Salai C.Twin Twin ~Chan Rolung Phuntu Chin Ralkap

Laimi cu aho miphun dang kut tang hmanh ah kan um bal lo ti cu, chim hau lo a si. Thazaang hmang in mi uk chan (might is power) ah leido ral cu kanmah miphun chung lila ah a rak um sawk, sinain miphun tang pa nih uk a um hlei rih lo. 1895 in aanpei rual (British) nih a kan pen i Chin ramuk bawi rual he remdaih hnatlak ning in The Chin Hills Regulation 1896 ukhruainak phung nih a hun kan nenh. Hi aanpei rual doh in miphung le ram kilvennak ramrian ah kan pasal tha tampi nunnak a rak liam. Nihin tiang an tuanbia chimphai dai hlah.

23 November 1917 ah Lairal a rak tho. Lairal thawh ti tikah kan miphun le ram ca ah tihnung a si mi miphun dang (British) tukkah doh kha chim duh mi cu a si. Sal phun ukhruainak bantukin kan ral a si lo mi German (WW I) va tukdoh ding cohlan khawh lo ruangah a si. Phundang in kan chim ahcun miphun dang uknak tang ah kan ram le miphun hmanh i kilveng lo in kan ral a si bal lo mi va tuk kha an duh lo caah, hruhru hranghrang in a kan pentu chungin luatnak hmuh nakding ah ralthawh a si. Caan zeimawzat chung Lairal a thawh hnu, 1920 ah a hung thiang. Kan ralthatnak le kan huaisennak, kan thiamnak an hmuh tikah 1923 ah Miraang ralkap chung luh duh poh luhnak lawng a hung awng. Minung cei-nawn an hung si tikah 1894 ah Military Police minpu in Falam ah rak chiah mi kha Chin Hills Battalion, tiah an thlen i Japan ral an rak tu. 1943 ah Western Chin Levy, tiah an hun thlen nolh. 1945 a hung phak tikah, First Chin Rifle, tiah an thlen than i 4th Chin Rifle tiang an rak phan. Kanmah Laimi lawng si lo in, tlangcung miphun dang he an van i fonh tikah, Burma Rifle minpu in rak an rak tu. Hi hna phu ah kanmah Laimi hi minthang tampi, Capt. Thang Lian, Col. Khen Za Mang, Lt.Col. Kap Cung Nung, Lt. Col. E. Kem Kim Ngin, Lt. Col. Khai Mon Mang , Capt. Mang Tung Nung , Col. Van Kulh, Lt. Col. Hrang Thio,..tbk an itel.

1948, British pennak chungin luatnak (independence) kan hmuh hnu caan zeimawzat zauk phung ukhruainak in kan kal hnu ah, miluhlul U Ne Win nih 1962 in uknak a lak tikah Kawlram cu a buai vima. Mihruhrang ralhrang uknak tang kan um hnu in kan sifah le kan harsat a zual lawng si loin, rampi an hruai ning an nawnnok chin lengmang tikah hriamtlaih in ramchung ral (civil war) a tam. Kanmah Laimi zong hriamtlaih in ralhrang kan doh ve hna. Cu thawk cun kan laitlai unau Laimi tampi nih ram le miphun ca ah nunnak an pek. Ram le miphun humhak awk ah British chan in nihin ralhrang doh awk hriamtlai CNA/F + CDF/CNDF minung zeizat remruam nunnak dah a va liam cang hnga mu? February 1, 2021, Sen. Gen. Min Aung Hlaing nih uknak a fir hnu mualliam The Lairam Times khawmhsuat khawh mi chung hmanh minung 54 lengkai an si. Hi pin ah, chanchung mipum tlamtling lo dirhmun ah aa hliam zeimawzat um rih a si.

Hi vialte kan pasaltha le nusaltha hna nunnak thisen hi vawlei hmunh chung a hmun ding mi tuanbia dawh a si. Phundang in kan chim ahcun, chan rolung phuntu an si. Cucaah miphun le ram ca ah nun petu hna philh lonak ah, hmailei kan ramkulh cozah nih Public Holiday in “Memorial Day” a kan tuahpiak te ding a biapi tuk. Ni-zarh ulh sawhsawh lawng hmanh si loin, rolung phun siloah nun petu hna dihlak min cakhenh tial in hi Memorial Day ah Chin cozah lutlai pawl hrimhrim nih pangpar dawh he “Salam” pek peng ding an phu. Cu bantuk thil a um tikah, hmailei Chin hrinfa chan khat hnu chan khat nih an hngalh ciamcin lai. Thisen cu nunnak a si bantukin cawk khawh mi le cham khawh mi phun a si lo, man tuak khawh mi phun zong a si lo caah, an tuanbia dawh tial in upatnak pek ding cu hmailei Chinram cozah rian ngan pakhat a si awk a si. Kan chan rolung phuntu, miphun ca ah lunun ui-lo mi, upatnak saang bik kan in pek hna.Credit-Salai C. twintwin

Be the first to comment

Leave a Reply

Your email address will not be published.


*