim ahcun “Case- Nun him lo ruangah chuahkehnak ram chuahtaknak ruang” pin ah, Australia um he zei bantuk pehtlaihnak thuk dah an ngeih ti le Australia phak tikah a autu (sponsor) nih siseh, community nih siseh, thutdirnak tiang a tuaktanpiak kho hna lai, ti tiang khi zoh a si. Cucaah “Form 842, cahmai 22-24 chung i biahalnak (Q) 28, 29, 30, 31 le 32 zawn khi fakpi (serious) deuh in ser/tial a biapi tuk. Laimi tampi Humanitarian Program tang Subclass 202 Visa kan sok i a kan hnonnak (refused) zoh tikah “Compelling Reasons” ruangah a si bik. Capo biatak in Rev. Za Thawng Cin nih a chim bal bang, “Kan zolo Kawm (fangvoi) Vom nih a ei tuk i rap ka chiah le Ralkap pa a foih/awh i ka num him lo ruangah ka ram” tibantuk konglam (case) sawhsawh hna cun a har ngai kho men. Cucaah na nun him lonak kong kha a fah khawh chung fak (very serious) in tial ah a tha bik.

Cun micheu nih nan hal tawn mi 203 le 204 Subclass Visas kong ah adangte in Form phit a hau lem lo. Humanitarian Visa 202 soknak Form 842 le 681 hi phit ding a si. Nan konglawm (cases) zoh in Australia Cozah nih nan i tlak ning Visa an pek ko hna lai. Keimah pumpak hngalh mi (a hlei in nu pawl) zong 204 Visa pek mi an um ko. A biapi bik mi tu cu, zeitluk fakkhun tuar in dah kan konglam (case) kan tuah khawh ti mi cung ah aa hngat.

A sau pah cang, hi vialte in si rih seh.
Note: Ka hmanthlak taarchih in post piak lo ding kan nawl hna.Salai.C Twin Twin

Be the first to comment

Leave a Reply

Your email address will not be published.


*