Rev. Dr. NC Thawng Tha Thang nih 2022 ChinTube People’s Choice Award peknak kong a hmuh ning a chim ve cang – Thawngpang Dik Thanh Hna Usih


Pastor, NC Thawng Tha Thang :ChinTube hi kan miphun a kan cawisangtu pakhat asi! Tutan Chintube ah sawm ka si ve nain, ramchung rian ruangah kaa tel kho lo. Chintube nih kan Miphun kan sinak a kan uanter, Kan nunphung, kan ca, holh le kan talent a cawisan i a ṭhanter.

Kan ringawn, kan hla le kan aw, a cawisan i a dawhter chin. Kan mithiam hna dirkamhnak tuah in thazaang an pek. Tutan kan unau hna lennak ram, Mizoram khualipi Aizawl i kan miphun hawi a phanmi hna thazaang peknak le, A kan bawmchantu Mizoram mipi cungah lunglawmhnak an langhtermi hrim hi ka thangṭhat tuk hna.

Chintube a chuahtertu le, hruaitu a simi Rosie Bawi Ṭha Par cungah upatnak ka pek. Miphun thawng pakhat kan si i, Red carpet kan ngei ve. Kan khual lian kan pahpiak hna lai, kan mithiam hna le miphun ca i aa pe mi hna kan pahpiak hna lai.

𝗖𝗵𝗶𝗻𝘁𝘂𝗯𝗲 Team dihlak cungah le, thazaang a petu mipi dihlak cungah upatnak he, kaa lawmhnak hi ka wall hin ka langhter ve. Chintube le Chin TV thawngchin ko hna seh. Congratulations. 12 𝗗𝗲𝗰 2022

2022 December 12 – Hramhram in uknak a latu SAC nih an tlaihmi hna PDF-Kalay sii lei hriamtlai nu 4 cu an hma an tuar ko nain SAC nih sii thlopnak nawl a pe hna lo tiah Kalay khuami pakhat nih The Irrawaddy ah a chim.

Sii thlopnak nawl a ngah lo mi nu 4 cu Lalmuankimi, Lalthanhluii le Lalpianfeli le Niang Don Ciin hna an si.Anmah hna hi SAC nih an tlaih hna lio ah bomrap ci nih a peh hna i an i hliam ko nain an hma a dam tiang SAC nih a thlop ter hna lo tiah a chim.

Lalpianfeli hi hngakchia thonginn ah facang tun hna a cawi, ṭuang hna a ṭaih caah tai fah zawtnak a tuar tiah an chim.Niang Don Ciin zong biahalnak lio ah an hrem tuk caah a mit le a hna theihnak a rawk ngai cang tiah theih a si.

Anmah 4 hna i Chin miphun nu 5 he 2021 November thla ah SAC ralkap nih PDF-Kalay B03 sakhaan an rak luh hnawh hna lio ah tlaih an rak tong.Cu Chin miphun nu hna cu SAC ralkap nih hngakchia thonginn ah sual phawtnak 505 A, 50 (J) le 52 (D) hna in 2022 November thla ah thong kum 12 dan an tat hna.

Aung San Su Kyi Taza Cuainak Kong Ah Pu Henry Van Ṭhio Cu Tehte Ah An Auh. Rampi ruahnak petu Aung San Su Kyi cu eihmuarnak case in SAC nih taza an cuai caah Vice President hlun Henry Van Ṭhio nih December 12 ah tehte dirhmun in bia a chimpiak, tiah biaceih zung he naihniam in a ummi hna sinin theih a si.

Kokek harnak kong ah runvennak committee tangka in Helicopter cawknak le hlannak ah Aung San Su Kyi nih eihmuarnak a tuah, tiin SAC nih taza an cuai hi a si. Cu caan lio i Helicopter cawknak le hlannak ah nawlngeitu bik cu Henry Van Ṭhio a rak si, tiah theih a si.

Aung San Su Kyi ca ah tehte in a dirmi Henry Van Ṭhio nihcun Helicopter cawknak le hlannak kong he pehtlai in upadi ning le zulhphung ning in ka phuan, tiah a chim.Aung San Su Kyi cu case number 46, 47,48,49 le 50 case a ngei i nihin December 12 ah case 46, 47 le 48 an check piak dih, case pahnih a taang rih, tiah Henry Van Ṭhio nih cun a chim.

SAC nih nawlngeihnak an lak hnu in NLD hruaitu upa vialte cu SAC ralkap nih an rak tlaih dih hna i, Henry Van Ṭhio tu cu a rian tlaihmi Vice President dirhmun in a um ko i an tlai lo, tiah theih a si.Aung San Su Kyi cu case 19 in SAC nih taza an cuai i case 14 ca ah kum 26 thong thlak dingin bia an khiahpiak, tiah theih a si.

 



Source link

Add a Comment

Your email address will not be published. Required fields are marked *