Ronaldo soisel lengmang hlah u tiah Portugal Nipyah nih ti


Atutan Qatar ram ah an tuahmi World Cup cu Christiano Ronaldo caah cun mi lungfahterti bantuk ah aa chuah.

Aruang cu Portugal le Switzerland puai hnu in vawleicung media tampi nih Ronaldo kong ah lungdonghnak lei deuh in an tialmi a tam ngai caah a si.

Abikin, Switzerland he puai ah Ronaldo cu Ayan thudan thuter a si. Asinain, amah aiah an lutmi Ramos nih kawl 3 a sut tik ah vawleicung thawngzamhnak tampi nih, “Ronaldo pennak tang in Portugal an luat cang…Portugal cu Ronaldo lo zong in an si kho ko…Atu hnu puai ah Ronaldo hi First Lineups ah an chia ti lai lo…” ti bantuk ruahnak pawl an tial len caah a si.

Cu vialte lak ah Ronaldo caah le anmah Portugal National Football Team caah a fak ngaimi soiselnak pakhat cu: “Ronaldo nih World Cup ka chuahtak lai a ti. Inn tlun aa tim cang,” timi biavaivuan hi a si.

Switzerland he puai ah Ronaldo cu Ayan thudan ah an thutter tik ah lungfah phun in Portugal Team chuahtak a timh ti phun an tial tik ah amah pumpak Ronaldo ca lawng ah si loin an ram Football Team ca zong ah min a chiatter.

Portugal caoch Fernando Santos

Cu kong he pehtlai cun Portugal Coach (Nipyah) Fernando Santos nih a tanglei bantuk hin a chim:

“Mah bantuk bia cu Ronaldo nih a chim ballo. Switzerland he puai ah kan Tactic kan vun tunmer deuh caah ayan ah kan thutter chungmi a si. Ronaldo hi soisel lengmang ti hlah u law a tha lai. Vawleicung bawlung tuanbia ah hi tluk hin aa pek i, mizapi caah thil a kan tuahpiakmi vialte ruat loin atu bantuk in kan soisel len awk a si lo,” tiah Press Conference ah a chim.

Tu zaan an chuih dingmi World Cup Quarterfinal ah Portugal le Morocco an i tong. Hi puai ah hin Ronaldo hi First Lineup ah an khumh lai le khumh lai lo a fiang rih lo.

Asinain, hmual ngei ngaiin Morocco defense pah kawh awk ah cun Ronaldo hi a herh lai tiah an ruah. Cucaah, tu zan Portugal First Lineup ah hin Ronaldo aa tel kho ko, tiah a ruattu zong an um.



Source link

Add a Comment

Your email address will not be published. Required fields are marked *