Rello in Lanhtak hlah- ZUMHTU le RALTUKNAK

ZUMHTU le RALTUKNAK
Tulio kan ram buainak hi CBCUSA bantuk biaknak organization nihcun Dinnak le lih (Justice vs Injustice) aa pai/domi asi caah dinnak le biatak leiah kan dir aherh tiah aruah caah Mipi leiah dir in a lam kip in rallokap cu a doh ve. Hilio ahhin kan miphun lakah, “biaknak nih aa tel awk asi lo” tiah a ruatmi kan rak um ve caah a caan lio asi caah tlawmpal in tial ka duh ve.

Vawleicung ah Zumhnak phun 3 a um:
1) Activist View: Rom. 13:1-2 chirhchan in Cozah nawlngeitu hna cu Pathian hnatlaknak in a tuanmi an si caah cipkhap ti lo tein an nawl ngaih bak ding an si an ti. Nain Kawlram Rallokap uknak nawl pekmi siloin uknak chuttu an si.

Zeicatiah Pathian nawl/hnatlaknak in uktu hna cu Pathian aiawh/sal an si (v. 4) caah thiltha a tuahmi nih tih lo dingmi an si (v. 3), a sualmi dan a tattu ding le biatak dirpitu ding an si. Rallokap nihcun mitha an doh hna i mithalo an dirkamh hna caah Pathian pekmi uktu sining he an i ralkah.

2) Pacifist View: “Nan bel khatlei va chit rih u” (Matt. 5:39) tiah Jesuh nih a ti i, phuhlamnak le teirul chamnak cu Keimah ta (Bawipa rian) asi caah Vawlei ah zeibantuk thil a tlun zongah Zumtu hna cu dai tein kan um i Bawipa kut ah kan ap ding asi, kanmah cawl le leh a herh lo tiah an ti.

3) Selective View: Raldohnak hi a thiangmi dohnak le a thurhnawmmi dohnak an um caah a thiangmi dohnak ahcun zumtu zong kan itel kho ve an ti; nain dohnak thiang le thianglo ri khiah khawh asi tawn lo. Atlangpi in a thiangmi dohnak cu;

a) Mah le mah i runvennak (Self Defense): Mifir nih Inn a bauh i cu a bauhmi inn chung i an thah ahcun a thattu cu lainawng asi lo (Exo. 22:2). Minung, aho paoh nih kan nunnak, thilri le zalonnak kilvennak ahcun mithahnak nawl Bawipa nih lam a kan onh. Tulio Rallokap cawlcanghnak doh cu self defense asi caah kan thah khawh hna zongah Bawipa nih a kan onhmi thahnak asi, lainawn (müder) si lo.

b) A sual/palh lomi kilvennak (To Protact innocent): A suallomi minung thah le thichuah Bawipa nih a duh lo (Deut. 19:10) caah midang hnursuang lo tein mah tein cawng athaimi tlaihkhih, hrem le thah hi Bawipa nih a duh lo, cubantuk minung hna kilven le bawmhchanh hi Bawipa duhmi asi. Tuchun ah Kawl Rallokap tuahmi cu sualnak ngeilomi hna tlaih, hrem, thah, inn khangh asi caah kan dohmi hna hi a thiangmi asi ko.

Johan sinah ralkap an va kal i kannih tah Zeidah kan tuah awk asi tiah an hal, johan nih
i) Mi thil chut hna hlah u
ii) Mi dang sual va puh hna hlah u
iii) Nan lahkhah ah khan nan lungtling ko u ati hna (Luke 3:14). Hi vialte hi Kawl Rallokap nihcun a linglet in an tuah, an nunpi caah doh an tlak.

Kan Pathian zong hi a caancaan ahcun a sualmi chimhhrinnak caah thah a hmangmi asi. “Nan tlangval hna le rangtum hna cu vainam in ka thah hna” (Amos 4:10), zeicatiah Bawipa cu Ralkap asi (Exo. 15:3). Ralkap rian cu kahdoh cu asi ve hoi.

Atlangpi in chim ahcun Pathian cu minung nunnak, dinnak, zalonnak kilvengtu asi caah a herh caan ahcun thahnak le thihnak tiang Bawipa nih a hman tawn caah Krihfa hna zong nih kan nunnak, biatak le dinnak, le kan zalonnak caah ral kan doh awk asi ko. Bawipa nih a herhnak zawn ah midang thah (killing) hi a onh ko, a herh lonak i lainawn (Murder) tu hi a duh lomi asi. Credit -Van T. Lian

Be the first to comment

Leave a Reply

Your email address will not be published.


*