Thawngtha- CDF-KKG le PDF nih ralhrang Sawmthum Leng An Thah hna

Sagaing ramthen Kalay peng i kah dohnak ah ralhrang minung pahra an thah khawh hna i Puhlaw ah ralhrang motor bomb in an kah hna caah ralhrang minung 10 an thah hna lengah ralhrang motor pahnih a rawk dih citcet tiah theih a si.
Chokhleipar | April 23 | 2022

Sagaing ramthen Kalay peng Yesin khua i a kalmi ralhrang hna cu Yesin le Innkyin khua karlak ah mipi ralkap hna nih April 22 zing suimilam 10 am hrawngah an phomh hna caah ralhrang minung 10 nak tam an thah khawh hna tiah PDF Kalay nih thawngthanhnak an tuah. Cun Kalay PDF pakhat hriamngan nih a khen caah pakhat nunnak a liam i a dang paraltha pahnih hliamhma an pu tiah PDF Kalay nih thawng an thanh.

Ralhrang milu thazaang 100 hna cu Kyautpioh khua le Innkyin khua karlak ah hmunkhur mi an si hna i CDF KKG, PDF Kalay, RKDF le Phahkahphah i fonh in an kah hna caah chun nitlak kaphnih i kahnak a chuak.

Cuticun ralhrang le Pyusawhti i fonh hna phu cu zaanlei suimilam 6pm tluk ah Innkyin khuate lei ah hnu an i thawn than hna. Cun ralhrang nih hriam ngan in an kah mi ruangah Yesin khua inn 7 meikanghnak in a ciam dih tiah CDF KKG nih thawng an thanh. Tulio ah ralhrang pawl cu Innkyin khuate ah an milu thazaang an i fonh than hna i Yesin khuate lei ah ralhrang kuttang phu he kal an i timh lengmang caah a tuhi Yesin khua mipi cu ramlak ah an zaam dih hna tiah theih a si.

Cuve bantuk in April 23 zingka suimilam 1 am tluk ah ralhrang motor 12 cu Mag khuapi in an tum i PPDF le tangti hawi hna nih bomb in lampi ah an kah ve hna caah ralhrang minung 15 an thah khawh hna. Cun ralhrang motor pahnih ciamlak in mei nih a kang tiah PPDF nih an chim. Ralhrang motor cy pehzulh in Dawei ah a kal nain mipi ralkap nih lampi ah bomb in an phomh peng caahralhrang motor 12 chungah pa4 lawng Dawei lei ah pehzulh in a kal tiah PPDF sin in theih a si.

Be the first to comment

Leave a Reply

Your email address will not be published.


*